Misiri: Amb. Habimana yagaragaje umurunga wo kubakiraho u Rwanda rwifuzwa na buri wese

1 10-07-2018 - saa 16:55, IGIHE

Abanyarwanda baba mu Misiri bifatanyije n’inshuti zabo zo muri iki gihugu kwizihiza ku nshuro ya 24 Umunsi wo Kwibohora, hagaragazwa ko kubaka igihugu bijyana n’uruhare rwa buri wese.

Ibi birori byabereye i Cairo muri Conrad Hotel ku wa 9 Nyakanga 2018, byitabiriwe n’abasaga 350 barimo abambasaderi bagera kuri 80, abahagarariye imiryango mpuzamahanga, abashoramari biganjemo abanyotewe gukorera ubucuruzi mu Rwanda banarusuye n’Abanyarwanda biganjemo abanyeshuri baba muri iki gihugu.

Ambasaderi w’u Rwanda mu Misiri, Sheikh Habimana Saleh, yasobanuye inzira y’ubwigenge bw’u Rwanda yakurikiwe n’ibihe bigoye nubwo abana b’umugabane bitanze bagatsinda ingoma ya gikoloni.

Yavuze ko mu Rwanda yabaye inzira y’umusaraba kuko kuva ku mwaduko w’abazungu habibwe amacakubiri ashingiye ku moko yatumye Abatutsi bameneshwa mu 1959, bagabwaho ibitero mu ngo ndetse uburenganzira bwabo burahonyorwa bituma bamwe bahunga igihugu.

Ibi byagejeje igihugu kuri Jenoside yakorewe Abatutsi mu 1994, yahitanye abasaga miliyoni mu mezi atatu ariko iza guhagarikwa n’ingabo zari iza FPR Inkotanyi zari ziyobowe na Perezida Paul Kagame ku wa 4 Nyakanga, Umunsi wizihizwaho Kwibohora kw’igihugu.

Yagize ati “Turi hano dushima ubwitange bw’abahungu, abakobwa, abavandimwe badutangiye buri cyose kugira ngo tube dufite icyo dufite uyu munsi, igihugu cyigenga cyubakiye ku miyoborere idaheza.”

Yakomeje ati “Urugamba rwo kwibohora rwatanze umusaruro kuko abarwanaga bafatanyaga n’abaturage. Ni ubu bumwe dushaka kugumana ngo duhindure u Rwanda, twubake igihugu twifuza.”

Ambasaderi w’u Rwanda mu Misiri, Sheikh Habimana Saleh, yagaragaje umurunga wo kubakiraho u Rwanda rwifuzwa na buri wese

Kuva mu myaka itatu ishize, Guverinoma y’u Rwanda yubaka inzu ziciriritse ku miryango itishoboye muri buri karere, imidugudu y’icyitegererezo yubakirwa abatishoboye ifite ibyangombwa byose, zishyikirizwa ba nyirazo ku munsi wizihizwaho kwibohora kw’igihugu buri wa 4 Nyakanga.

Minisitiri wungirije ushinzwe Ibihugu bihuriye ku ruzi rwa Nil muri Minisiteri y’Ububanyi n’Amahanga ya Misiri, Ambasaderi Nasser Hamzawy, yatangaje ko yishimiye kwifatanya n’Abanyarwanda mu kwizihiza ku nshuro ya 56 Umunsi w’Ubwigenge.

Yagize ati “U Rwanda ni igihugu cy’inshuti na Misiri, ibihugu byombi bikomeje gusigasira umubano hagati y’impande zombi, washyizemo ingufu mu myaka ishize. Umubano wacu ushingiye ku ngingo zirimo imikoranire mu by’ubucuruzi, ishoramari, ubuzima, uburezi n’ibindi. U Rwanda ni igihugu gikurura abashoramari benshi bo mu Misiri.”

Yakomeje avuga ko ibihugu byombi bihuriye ku kuba Umuyobozi w’Umuryango wa Afurika Yunze Ubumwe ari Perezida w’u Rwanda, Paul Kagame uzasimburwa na Perezida wa Misiri, Abdel Fattah el-Sisi mu 2019, mu kurushaho kwimakaza amahoro n’ubukungu bw’umugabane.

Yashimye iterambere ry’u Rwanda rituma rukomeza kubera amahanga icyitegererezo bitewe no kwihuta mu iterambere.

Mu butumwa bwa Minisitiri w’Ububanyi n’Amahanga mu Misiri, Sameh Hassan Shoukry, Ambasaderi Nasser ko iki gihugu kizakomeza gutera inkunga imishinga y’iterambere binyuze mu nzego za Leta n’abashoramari.

Abitabiriye ibi birori basusurukijwe n’abanyeshuri b’Abanyarwanda bari guhugurirwa mu Misiri.

Ibirori by'Umunsi wo Kwibohora k'u Rwanda byitabiriwe n’abasaga 350 baturutse mu nzego zitandukanye
Ambasaderi Nasser Hamzawy, Minisitiri wungirije ushinzwe ibihugu bihuriye ku ruzi rwa Nil muri Minisiteri y’Ububabanyi n’Amahanga ya Misiri
Ambasaderi wa Repubulika Iharanira Demokarasi ya Congo mu Misiri, Nduku Booto, ni umwe mu bari bitabiriye uyu muhango
Ibi birori byabereye i Cairo muri Conrad Hotel
Muri ibi birori, Ambasaderi Habimana yifatanyije n'abayobozi bakomeye babyitabiriye bakata umutsima wo kwishimira isabukuru ya 24 yo kwibohora k'u Rwanda
Abanyarwandakazi biyerekanye mu mbyino gakondo
Umujyanama muri Ambasade y'u Rwanda mu Misiri, Eric Kayoge (uri hagati) ni umwe mu bari bitabiriye iki gikorwa
Abanyeshuri b’Abanyarwanda bari guhugurirwa mu Misiri bari bambaye bigaragaza umuco w'urwa Gasabo
Ambasaderi Habimana Saleh mu ifoto y'urwibutso hamwe n'abakozi ba Ambasade y'u Rwanda mu Misiri
Ambasaderi Sheikh Habimana Saleh yahuje urugwiro n'abitabiriye ibirori by'Umunsi wo Kwibohora
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Hitimana 2018-07-10 11:50:53

Ariko koko Politike n’amadini birajyana.Uyu Habimana Saleh yahoze ari Mufti w’Abaslamu.Nyuma aba Depite wa FPR muli Parliament.Hanyuma aba ambassador muli Egypt.Cyokora Yesu yasize abujije abakristu kutivanga mu byisi nkuko Yohana 17:16 havuga.

Kwamamaza