IGIHE

Abanyarwanda baba muri Canada bibutse abakinnyi n’abahanzi bishwe muri Jenoside yakorewe Abatutsi

0 23-06-2019 - saa 10:01, Karirima A. Ngarambe

Abanyarwanda batuye mu Mujyi wa Ottawa muri Canada bahuriye mu gikorwa cyo kwibuka abari abakinnyi n’abahanzi bishwe muri Jenoside yakorewe Abatutsi mu 1994.

Ni igikorwa cyateguwe n’Abanyarwanda bahuriye mu Ishyirahamwe ridaharanira Inyungu rya ASSA (Association Socio-Sportive “Amitiés) rifatanyije n’irya “Humura” rirengera inyungu z’abacitse ku icumu rya Jenoside yakorewe Abatutsi batuye Ottawa-Gatineau.

Mu kwibuka no kuzirikana inzirakarengane za Jenoside yakorewe Abatutsi, hateguwe imikino ya gicuti muri Basketball yahuje amakipe ane yo mu gice cy’Uburasirazuba bwa Canada.

Iyi mikino yitabiriwe n’abayobozi batandukanye barimo Abanyarwanda batuye muri Canada, inshuti zabo, abadepite n’abandi bayobozi bo mu Ntara ya Ontario.

Abacyitabiriye beretswe amafoto n’amashusho ya bamwe mu bari abakinnyi n’abahanzi bakomeye bishwe muri Jenoside yakorewe Abatutsi, banasangizwa urwibutso babasigiye.

Mu buhamya bwatanzwe harimo ubwa Ikirezi Alaine, umwana wa Rutsindura Alphonse wahoze ari umwarimu, akanatoza Ikipe ya Volleyball muri Seminari Nto ya Karubanda (Petit Seminaire Virgo Fidelis).

Ikirezi afatanyije na Nkubana Louis wari inshuti y’umubyeyi we batanze ubuhamya bw’imibereho ye n’umurage yasize w’urukundo muri muzika yigishaga na volleyball yatozaga.

Nyakwigendera yanashyiriweho irushanwa [Memorial Rutsindura] rigamije kumwibuka, rikinwa ku nshuro ya 17 mu 2019.

Rutsindura yavukiye i Ndora mu Karere ka Gisagara mu 1958; amashuri yisumbuye yayize muri Seminari Nto ya Karubanda, amakuru ayakomereza muri IPN (Institut Pedagogique National) i Butare.

Yabaye umwarimu w’umuziki n’Ikilatini mu Iseminari, aba umusifuzi n’umutoza w’Ikipe ya Seminari kuva 1983-1994, yanabaye Umutoza Mukuru w’Ikipe y’Igihugu y’Abagore hagati ya 1988-1990, yanabaye kandi Visi Perezida wa FRVB.

Rutsindura yishwe muri Jenoside yakorewe Abatutsi mu 1994 hamwe n’umugore we Mukarubayiza Vérène n’abana be batatu Iriza Alain, Izere Arsène na Icyeza Alida.

Mu bandi bibutswe barimo Dominique Ngoga Sebalinda wahoze ari umukinnyi ukomeye w’umukino wa Volleyball n’abahanzi nka Rugamba Sipiriyani, Sebanani André n’abandi.

Umurundi Rwakiranya Louis mu buhamya bwe yavuze uko nyakwigendera yatoje ikipe yakinagamo akayiteza imbere kugera no ku rwego mpuzamahanga.

Yavuze ko nubwo yari Umunyarwanda utoza Abarundi atitaye ku bibatandukanya ahubwo yaharaniye ibyabahuzaga ari rwo rukundo rwa volleyball.

Umunyamabanga wa ASSA, Umutoni Denyse, yabwiye IGIHE ko igikorwa nk’iki kigamije guhuza Abanyarwanda hibukwa inzirakarengane zazize uo zavutse.

Yagize ati “Abo dufatanyije twihaye inshingano zo guteza imbere umuco na siporo kuko bituma twubaka ubumwe n’ubucuti nk’Abanyarwanda muri Canada.’’

ASSA yashinzwe mu Ukuboza 2018, ni ishyirahamwe rihuriyemo Abanyarwanda b’ingeri zitandukanye barimo abato, abakuru, abagore, inkumi n’abasore.

Igikorwa cyo kwibuka abahanzi n’abakinnyi ni ubwa mbere cyabereye muri Canada. Biteganyijwe ko kizajya kiba ngarukamwaka ndetse kikanitabirwa n’amakipe y’abari n’abategarugori.

Kuri ubu Ikipe ya Polisi y’Umujyi wa Ottawa yasabye kuzacyitabira umwaka utaha, izyongeraho n’iz’Abanyarwanda n’inshuti zabo zo mu yindi mijyi.

Ku ikubitiro amakipe yitabiriye igikorwa cyahuriranye no kwibuka ku nshuro ya 25 Jenoside yakorewe Abatutsi, arimo New Stars Basketball Club, igizwe n’Abanyarwanda batuye Ottawa-Gatineau; Intare za Hamilton; Silverbacks y’Abanyarwanda batuye mu Mujyi wa Montréal n’Ikipe y’Abarundi batuye Ottawa-Gatineau yitwa Urunani.

Iyi mikino yahuje abantu bagera kuri 250 biganjemo urubyiruko aho umukinnyi muto yari afite imyaka 12, umukuru akagira 40.

Amakipe yitwaye neza yahembwe imidali y'ishimwe
Abanyarwanda baba muri Canada bibutse abakinnyi n’abahanzi bishwe muri Jenoside yakorewe Abatutsi
Hakinwe Basketball mu kwibuka abakinnyi n'abahanzi bishwe muri Jenoside yakorewe Abatutsi

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza