IGIHE

Ibikorerwa mu Rwanda byerekanywe mu imurikagurisha mpuzamahanga ryatangijwe i Beijing

1 29-04-2019 - saa 21:40, IGIHE

Sosiyete zitunganya, zikanacuruza ibikorerwa mu Rwanda zabimuritse kuri uyu wa Mbere ubwo hatangizwaga Imurikagurisha Mpuzamahanga ry’ibituruka ku Buhinzi bw’ibikomoka ku mboga n’imbuto riri kubera mu Karere ka Yanqing mu Mujyi wa Beijing mu Bushinwa.

Iri murikagurisha ry’amezi atandatu ryafunguwe ku mugaragaro na Perezida w’u Bushinwa, Xi Jinping, ku Cyumweru, tariki ya 28 Mata 2019.

Mu butumwa yatanze nyuma yo guha ikaze abaryitabiriye, yabasabye kurushaho kwita ku iterambere ry’ibidukikije.

Kuri uyu wa 29 Mata 2019, Ambasade y’u Rwanda yafatanyije n’ibigo byaserukiye igihugu kugaragariza abanyamahanga ibicuruzwa byabo no kubasobanurira amahirwe u Rwanda rufite mu ishoramari.

Raporo ya Banki y’Isi yo mu Ukwakira 2018, yagaragaje ko mu koroshya ubucuruzi, u Rwanda ruri ku mwanya wa 29 mu bihugu 190 ku Isi, n’uwa kabiri muri Afurika inyuma y’Ibirwa bya Maurice.

U Rwanda ruri mu bihugu n’imiryango mpuzamahanga birenga 100 biri muri iri murikagurisha, ryanitabiriwe n’abamurika batiyandikishije barenga 120.

Ibigo biruhagarariye byamuritse ibicuruzwa birimo ikawa z’ubwoko butandukanye nka Boneza Cofee, Kivu Belt Coffee, Bourbon Coffee, Gorilla’s Coffee, Nova Coffee, Umubano Coffee, Rugali Coffee, Unguka Coffee, Garuka Coffee na Kinunu Coffee; icyayi, urusenda n’ibinyobwa byiganjemo ibikorerwa muri Entreprise Urwibutso ya Sina Gérard.

Byanamuritse kandi ibikoresho birimo iby’ubugeni n’imitako yo mu nzu igaragaza umuco gakondo w’Abanyarwanda.

Abanyamahanga basuye aho ibigo by’u Rwanda byamurikiraga harangwaga n’ibyapa bibashishikariza kurusura muri gahunda ya ‘Visit Rwanda’ basigaranaga amafoto y’urwibutso bari kumwe n’intore cyangwa begereye igishushanyo cy’ingagi yo mu Birunga, iri mu bikurura ba mukerarugendo benshi.

Umuyobozi uhagarariye Ikigo cyohereza Kawa mu mahanga, Caferwa, Nkurikiyijuru Evelyne, yavuze ko iri murikagurisha ari amahirwe yo kwagura isoko ry’ikawa mu Bushinwa gifite umubare munini w’abaturage.

Yagize ati “Ni ku nshuro ya mbere, ikawa yacu ikaranze imuritswe mu Bushinwa. Hambere twoherezaga ibitumbwe ariko Abashinwa baryohewe n’ikawa yacu yongerewe agaciro.’’

Ibigo byitabiriye imurikagurisha ku munsi wa mbere birimo Caferwa, Urwibutso Entreprise, Urumuri, Umucyo na Damarara. Bizakurikirwa n’ibindi birimo Unguka Muhinzi, Kivubelt, Gashora Farms na Women Exporters.

Ambasaderi w’u Rwanda mu Bushinwa, Kayonga Charles, na we yashimangiye ko iri murikagurisha ari umwanya wo kumenyekanisha ibikorerwa mu Rwanda no gusobanurira amahanga amahirwe u Rwanda rufite mu ishoramari.

Yashishikarije ba rwiyemezamirimo kubyaza amahirwe ari isoko ry’u Bushinwa rimaze korohereza benshi mu buryo bw’ubucuruzi binyuze mu kubaha umwanya wo kugaragaza ibikorwa byabo.

Iri murikagurisha rizasozwa ku wa 7 Ukwakira 2019, ryitezwemo abantu miliyoni 16 bazaryitabira.

Yumvise ku cyanga cy'ikawa y'u Rwanda yahogoje amahanga
Ibihangano by'ubugeni bw'u Rwanda bwishimiwe n'abanyamahanga batandukanye
Yafashe ifoto y'urwibutso igaragaza igihangano kibaje cyakorewe mu Rwanda
Ibikorerwa mu Rwanda byerekanywe mu imurikagurisha mpuzamahanga ry'amezi atandatu ryatangijwe i Beijing
Aho u Rwanda rumurikira ibicuruzwa by'ibigo biruhagarariye hari ibyapa bishishikariza abantu kuhasura
Biyerekanye mu mbyino zigaragaza umuco gakondo w'Abanyarwanda
Intore zaserutse mu mbyino igaragaza umuco Nyarwanda
Ambasaderi w’u Rwanda mu Bushinwa, Kayonga Charles n'abandi Banyarwanda bafata ifoto y'urwibutso

Amafoto: Byumvuhore Frédéric

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Ebony 2019-04-30 01:08:50

Mwababonye abashinwa! Reba uko bari kwiga kariya gaseke bagafata ifoto. Mu minsi iri imbere muzababona baboshye akanoze kurusha bari kukagurisha ku isoko mpuzamahanga bavuga ko gaturutse mu Rwanda. Njye nibaza impamvu RDB idashyira copyright ku bintu nka biriya bituruka mu gihugu kugirango bahe protection umucuruzi nyarwanda ku isoko mpuzamahanga. Kujya kwerekana ibikomoka mu Rwanda hanze si bibi ariko bijye bijyanwa bifite na copyright y’aho biva. Hashize nk’imyaka 20 abaturage b’akarere ka Champagne mu bufaransa basaba copyright y’izina ry’akarere kabo ngo hatagira ukomeza kuryungukiraho atahakomoka- ubu ntawugipfa gukoresha iryo zina adakomoka muri ako karere kuko bahita bamujyana mu nkiko.

Kwamamaza