IGIHE

Abanyarwanda baba mu Burusiya n’inshuti zabo bizihije isabukuru ya 25 yo Kwibohora (Amafoto)

1 7-07-2019 - saa 18:01, IGIHE

Abanyarwanda baba mu Burusiya hamwe n’inshuti z’u Rwanda, bakoraniye kuri Ambasade y’u Rwanda muri icyo gihugu, mu birori byo kwizihiza isabukuru y’imyaka 25 u Rwanda rumaze rwibohoye.

Ni ibirori byabaye ku wa Kane tariki ya 04 Nyakanga 2019, muri Ambassade y’u Rwanda i Moscow. Byitabiriwe n’abanyarwanda batandukanyen’abadipolomate bahagarariye ibihugu byabo mu Burusiya, biganjemo ab’ibihugu bya Afurika.

Muri iki gikorwa cyabereye mu busitani bwa Ambassade y’u Rwanda, Ambasaderi Dr. Mujawamariya Jeanne d’Arc yasabye buri wese guha icyubahiro ingabo zahagaritse Jenoside yakorewe Abatutsi, zikabohora igihugu cyari hafi kuzima mu mateka y’isi ndetse bamwe bagatanga ikiguzi cy’ubuzima bwabo, none u Rwanda rukaba rugeze aho buri wese yishimira umuvuduko warwo.

Yibukije iterambere u Rwanda rumaze kugeraho kubera amaboko, ubwitange no guhitamo neza kw’abana barwo; mu bukungu, imiyoborere myiza, imibereho y’abaturage, mu butabera no mu kurinda igihugu icyagihungabanya aho cyaturuka hose.

Ati “Twebwe abanyarwanda duha agaciro gakomeye Kwibohora kw’igihugu cyacu, kuko gufite umusingi ukomeye w’amaraso n’ubuzima bw’abana b‘u Rwanda bitanze batizigama, bakarubohora imiyoborere mibi, buri wese akaba afite aho yita iwabo.”

“Iyi myaka 25 ikaba isize igihugu kigeze aho nta watekerezaga ko u Rwanda rwaba ruhageze nyuma ya Jenoside yakorewe abatutsi mu 1994. Bityo twese duhe icyubahiro abo banyarwandakazi n’abanyarwanda babohoye igihugu, ubu imiyoborere myiza yacyo ikaba yarabaye ubukombe haba mu gihugu, mu karere, muri Afurika yose ndetse no ku isi yose”.

Yakomeje abwira abari aho ko u Rwanda rutazasubira inyuma, kandi ko iterambere rumaze kugeraho rurikesha kwishakamo ibisubizo no gushyira hamwe kw’abana barwo.

Yibukije urubyiruko rw’abanyarwanda rwari aho, ijambo Perezida Kagame yavuze mu kiganiro n’abanyamakuru ku munsi wabanjirije ibirori bwo Kwibohora; ko bagomba kwirinda kumva barageze iyo bajya kubera ibyagezweho kandi byiza muri iyi myaka, ahubwo bagomba gukora ibiri mu bushobozi bwabo bwose batikoresheje, batagombye kubwirizwa icyo bakora kandi bagashora imbaraga n’ubwenge bwabo mu bikorwa birambye.

Umuyobozi mukuru ushinzwe Umubano w’u Burusiya na Afurika, Amb. Andrey Kemarsky, yifurije ubuyobozi bw’u Rwanda, abanyarwanda n’inshuti zabo isabukuru nziza yo kwibohora. Yagarutse ku bihe bibabaje u Rwanda rwanyuzemo, ariko ubu akaba ari igihugu ntangarugero mu miyoborere myiza n’ububanyi n’amahanga.

Yagaragaje ko umubano w’u Rwanda n’u Burusiya umaze gutera imbere ku buryo bushimishije mu rwego rw’uburezi, ubuvuzi, ishoramari, guhahirana n’ibindi byinshi byiza. Ibyo ngo bigaragariza u Burusiya ko u Rwanda ari inshuti nyanshuti yo kwizerwa mu mikoranire.

Yijeje abari aho ko ibi bihugu bizakomeza gushyira hamwe mu nyungu z’abaturage b’ibihugu byombi.

Nyuma y’ubutumwa butandukanye bwo kwifuriza abanyarwanda umunsi mwiza, hakurikiyeho ubusabane nk’uko bisanzwe mu muco nyarwanda, habaho no gucinya akadiho ka kinyarwanda kitabiriwe n’abanyarwanda n’abanyamahanga.

Amb. Mujawamariya aha ikaze Umuyobozi mukuru ushinzwe umubano w’u Burusiya na Afurika, Amb. Andrey Kemarsky
Akanyamuneza kari kose ku bitabiriye ibi birori
Uretse abakuru, n'abato ntibatanzwe mu kwizihiza ibirori byo Kwibohora
Akanyamuneza kari kose ku bitabiriye ibi birori
Umuyobozi mukuru ushinzwe umubano w’u Burusiya na Afurika, Amb. Andrey Kemarsky, yifurije ubuyobozi bw’u Rwanda, abanyarwanda n’inshuti zabo isabukuru nziza yo kwibohora
Ibi birori byitabiriwe n'abantu b'ingeri zitandukanye
Habayeho no gutarama kuri uyu munsi udasanzwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
chantal 2019-07-08 02:05:50

kiliya kizungu cyokuifoto yanyuma kondeba cyanze gusuhuza uliya mugabo mwenewacu buliya ingengassi ntiyakirenze kondeba kinarora nabi nkinterassi?????? esubundi cyajaho kumariki????

Kwamamaza