IGIHE

Umunsi nzaririmbira imbere ya Perezida Kagame nzaruhutsa umutima-Bonhomme

0 15-07-2019 - saa 15:45, Karirima A. Ngarambe

Umuhanzi Bonhomme Rwamihare Jean de Dieu, yatangaje yifuza kuzaririmbira imbere ya Perezida Kagame indirimbo ze zisingiza ubutwari bw’Inkotanyi, ubundi umutima we ukaruhuka.

Tariki ya 6 Nyakanga 2019 muri komine imwe y’umujyi wa Bruxelles yitwa Uccle izwi mu makomini afite ubwiza mu miturire n’ubukungu bwifashe neza kuva kera, niho umuhanzi Rwamihare Bonhomme yakoreye igitaramo “Inkotanyi ni Ubuzima”.

Uyu muhanzi yamuritse alubumu y’amashusho y’indirimbo zirata ubutwari bw’Inkotanyi zarokoye abahigwaga muri Jenoside yakorewe Abatutsi mu 1994.

Izo ndirimbo harimo “Inkotanyi ni Ubuzima”, “Urugamba rwo Guhagarika Jenoside”, “Imbunda y’Inkotanyi”, “Mwarakoze Kuturokora”, “Kubaho Kwanjye ni ikiguzi cy’Amaraso”, “Nkumbuye Inkotanyi”, “Mbwira aho zagusanze” n’iyitwa “Umunsi wa mbere wabonye Inkotanyi”.

Ni igitaramo cyasembuye imbamutima za benshi bari aho bibutse inzira y’umusaraba banyunzemo nyuma bakaza kurokorwa n’Inkotanyi zabakuraga ahantu hatandukanye babaga bihise.

Cecile Kayirebwa na Nyiranyamibwa Suzanne bakoze mu mihogo biyibutsa indirimbo zabo zahimbwe ubwo Inkotanyi zari ku rugamba, maze igitaramo gitanga isura y’Umurindi w’Intwari karahava.

Mu kiganiro na IGIHE, Bonhomme yavuze ko yishimiye gutaramira abanyarwanda baba mu Bubiligi bagafatanya kwishimira ubutwari bw’abasirikare b’Inkotanyi barokoye ubuzima bw’abahigwaga muri Jenoside yakorewe Abatutsi.

Yagize ati “Ndishimye cyane kubona ntumirwa nkaza hano mu Bubiligi nkabaririmbira ko Inkotanyi ari ubuzima, nibikunda iki gitaramo kizaba ngarukamwaka nk’uko buri tariki ya 3 Nyakanga kizajya kiba mu Rwanda.”

Bonhomme yanashimiye cyane abagize uruhare mu kumutumira no gutegura, bayobowe na Ntagugura Ituze Pascaline bakunze kwita Coco.

Bonhomme yakomeje avuga ko inzozi ze ari ukuririmbira imbere ya Perezida Kagame akamushimira nk’umuntu wayoboye urugamba rwo kubohora igihugu.

Ati “Ndifuza kuzaririmbira nshimira Inkotanyi imbere ya Perezida Paul Kagame wari uyoboye urugamba rwo kwibohora, niyo ndoto nayigeraho nkaruhutsa umutima.”

Ntagugura Pascaline wateguye iki gitaramo yavuze ko indirimbo za Bonhomme zibafasha cyane kwibuka uko Inkotanyi zasubije ubuzima abari baramaze kwakira urupfu.

Yagize ati “Twashimishijwe no kuririmbana na Bonhomme umuhanzi dukunda cyane, araduhoza mu kwibuka, mu kwibohora agakora mu nganzo tugashimira Inkotanyi kuko ijoro ribara uwariraye. Iyo aturirimbira twinjira mu mateka yaba ayo kwibuka cyangwa ayo kwibohora, afite amagambo akoresha akatuvugira twese uko tubyifuza mu Kinyarwanda cyiza kandi cyumvikana.

Mu ijoro ryo ku wa 03 Nyakanga 2019 uyu muhanzi yari yakoreye igitaramo nk’iki i Kigali, aho yafatanyije n’abahanzi barimo Clarisse Karasira na Cyusa Ibrahim bakoze indirimbo zivuga by’umwihariko ku ngabo zabohoye u Rwanda.

Abanyarwanda baba mu Bubiligi bishimiye gutaramana na Bonhomme mu gitaramo yise Inkotanyi ni Ubuzima
Ibyishimo byari byose ubwo buri wese yibukaga aho Inkotanyi zamukuye
Iki gitaramo nibishoboka kizaba ngarukamwaka
Bonhomme yasusurukije abitabiriye igitaramo cye avuga ko aziruhutsa naririmbira imbere ya Perezida Kagame
Bageze aho biha isura y'abasirikare batera isaruti

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza