IGIHE

Denmark: Abanyarwanda bifatanyije n’inshuti zabo kwibuka Jenoside yakorewe Abatutsi

0 22-04-2019 - saa 17:30, IGIHE

Ambasade y’u Rwanda mu bihugu by’Amajyaruguru y’u Burayi, ku bufatanye na UN Women Copenhagen, Minisiteri y’Ububanyi n’amahanga ya Denmark bibutse ku nshuro ya 25 Jenoside yakorewe Abatutsi, mu muhango wabereye ku cyicaro gikuru cya UN Nordics kiri Copenhagen.

Muri uyu muhango, Ambasaderi Christine Nkulikiyinka yibukije ko kuwa 11 Mata 1994, ingabo za Loni zasize abatutsi barenga ibihumbi 2000 mu ishuri rya Don Bosco ku Kicukiro, aho bari bazihungiyeho bizeye ubutabazi ariko babasiga aho barigendera, bakigenda Abatutsi baricwa.

Yakomeje avuga ko u Rwanda nubwo rwazahajwe na Jenoside ‘twahisemo kudaheranwa n’amateka tukubaka u Rwanda ruzira amacakubiri, rutekanye’, anasaba abari aho ko urugamba rwo kurwanya abapfobya n’abahakana Jenoside yakorewe Abatutsi rwaba urwa buri wese.

Umuyobozi wa UN Women Nordics Liaison Office, Caroline Rusten yavuze ko Isi yose ikwiye kwigira ku byabaye mu Rwanda kandi nk’uko byemejwe ko Jenoside itazasubira ukundi, avuga ko bikwiye kuba ihame ntakuka.

Akomeza asaba kandi ko Isi yarwanya uko ihohoterwa rishingiye ku gitsina rikomeje gukorerwa abari n’abategarugori kuko byagaragaye ko ari imwe mu ntwaro ikoreshwa mu kwambura abari n’abategarugori agaciro ndetse n’ubuzima.

Uwungirije Umunyamabanga ushinzwe Politike n’umutekano muri Minisiteri y’Ububanyi n’Amahanga ya Denmark, Lisbet Zilmer-Johns yashimiye u Rwanda aho rugeze mu kwiyubaka nyuma ya Jenoside yakorewe Abatutsi.

Nyuma y’umuhango wo Kwibuka, hakurikiyeho ikiganiro cyarebaga aho tugeze nyuma y’imyaka 25, aho umushakashatsi Tom Ndahiro yasobanuye uburyo jenoside yateguwe kuva cyera mbere ya 1994,abwira abari aho ko kwibuka ari imwe mu ntwaro zikumira ko jenoside yazongera kuba aho ariho hose ku Isi, avuga kandi ko kutavuga ibyabaye bituma ababikoze badakurikiranwa mu butabera.

Iki gikorwa kitabiriwe na ba ambasaderi b’ibihugu bitandukanye, n’abandi bahagarariye ibigo bitandukanye bifite icyicaro mu mujyi wa Copenhagen, n’abanyarwanda batuye muri iki gihugu, hamwe n’inshuti z’u Rwanda.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza