Canada: Mu mijyi itandukanye Abanyarwanda n’inshuti zabo bibutse Jenoside yakorewe Abatutsi

0 12-04-2017 - saa 11:26, IGIHE

Abanyarwanda n’inshuti zabo baba muri Canada bibutse ku nshuro ya 23 Jenoside yakorewe Abatutsi mu mijyi itandukanye y’iki gihugu.

Iki gikorwa cyabaye mu cyumweru gishize mu mijyi itandukanye muri Canada, cyitabiriwe n’Abanyarwanda, abayobozi mu nzego za leta n’abahagarariye imiryango y’abanya-Armenia n’Abayahudi.

Umuyobozi ushinzwe ibikorwa bya Ambasade y’u Rwanda muri Canada, Shakila Umutoni, watanze ubutumwa bw’ihumure ku bacitse ku icumu, yashimiye abaje kwifatanya n’Abanyarwanda mu kwibuka abasaga miliyoni bazize Jenoside yakorewe Abatutsi mu 1994.

Yasabye abantu bose guhuza imbaraga mu rugamba rwo kurwanya ingengabitekerezo ya Jenoside, bahereye mu kugaragaza ukuri nyako kw’ibyabaye mu Rwanda, berekana neza ko ari Jenoside yakorewe Abatutsi.

Ni mu gihe mu mujyi wa Edmonton ho igikorwa cyo Kwibuka ku nshuro ya 23, cyitabiriwe n’Umunyamabanga wa Minisitiri w’Ububanyi n’Amahanga wa Canada, Matt DeCourcey washimye intambwe imaze guterwa mu guhindura imbereho y’Abanyarwanda, asezeranya ko igihugu cye kizakomeza gutanga umusanzu mu kubaka u Rwanda.

Undi muhango wabaye kuwa Gatandatu tariki ya 8 Mata 2017, ubera i Calgary mu Ntara ya Alberta muri Kaminuza ya Mount Royal.

Annick Mugeni Gakombe warokokeye i Kinazi mu yahoze ari Perefegitura ya Butare, yagaragaje ko Jenoside yakorewe Abatutsi yahitanye umuryango we wose harimo ababyeyi bombi n’abavandimwe be umunani ndetse ikaba yaramusigiye n’ihungabana rikomeye.

Ahereye ku byamubayeho, Gakombe yashinze umuryango yise "You Matter" aheramo urubuga abahuye n’ibibazo by’ihungabana mu rwego rwo kubafasha kongera kwiremamo icyizere cyo kubaho kandi neza.

Kizito Kalima, Umunyarwanda utuye Indianapolis muri leta ya Indiana muri Leta Zunze Ubumwe za Amerika, yagaragaje ko bitewe n’amateka ya Jenoside igihugu cyanyuzemo, u Rwanda n’abanyarwanda bafite byinshi byo kwigisha amahanga no gutanga umusanzu wabo mu kubaka isi y’amahoro n’ubwimvikane.

Kizito wari utuye i Nyanza mu Ntara y’Amajyepfo mu gihe cya Jenoside, yatanze ubuhamya avuga ko Interahamwe zamutemye mu mutwe zimusiga mu bandi bari biciwe ku ishyamba rya Kinene, aho yaje kuva akururuka ajya kwihisha mu gishanga cya Rwankanza, ahamara amezi abiri mbere yo kurokorwa n’ingabo zari iza FPR-Inkotanyi.

Nyuma yo kurokoka, Kalima yashinze Ikigo kidaharanira inyungu cyitwa "Peace centre for forgiveness and reconciliation" giherereye muri Indianapolis, aho cyakira abantu 250 buri cyumweru kikabafasha muri gahunda zitandukanye harimo kubona akazi no gukorera ubuvugizi abakigana.

Andy Amour, Ukuriye abanyarwanda batuye i Calgary, yashimiye abitabiriye ibikorwa byo kwibuka Jenoside ku nshuro ya 23 by’umwihariko Kaminuza ya Mount Royal yagize intego yo guhora ifasha iki gikorwa buri mwaka n’ubuyobozi bwa Alberta butuma babasha kuzirikana no guha agaciro abazize Jenoside yakorewe Abatutsi.

Abatuye muri ottawa bitabiriye umuhango wo kwibuka Jenoside yakorewe Abatutsi
Abitabiriye Kwibuka23 mu mujyi wa Edmonton
Bashimangiye ko abanyarwanda bafite byinshi byo kwigisha amahanga hashingiwe ku mateka mabi u Rwanda rwanyuzemo
Abanyarwanda n'inshuti zabo batuye i Calgary muri Canada bibutse ku nshuro ya 23 Jenoside yakorewe Abatutsi
Annick Mugeni Gakombe warokokeye Jenoside i Kinazi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza