USA: Abanyarwanda n’inshuti muri Iowa bibukiye Jenoside muri kaminuza ikomeye

0 17-04-2017 - saa 20:42, Karirima A. Ngarambe

Abanyarwanda baba muri Leta Zunze Ubumwe za Amerika muri Leta ya Iowa bafatanyije n’abanyeshuri biga muri Kaminuza ya William Penn kwibuka Jenoside yakorewe Abatutsi.

Umuhango wo kwibukira muri iyi kaminuza iherereye mu mujyi wa Oskaloosa, wabaye kuwa 13 Mata ubwo hasozwaga icyumweru cyahariwe Kwibuka Jenoiside yakorewe Abatutsi.

Witabiriwe n’Abanyarwanda baba mu mijyi itandukanye igize Leta ya Iowa (Des Moines, Cedal Rapid, Iowa City, Oskaloosa n’ahandi) n’inshuti z’Abanyarwanda.

Mu butumwa bwahatangiwe, Umuyobozi w’iyi Kaminuza ya William Penn , John Ottoson, yagaragaje ko kwibuka Jenoside yakorewe Abatutsi ari umwanya wo kuzirikana ko u Rwanda rwahuye n’ibyago bikomeye, rukabura abana barwo, ariko bikabera isomo Isi kugira ngo buri wese arwanye amacakubiri.

Mu bitabiriye uwo muhango, Umunyemari akaba n’inshuti y’u Rwanda Joe Crookhum nyir’isosiyete yitwa MUSCON, wasuye u Rwanda inshuro nyinshi, akaba ari n’umuterankunga w’iyi kaminuza, yagaragaje ko asobanukiwe ubukana Jenoside yakorewe Abatutsi yakoranwe, ariko nyuma yayo u Rwanda rukongera kwiyubaka.

Yagize ati “Njye ubwo nasuraga Urwibutso rwa Kigali, nageze mu cyumba cyahariwe abana nahabonye ifoto y’abana bavukanaga, ngo barakinaga babona abasirikare babasanga barabafata babashyira mu cyumba kimwe barabica, abana bato cyane, nibaza ukuntu abantu bakuru, b’ababyeyi bafata utwana duto bakatwica, ibi bintu sizabyibagirwa, ndasha kubabwira ko ibi bintu bitaza bitunguranye ari ibintu bitegurwa. Mbonereho kubasaba kubirwanya, ntibizongere, biramutse byongeye bizabe ikimwaro ku isi yose."

Ariko avuga ko nyuma y’iùmyaka 23 gusa, yashimishijwe no kuba u Rwanda atari igihugu buri wese areba inyuma ngo aheranwe n’ibyabaye gusa yicwe n’agahinda, ati “U Rwanda ni igihugu buri muntu ahangayikishijwe no kubona atera imbere we n’igihugu cye , ndizera ko Isi yose yagombye kwigira ku Rwanda.”

Miss Bahati Grace wari ni umushyitsi Mukuru, muri uyu muhango yashimiye abashyitsi bose bifatanya n’abanyarwanda kwibuka Jenoside yakorewe Abatutsi, anagaruka ku mateka y’itegurwa ryayo.

Yavuze ko mu Rwanda ko mbere y’umwaduko w’abazungu Abanyarewanda bari babanye neza, abakoloni baje bazana indangamuntu, bashyira amoko mu Banyarwanda, ari nayo yaje isoko y’ubwicanyi bwatangiye guhera mu myaka ya 1959.

Yagize ati “Ndagira ngo mbabwire ko jenoside yateguwe neza kandi igashyirwa mu bikorwa, yateguwe n’ubuyobozi bwari buyoboye u Rwanda icyo gihe, bica abarenga miliyoni y’abanyarwanda, abana basigwa ari imfubyi, ababyeyi bagirwa incike, igihugu kirasenywa ariko u Rwanda n’Abanyarwanda twahisemo kuba bamwe, twishatsemo ibisubizo.”

Yasobanuye ko Inkiko Gacaca zatanze ubutabera bwunga, naho ubu hanimakajwe gahunda ya ‘Ndi Umunyarwanda’.

Kaminuza ya William Penn yakira abana b’Abanyarwanda kuhaminuriza muri gahunda ya Perezida wa Repubulika yo guha buruse abanyeshuri batsinze neza.

Imihango yo kwibuka muri Iowa yabereye muri Kaminuza ya William Penn
Bacanye urumuri rw'icyizere
Miss Bahati Grace (iburyo) yagaragaje ko Jenoside yakorewe Abatutsi yateguwe kuva kera
Abanyarwanda n'inshuti zabo muri Iowa bibutse Jenoside yakorewe Abatutsi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza