Abanyarwanda baba muri Ghana bifatanyije n’amahanga kwibuka abazize jenoside yakorewe Abatutsi

0 13-04-2017 - saa 08:30, IGIHE

Abanyarwanda batuye muri Ghana n’inshuti zabo ku bufatanye na Ambasade y’u Rwanda ifite icyicaro Abuja muri Nigeria, bibutse ku nshuro ya 23 Jenoside yakorewe Abatutsi muri Mata 1994, igahitana ubuzima bw’abasaga miliyoni.

Uyu muhango wabereye mu Ishuri mpuzamahanga rya “China Europe International Business School” kuya 8 Mata 2017, witabiriwe n’abahagarariye ibihugu byabo muri Ghana, imiryango mpuzamahanga, hamwe n’inshuti z’u Rwanda ziva mu mpande zitandukanye ku Isi.

Abawitabiriye batangiye bacana urumuri rw’icyizere rushushanya ahazaza h’u Rwanda, hanafatwa umunota wo kwibuka abazize Jenoside yakorewe Abatutsi.

Abashyitsi bifatanyije n’Abanyarwanda kuri uyu munsi wo kwibuka, basangijwe amateka igihugu cyanyuzemo binyuze mu mashusho agaragaza uko Jenoside yakorewe Abatutsi yateguwe ikanashyirwa mu bikorwa n’uko yahagaritswe.

Hanagaragajwe kandi urugendo rw’abanyagihugu mu kwiyubaka nyuma y’imyaka 23 u Rwanda rushegeshwe n’amahano yarugwiririye mu mukino wakinwe n’Abanyeshuri b’Abanyarwanda biga kuri Ashesi University muri Ghana.

Umuyobozi w’Ihuriro ry’Abanyarwanda baba muri Ghana, Bernardin Gatete yashimye ingabo zari iza RPF zagize uruhare mu guhagarika Jenoside ndetse n’ingabo z’amahanga zirimo abanya-Ghana na Sénégal zagerageje guhangana n’Interahamwe mu gihe Umuryango w’Abibumbye n’ibihugu bikomeye ku Isi byareberaga.

Gatete yasabye Abanyarwanda gufatana urunana mu rugamba rwo kurwanya abapfobya jenoside no kurushaho kubumbatira agaciro n’ubumwe basubijwe. Ibi avuga ko bizagerwaho kubera ubutwari n’ishyaka ryo kwiteza imbere.

Umuyobozi uhagarariye inyungu z’u Rwanda muri Ghana, Prof. Clément Dzidonu, yatangaje ko bibabaje kubona Abatutsi basaga miliyoni bicwa Isi yose irebera, ndetse agashengurwa no kubona hakiri abirengagiza ibyabaye bakanashyigikira abajenosideri.

Prof. Dzidonu akomeza avuga ko aterwa ishema no kubona Abanyarwanda bakataje mu majyambere, ndetse u Rwanda rukaba ari intangarugero muri Afurika no ku Isi yose.

Umukuru w’Abahagarariye ibihugu byabo muri Ghana akaba anayoboye Ihuriro rya ba ambasaderi bo muri Afurika bari muri iki gihugu, Ambasaderi Pavelyn Tendai Musaka, uhagarariye Zimbabwe nawe yagaragaje akababaro k’amateka ya jenoside yumvise n’ibyo yiboneye mu mashusho yerekanwe.

Ishoramari, isuku n’uburinganire mu ishusho y’iterambere ryagutse

Ambasaderi Pavelyn yagaragaje ko aterwa ishema n’intambwe itajegajega u Rwanda rumaze gutera mu iterambere, ahanini rishingiye ku butwari n’ishyaka by’Abanyarwanda.

Uyu muyobozi kandi yakomoje ku ruhare rw’u Rwanda mu gusakaza iterambere ku mugabane wa Afurika, atanga urugero rwa RwandAir iherutse gufungura amarembo muri Zimbabwe mu kunoza ubuhahirane hagati y’impande zose.

Ibi kandi bijyana no kuba u Rwanda rwarimakaje ihame ry’uburinganire aho ruza ku mwanya wa mbere ku Isi mu bihugu bifite umubare w’abagore benshi mu Nteko Ishinga Amategeko.

Raporo nyinshi zikorwa n’umuryango mpuzamahanga zigaragaza ko Umujyi wa Kigali uri mu ya mbere ifite isuku n’umutekano, bituma abawugenda bawukurira ingofero, bagahamya ko ari igihugu gikwiye kubera abandi urugero.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza