Abanyarwanda baba mu Misiri bongeye gushima Perezida Kagame wabatabaye mu ntambara yo mu 2011

1 27-06-2017 - saa 22:09, IGIHE

Abanyarwanda biga mu Misiri bizihije umunsi mukuru wo gusoza igisibo gitagatifu cya Ramadhan, Eid al-Fitr, bagaruka ku buryo bagobotswe na Perezida Kagame Paul mu 2011 ubwo iki gihugu cyari cyugarijwe n’ibibazo by’intambara.

Uyu munsi mukuru wateguwe n’Abanyarwanda b’Abayisilamu biga mu Misiri n’inshuti zabo wizihijwe kuri uyu wa Mbere tariki ya 26 Kamena 2017.

Abanyeshuri biga muri iki gihugu bazirikana by’iteka mu myaka itandatu ubwo iki gihugu cyarimo imvururu zishingiye ku mpinduramatwara yashakaga gukuraho ubutegetsi bwa Perezida Hosni Mubarak, yahitanye abantu benshi mu Misiri.

Umukangurambaga mu Banyamuryango ba FPR Inkotanyi mu Misiri, Abdul Karim Rurangirwa, yibukije abanyamuryango iya 5 Gashyantare 2011, umunsi utazibagirana mu mateka ya za Kaminuza zose zo mu Misiri cyane iya AZHAR; aho Perezida Paul Kagame yohereje RwandAir itwara Abanyarwanda bose barataha, intambara irangiye arongera afasha abanyeshuri gusubira ku ishuri.

Abanyeshuri 44 nibo bagejejwe ku Kibuga cy’Indege cya Kigali, bavuye i Cairo mu Misiri.

Yagize ati “Nimumfashe dushimire abanyamuryango bagenzi bacu muri Kongere idasanzwe ya FPR Inkotanyi bahisemo neza ariko tunashimire umukandida wacu wemeye ubusabe bw’Abanyarwanda.”

Iki gikorwa cyashimishije abanyeshuri bo mu bindi bihugu, bashingiye ku mutima babonanye Perezida Kagame wo gukunda abenegihugu, banatungurwa no kubona bohererejwe indege y’igihugu.

Yakomeje agira ati “Perezida Kagame ni umukandida wacu kuko yaduhaye agaciro mu Misiri. Tariki 3 Kanama 2017 tugomba gukomeza igihango dufitanye n’urwatubyaye dutora Paul Kagame ukunda Abanyarwanda.”

Ambasaderi w’u Rwanda mu Misiri, Sheikh Saleh Habimana, yibukije abari bitabiriye umunsi mukuru ko bagomba kwita ku gaciro basubijwe.

Yagize ati “Iyo umuntu asubijwe uburenganzira, aba afashe inshingano, isumba izindi, yo gukunda u Rwanda n’Abanyarwanda, kwitabira gahunda za politiki nziza no kuyinjiramo bifasha mu gukumira ko politiki mbi yakongera kwinjira mu gihugu.”

Abanyeshuri biga mu Misiri basabwe kuzatora Umukuru w’Igihugu wabatabaye mu gihe bari mu bibazo, mu matora ateganyijwe kuya 3 Kanama ku Banyarwanda baba hanze n’iya 4 Kanama 2017 ku b’imbere.

Kuri uyu wa Kabiri nibwo Komisiyo y’Amatora yatangaje ko Perezida Paul Kagame na Dr Frank Habineza ari bo bakandida bemewe by’agateganyo, ku mwanya wa Perezida wa Repubulika mu matora, mu gihe abandi bari batanze kandidatire zabo barimo Mwenedata Gilbert, Barafinda Sekikubo Fred, Rwigara Diane na Mpayimana Philippe batujuje ibyangombwa bisabwa.

Gutangaza lisiti ntakuka y’abakandida bemejwe bizakorwa ku wa 7 Nyakanga 2017.

Mu gihe mu Misiri hari imvururu zikomeye, Perezida Kagame yagobotse abanyeshuri b'abanyarwanda babayeyo bohererezwa indege ibacyura
Abanyarwanda baba mu Misiri bizihije umunsi wa Eid al Fitr bashimira Perezida Kagame wabagobotse ubwo igihugu cyari cyugarijwe n'intambara
Ambasaderi w’u Rwanda mu Misiri, Sheikh Saleh Habimana, yibukije abari bitabiriye umunsi mukuru ko bagomba kwita ku gaciro basubijwe
Umukangurambaga mu Banyamuryango ba FPR Inkotanyi mu Misiri, Abdul Karim Rurangirwa, yatangaje ko igikorwa cy'ubutabazi bahawe cyakoze benshi ku mutima
Umuyobozi ushinzwe itangazamakuru mu banyamuryango ba FPR, Abdul Razak Niyigaba, ageza ijambo rye ku bitabiriye ibi birori
Abanyarwanda baba n'abiga mu Misiri n'inshuti zabo bafata ifoto y'urwibutso

Amafoto: Ambasade

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mira 2017-06-28 02:17:40

amashimwe kurinyakubahwa yagobotse abavandimwe bacu.

Kwamamaza