Uko Rwanda Day yabereye mu Mujyi wa Ghent mu Bubiligi yagenze umunota ku wundi (Amafoto)

25 10-06-2017 - saa 11:16, Jessica Rutayisire, Karirima A. Ngarambe, Philbert Girinema

Ku wa 10 Kamena 2017 ni umunsi utazibagirana ku Banyarwanda batuye ku mugabane w’u Burayi cyane mu Bubiligi kuko izari inzozi zabo zakabirijwe muri Flanders Expo, inzu mberabyombi yo mu Mujyi wa Flanders Expo mu Mujyi wa Ghent, muri Rwanda Day barotaga.

Ibirori bishimangira ubunyarwanda mu Bubiligi byatangiye ku wa Gatatu tariki ya 7 Kamena 2017 ubwo Abanyarwanda baba muri iki gihugu bajyaga gushyigikira Perezida Kagame aho yari mu nyubako ya Tour et Taxis yitabiriye Inama y’Umuryango w’Ubumwe bw’u Burayi yiga ku iterambere.

Bitwaje amabendera y’igihugu n’ibyapa bigaragaza iterambere ry’u Rwanda, bakoze urugendo n’imyiyereko igaragaza aho u Rwanda rumaze kugera ahanini rubikesha Perezida Kagame waruvanye mu menyo ya rubamba ubu rukaba rumaze kuba igihugu ntangarugero ku Isi yose.

Mu buryo butari bwitezwe, uwo munsi hamenyekanye amakuru y’uko iki gihugu kigiriwe umugisha wo kwakira umunsi mbonekarimwe wa Rwanda Day wari umaze igihe ari nk’inzozi ku batuye mu Bubiligi. Imyiteguro yahise itangira, amabendera y’u Rwanda benshi bayaraza kumusego, bahanagura urukweto n’ikote, imikenyero bayizinga neza bati ubu bukwe twamenye bwo ku ya 10 Kamena ntibuzaducika.

Ababyeyi barakenyeye, baterera abana umugongo, abakuze bafata akabando barasindagira mu gihe urubyiruko rwo rwagiye amasigamana rugikubita. Kuva mu Mujyi wa Bruxelles, mu nkengero zawo nka Liege, mu Busiwisi, mu Bufaransa, mu Buholandi, kwa Papa mu Butaliyani, muri za Suède na Norvège bose inkoko niyo yabaye ingoma ku wa Gatandatu babyuka berekeza mu Mujyi wa Ghent.

Kuva saa yine aba mbere bari bageze muri uyu mujyi ku nyubako ya Flanders Expo aho Rwanda Day yabereye. Nta basigaye kuko n’abo mu mbeho yo kwa Putin (ndavuga mu Burusiya) bahageze kare, ababonye ko bari bukererwe baremeye bagenda ijoro ariko bagasiga ikimenyetso aho banyuzeho kubera umudiho wa Kinyarwanda wabarangaga mu nzira.

Mu Mujyi wa Ghent mu nyubako ya Flanders Expo hateraniye abanyarwanda basaga ibihumbi bine, aho bakiriye Perezida Kagame bagira bati ‘Muzehe Wacu’, nawe abashimira uruhare bagira mu iterambere ry’igihugu aribyo bitumye muri iki gihe u Rwanda ari intangarugero ku isi.

Abari bateraniye muri iki cyumba bahawe umwanya wo gutanga ibibazo n’ibitekerezo ku buryo bose banyurwa kugeza n’aho n’uwari wararenganyijwe n’abakomeye, Perezida Kagame yamufashije akamubwira ko ‘iby’abakomeye abimurekera’, ko ikibazo cye kigomba gukemuka.

IGIHE yari mu nyubako ya Flanders Expo aho yabakurikiraniye uyu munsi utagira uko usa umunota ku wundi.

UKO IKI GIKORWA CYAGENZE UMUNOTA KU WUNDI...

19:20: Nyuma yo kwakira ibibazo n’ibyifuzo by’abanyarwanda batandukanye, Perezida Kagame asoje igikorwa cya Rwanda Day cyaberaga mu Bubiligi aho ashimira abanyarwanda ku kuba bitabiriye ari benshi. Ubu hakurikiyeho ibikorwa by’imyidagaduro aho abahanzi basusurutsa abitabiriye.

King James ati iyi bayita 'Ganyobwe'
Ibyishimo byagaragaraga ku maso y'abitabiriye iyi Rwanda Day
King James nawe yakoze mu nganzo mu mudiho wa kinyarwanda abantu baranyurwa
Umuhanzi Teta Diana asusurutsa abitabiriye Rwanda Day

Perezida Kagame asezera abitabiriye Rwanda Day

Umwe mu bitabiriye Rwanda Day yifata Selfie ari kumwe na Perezida Kagame
Uyu mubyeyi yakoze ibishoboka byose kugira ngo akore mu biganza bya Perezida Kagame
Perezida Paul Kagame yashimiye Abanyarwanda bitabiriye Rwanda Day mu Bubiligi
Perezida Kagame asuhuza abayobozi bakuru n'Abanyarwanda bitabiriye Rwanda Day
Abanyarwanda benshi bishimiye gukora mu biganza by'Umukuru w'Igihugu
'Muzehe wacu' niyo ndirimbo yaririmbwe cyane bagaragaza urukundo bafitiye Perezida Kagame

18:45: Uwizeye Vanessa yabajije Perezida Kagame ikibazo kijyanye n’akarengane kajyanye n’uko atabashije kubona ingurane z’imitungo y’umuryango we yangijwe muri Jenoside. Yavuze ko yari atuye mu Nyakabanda mu Mujyi wa Kigali, ikibazo cye akaba yarakigejeje ku nzego zitandukanye ariko ntigikemurwe.

Perezida Kagame yagishinze Minisitiri w’Ubutabera, Johnston Busingye, amusaba ko yegera Uwizeye kigakemurwa.

Perezida Kagame yatanze ibisubizo ku bibazo byose yabajijwe

18:10: Ibisubizo bya Perezida Kagame: Umukuru w’Igihugu yavuze ko azashaka umwanya ku buryo yazabonana n’abanyarwanda baba mu Busuwisi. Ku bijyanye n’icyifuzo cya Dr Mwamba cyo gutangiza ivuriro ryita ku bafite uruhara, yavuze ko usibye n’ivuriro, mu Rwanda hakenewe n’ubumenyi nk’ubwe.

Ati “ Icyabimubigejeho nacyo turagishaka, kuba umuganga cyangwa kugira ikoranabuhanga […] Umuntu nkawe turamwifuza, hari n’uburyo bumworohereza gukora mu gihugu… igisigaye ni ukumubaza ngo azaza ryari.”

18:05: Dr Patrick Mwamba, yavuze ko yifuza kuza mu Rwanda kugira ngo atangize ibikorwa bye mu rwego rw’ubuzima aho yatangiza ivuriro. Akaba yavuze ko yatangiza ivuriro ryita ku gufasha abantu bafite uruhara ku buryo bakongera kugira umusatsi.

18:00: Abanyarwanda baba mu Busuwisi basabye Perezida Kagame ko Rwanda Day y’ubutaha yazabera muri iki gihugu.

Nyuma y'ubutumwa yatanze, yakiriye ibitekerezo anasubiza ibibazo bitandukanye
Uwizeye Vanessa yabajije Perezida Kagame ikibazo kijyanye n’akarengane kajyanye n’uko atabashije kubona ingurane z’imitungo y’umuryango we yangijwe muri Jenoside
Ikibazo cya Uwizeye Vanessa, Perezida Kagame yagishinze Minisitiri w'Ubutabera, Johnston Busingye, ndetse ahita ajya kureba uyu mukobwa kugira ngo amufashe

17:50: Perezida Kagame asoje ijambo rye yifuriza abanyarwanda amahoro y’Imana. Ubu hakurikiyeho umwanya wo kungurana ibitekerezo.

Umuhesha w'amagambo kuva ubwo Perezida Kagame yari ageze muri Flanders Expo yashimwe na bose
Umwe mu bitabiriye Rwanda Day yabwiye Perezida Kagame ko yamufasha kubona inguzanyo kugira ngo azabasha kugira inzu y'amasaziro mu Rwanda
Inshongore (umanitse urutoki) yabwiye Perezida Kagame ko hari abayobozi 'bakomeye' bamuhuguje ibye muri Kigali
Umugiraneza Rose uba mu Bubiligi, yabwiye Perezida Kagame ko yagurishije inzu yasigiwe n’umugabo we na Mutsindashyaka Théoneste wahoze ari Umuyobozi w'Umujyi wa Kigali, ariko akamuha amafaranga make ku yo bari bumvikanye andi akamubeshya ko yayishyuye imyenda uwo muryango wari ufite mu kigo cy’imari
Abanyarwanda baba mu Busuwisi basabye Umukuru w'Igihugu kuzabasura
Abantu b'ingeri zitandukanye babonye umwanya wo kubaza ibibazo Umukuru w'Igihugu
Babwiye Perezida Kagame ko bifuza gutangiza mu Rwanda ishuri ryigisha abana ibijyanye n'amahoro
Uyu murundi yahaye Perezida Kagame inka

17:30: Ubu turandika amateka mashya – Perezida Kagame

Perezida Kagame ati “Ubu turandika amateka mashya, amateka y’igihugu cyacu, amateka ashingira ku bumwe, ku gukora, gukoresha ukuri, kumva ko tutakwicara ngo hagire undi uza kudukemurira ibibazo. Ntabwo ariko bikwiriye kumera n’ingaruka zabyo zaragaragaye muri ayo masomo twarabyize.”

Perezida Kagame yashimangiye ko u Rwanda ruri kwandika amateka mashya
Perezida Kagame yabwiye Abanyarwanda ko muri raporo zitandukanye zirimo iz’ijyanye n'uburinganire n’ishoramari u Rwanda rukomeje kuza mu bihugu bya mbere ku isi
Perezida Kagame yavuze ko u Rwanda rumaze kugira agaciro mu Karere no ku Isi hose
Umukuru w’Igihugu yavuze ko azashaka umwanya akabonana n’Abanyarwanda baba mu Busuwisi
Perezida Kagame yavuze ko Umunyarwanda wese yaba ahantu aho ariho hose hamubereye
Perezida Kagame n'abari bamuherekeje bishimiye uko bakiriwe

- “Umunyarwanda abe ahamubereye”

Perezida Kagame ati “N’abanyarwanda baba hanze kandi twakwishimira ko umunyarwanda wese yaba aho ariho hose hamubereye, afite icyo akora, afite ikimuteza imbere. Nta n’ubwo ibyo bivamo ko uwo munyarwanda yibagirwa igihugu cye ahubwo iyo bibaye byiza, arahaha, akora ahaha ajyana iwabo.”

“Ababa hanze y’u Rwanda ntimukibwire ko hari ugira icyo abanenga keretse uba hanze ukora nabi ariko ukora ibikubaka, ibyubaka igihugu cyawe ni byiza kandi ni uburenganzira bwawe numva nta wagira icyo abinengaho.”

“Ariko noneho birongera bikagira akarusho iyo abo hanze y’igihugu bakorana n’abo mu gihugu imbere, bakuzuzanya bikaba rwa Rwanda rugari mujya mwumva, rwa Rwanda rurenga imipaka. Hari urw’imipaka irinzwe, hari n’urundi rurenga imipaka. Ubwo iyo abo hanze n’abo mu gihugu dukoranye, turugira u Rwanda rugari.”

Umukuru w'Igihugu yasabye abanyarwanda baba mu mahanga gufatanya n'ababa imbere mu gihugu mu iterambere
Yashimangiye iterambere ry'u Rwanda, avuga ko n'abatarukunda bemera ko hari intambwe rumaze gutera

-  N’abadakunda u Rwanda bemera intambwe rwateye

Perezida Kagame yabwiye abanyarwanda ko muri raporo zitandukanye u Rwanda rukomeje kuza ku isonga cyangwa mu bihugu bya mbere ku isi, atanga urugero ku bijyanye n’uburinganire aho ruza mu bya mbere, mu bijyanye n’ishoramari n’ibindi.

Ati “Ntabwo ari njye ubyandika, ndetse n’abataduha amahirwe batanadukunda nabo barabyemera. Ubwo bivuze ko ari ukuri. Mu bihugu bishyira imbere abaturage babyo, akaba aribo buri gikorwa cy’igihugu gishingiraho [ku baturage], u Rwanda ruza imbere. Bityo rero, ntawe byabura gushimisha, nta n’uwo byabura gutera imbaraga kugira ngo dukore n’ibindi byinshi bikidutegereje bitaragerwaho ariko dufite aho duhera.”

Inkuru bifitanye isano: N’abataduha amahirwe batadukunda nabo barabyemera –Impanuro za Kagame muri Rwanda Day

17:15: Perezida Kagame atangiye ijambo rye abwira abanyarwanda ko u Rwanda ‘bamaze kurugira igihugu gifite agaciro bitari mu karere gusa ahubwo ku isi hose’ .

17:10: Ambasaderi w’u Rwanda mu Bubiligi, Olivier Nduhungirehe, ahaye ikaze Perezida Kagame anamusaba kugeza impanuro ku Banyarwanda bitabiriye uyu munsi.

Abanyarwanda bakiriye Perezida Kagame mu majwi arenga bagira bati 'Muzehe Wacu, muzehe wacu!'
Abanyarwanda biganjemo abageze mu zabukuru basabye ubufasha bwo kubona inguzanyo mu mabanki nabo bagateza igihugu imbere
Abana bato bavukiye hanze bifurije Perezida Kagame ishya n'ihirwe mu Kinyarwanda gitomoye
Abanyarwanda n'inshuti zabo bari bishimiye bikomeye guhura n'umukuru w'igihugu
Rwanda Day yatangiye abayitabiriye bibwirana bitewe na Diaspora baje baturukamo
Byari ibyishimo ku bantu b'ingeri zose
Itorero Itetero ryasusurukije abitabiriye Rwanda Day mu Bubiligi mu mbyino za gakondo

17:00: Abana b’abanyarwanda bibumbiye mu itorero ryitwa ’Itetero’ nibo bakiriye Perezida Kagame mu mbyino za Kinyarwanda no mu magambo y’ikinyarwanda amuha ikaze.

Abana bato bishimiye guhura amaso ku maso na Perezida Kagame
Itorero Itetero ryatanze icyizere ku hazaza h'abakiri bato ku gusigasira umuco gakondo w'u Rwanda

-  Amafoto ya Perezida Kagame ubwo yageraga mu cyumba kiri kuberamo Rwanda Day

16:50: Pulchérie Nyinawase uyobora DRB Rugali, Diaspora Nyarwanda mu Bubuligi, ahawe umwanya aho ahaye ikaze Perezida wa Repubulika akamubwira ko abanyarwanda baba muri iki gihugu bibumbiye hamwe, mu bikorwa biteza imbere igihugu.

Pulchérie Nyinawase uyobora DRB Rugali yagaragaje ko Abanyarwanda baba mu Bubiligi bibumbiye hamwe mu bikorwa biteza imbere igihugu

16:45: Muri Flanders Expo hateraniye abanyarwanda baturutse mu Bubiligi, mu Bufaransa, mu Buholandi, mu Busuwisi, mu Butaliyani, mu Budage, mu bihugu byo mu majyaruguru y’u Burayi, mu Burusiya, abo mu Bwongereza, abaturutse mu Rwanda n’inshuti z’u Rwanda.

16:42: Hamaze kuririmbwa indirimbo yubahiriza igihugu, yaririmbwe n’abana b’abanyarwanda baba mu mahanga; nyuma bajya gusuhuza Perezida Kagame n’abandi bayobozi bicaye imbere barimo Ambasaderi Olivier Nduhungirehe na Pulchérie Nyinawase uyobora DRB Rugali, Diaspora Nyarwanda mu Bubuligi.

16:40: Perezida Kagame ageze mu cyumba cya Flanders Expo ahari kubera Rwanda Day. Yakirijwe amashyi n’impundu, amabendera arazamurwa. Bakomeje bahagaze baririmba bati ‘Muzehe wacu, Muzehe wacu!’

Perezida Kagame ubwo yageraga muri 'Flanders Expo' imbere y'imbaga yitabiriye Rwanda Day

Andi mafoto

Bateze amatwi impanuro z'Umukuru w'Igihugu, Paul Kagame
Itorero ribyina imbyino gakondo ryasusurukije abitabiriye Rwanda Day
Abanyarwanda bitabiriye Rwanda Day mu Bubiligi bagaragaje ibyishimo byo kubona umunsi bari bamaze imyaka irenga irindwi bifuza
N'abagabo bagarutse ku muco gakondo batega amaboko babyina bya Kinyarwanda
Sandrine Uwimbabazi wayoboye imihango yabanjirije ijambo ry'Umukuru w'Igihugu muri Rwanda Day
Abanyarwanda n'inshuti zabo bishimiye ibihe bagiranye n'Umukuru w'Igihugu
Abayobozi bakuru barangajwe imbere na Minisitiri Mushikiwabo na Ambasaderi Nduhungirehe Olivier babyina ’Intsinzi’ bishimira intambwe u Rwanda rumaze gutera mu iterambere
Rwanda Day yahuje n'abataherukanaga bamarana urukumbuzi
Minisitiri Jean Philbert Nsengimana yishimanye n'ibihumbi by'abitabiriye Rwanda Day mu Bubiligi
King James yishimanye n'Abanyarwanda bitabiriye Rwanda Day mu ndirimbo ze zirimo 'Ganyobwe' n'izindi
Abana bato nabo babonye amahirwe yo kubona Perezida Kagame amaso ku maso
Bamwe bafashe amafoto y'urwibutso kuri uyu munsi w'amateka bahuriyeho n'Umukuru w'Igihugu, Paul Kagame
Abanyarwanda baturutse mu bihugu bitandukanye i Burayi n'ahandi bishimiye kwakira Perezida Paul Kagame
Abayobozi bakuru barangajwe imbere na Minisitiri Mushikiwabo babyina 'Intsinzi' bishimira intambwe u Rwanda rumaze gutera mu iterambere
Abanyarwanda basaga ibihumbi bine bahuriye mu Mujyi wa Ghent mu Bubiligi muri Rwanda Day
Minisitiri w'Urubyiruko n'Ikoranabuha, Jean Philbert Nsengimana na bagenzi be bacinya akadiho

16:05: Minisitiri w’Ubutabera akaba n’Intumwa Nkuru ya Leta, Johnston Busingye, ahawe umwanya ngo aganirize abanyarwanda bitabiriye Rwanda Day y’uyu mwaka aho ababwiye iterambere ryabayeho mu rwego rw’ubutabera mu gihugu.

Minisitiri w’Ubutabera akaba n’Intumwa Nkuru ya Leta, Johnston Busingye, yagaragarije abitabiriye Rwanda Day 2017 iterambere ry'ubutabera mu gihugu
Minisitiri w’Urubyiruko n’Ikoranabuhanga, Jean Philbert Nsengimana, yagaragaje ko u Rwanda rumaze gutera intambwe ifatika mu ikoranabuhanga
Minisitiri Louise Mushikiwabo yatangaje ko mu minsi ya vuba RwandAir izatangira gukorera ingendo mu Bubiligi
Umuyobozi Mukuru wa RDB, Clare Akamanzi, yongeye gukangurira abashoramari kuza mu Rwanda kuko amarembo afunguye kuri bo

15:55: Minisitiri w’Urubyiruko n’Ikoranabuhanga, Jean Philbert Nsengimana, niwe uri kuganiriza abitabiriye iyi Rwanda Day aho ababwiye intambwe u Rwanda rumaze gutera mu ikoranabuhanga. Abamenyesheje ko rwiyemezamirimo mpuzamahanga w’umushinwa, Jack Ma, ari umwe mu bazitabira inama ya Youth Connekt itegerejwe mu kwezi gutaha.

Minisitiri Nsengimana yabwiye urubyiruko ko hari amahirwe mu Rwanda yababashisha kwihangira imirimo bityo bakagira uruhare mu iterambere ry’igihugu.

Akurikiwe n’Umuyobozi Mukuru wa RDB, Clare Akamanzi, ubwiye abashaka kuza gushora imari mu Rwanda ko amarembo afunguye kuri bo.

Minisitiri Jean Philbert Nsengimana yishimanye n’ibihumbi by’abitabiriye Rwanda Day mu Bubiligi

15:30: U Rwanda ni igihugu cyarenze amateka y’ivangura ndetse kidaheza - Mushikiwabo

-  Minisitiri Mushikiwabo yasangije abanyarwanda baba mu mahanga amakuru amwe arebana n’u Rwanda

“Ndabamenyesha ko mu mpera z’umwaka ushize mu nama ya AU yabereye i Kigali, Perezida Paul Kagame yahawe kuyobora amavugurura ndetse yabagejejejo imyanzuro mu ntangiriro z’uyu mwaka basaba ko akomeza gukurikirana ishyirwa mu bikorwa ry’imyanzuro y’amavugurura yari yabagejejeho.”

“Turifuza gutera imbere twese tugafatanya kureba ibibazo bitureba twese kuko hirya no hino ku isi hari ibibazo bitandukanye.”

“Twishima iyo muri hano ariko turushaho iyo muje mu gihugu cyanyu gusuhuza ababyeyi mu gihugu. Turababwira ko u Rwanda ari urwanyu, ni urwa buri munyarwanda wese.”

“Ni igihugu cyarenze amateka y’ivangura ndetse kidaheza. Turi igihugu cyifuza ibitekerezo bya buri wese.”

15:15: Minisitiri w’Ububanyi n’Amahanga, Louise Mushikiwabo, yakomeje avuga ko nubwo Perezida Kagame yari afite inama nyinshi agomba kwitabira, igishimishije ari uko yabonye umwanya ‘wo kuza kuganira namwe mugasabana, twese tugahura, tukababona, tukishima, tukishimira hamwe ,tukishimira igihugu cyacu’.

Abwira abasaga ibihumbi bitatu bateraniye muri iki cyumba yakomeje agira ati “Amakuru nababwira y’u Rwanda ni menshi sinzi aho ndi buyahere. Igihugu cyanyu, igihugu cyacu cy’u Rwanda gihagaze neza. U Rwanda ni amahoro, ni ejo hazaza heza…mu mateka y’igihugu cyacu tugeze ahantu heza hadasanzwe.”

Minisitiri Mushikiwabo aha ikaze abanyarwanda bitabiriye Rwanda Day
Minisitiri Mushikiwabo yibukije Abanyarwanda baba mu bihugu bitandukanye by'amahanga ko u Rwanda ari igihugu kidaheza
Abanyarwanda benshi bateraniye mu cyumba bari gukurikira impanuro za Minisitiri Louise Mushikiwabo

15:00: Minisitiri w’Ububanyi n’Amahanga, Louise Mushikiwabo, ahawe umwanya aha ikaze abanyarwanda n’inshuti z’u Rwanda zitabiriye uyu munsi aho abashimiye cyane mu izina ry’abaturutse i Kigali.

Ati “Turabashimiye kandi turabashima.” Yakomeje ababwira ibijyanye n’urugendo Perezida Kagame yagiriye mu Bubiligi aho yavuze ko yari yitabiriye inama yiga ku iterambere yatumiwemo n’Umuryango w’Ubumwe bw’u Burayi aho yatanatanze ikiganiro mu ifungurwa ryayo.

Yakomeje ababwira ati “ Azava hano mu Bubiligi yerekeza mu Budage aho naho ahafite ibiganiro yatumiwemo n’Umuyobozi w’Igihugu cy’u Budage n’Imiryango Mpuzamahanga.”

14:50: ‘Rwanda itajengwa na nani vijana’ niyo ndirimbo iri kuririmbwa muri aka kanya. Abantu benshi bahagurutse barabyina bunganira ijwi rya Masamba Intore ryumvikana mu ndangururamajwi.

14:45: Minisitiri w’Ububanyi n’Amahanga, Louise Mushikiwabo, ni umwe mu bayobozi bamaze kwinjira. Kuri ubu arimo gusuhuza abantu batandukanye bitabiriye uyu munsi. Ni nako umuhanzi Jali akomeje gususurutsa abitabiriye uyu munsi.

Minisitiri Mushikiwabo aganira na Depite Gatabazi Jean Marie Vianney
Minisitiri w'Ibikorwaremezo, James Musoni (iburyo) aganira n'umwe mu bitabiriye Rwanda Day
Minisitiri w'Ubuzima, Dr Diane Gashumba (iburyo) asuhuzanya na Ambasaderi w'u Rwanda muri Suède, Christine Nkulikiyinka
Minisitiri Mushikiwabo Louise yahuje urugwiro n'abitabiriye Rwanda Day
Ambasaderi w'u Rwanda mu Bubiligi, Olivier Nduhungirehe (iburyo) n'uwo mu Busuwisi, François Xavier Ngarambe (hagati) baganirira ahari kubera Rwanda Day

14:15: Kugeza ubu, igice kimwe cy’icyumba kigiye kuberamo Rwanda Day cyamaze kuzura, hasigaye ikindi gice. Abantu bamaze kugera mu cyumba barenga ibihumbi bibiri mu gihe hanze hakiri benshi bari kwinjira.

14:00: Itorero ribyina Kinyarwanda niryo rihawe umwanya kugira ngo risusurutse abanyarwanda n’inshuti z’u Rwanda bamaze kugera muri iki cyumba. Ribanjirijwe n’umuhesha w’amagambo usanzwe ayobora urubyiruko muri Diaspora w’u Rwanda mu Bubiligi, Uwimbabazi Sandrine, uhaye ikaze abitabiriye uyu munsi aho abamenyesheje gahunda uko iteye.

13:45: Abayobozi batandukanye mu byishimo

Ambasaderi w'u Rwanda muri Suède, Christine Nkulikiyinka, (wambaye umukenyero w’icyatsi) na Ambasaderi w’u Rwanda mu Bwongereza, Karitanyi Yamina (uri iburyo bwe) baganira n’abandi bitabiriye iyi Rwanda Day
Umuyobozi w'urugaga rw'abikorera, Benjamin Gasamagera (ibumoso); Umuyobozi mukuru wa RGB, Prof Shyaka Anastase na Bayingana Aimable uyubora FERWACY (iburyo) nabo bitabiriye Rwanda Day
Umunyamakuru wa Televiziyo Rwanda, Cleophas Barore aganira na Ambasaderi w'u Rwanda mu Burusiya, Jeanne d'Arc Mujawamariya, imbere muri Flanders Expo

13:15: Abahanzi batandukanye bari kugorora amajwi bitegura kuza gususurutsa abitabiriye uyu munsi.

Abahanzi barimo Soul T (ibumoso); Inki na Jali batangiye gususurutsa abitabiriye Rwanda Day i Ghent
Jali agorora ijwi mbere yo gususurutsa abitabiriye Rwanda Day

13:00: Andi mafoto y’abanyarwanda baturutse impande n’impande bageze kuri Flanders Expo ahari kubera Rwanda Day

Urubyiruko narwo ntirwatanzwe mu birori by'akataraboneka bya Rwanda Day
Akanyamuneza ni kose ku maso y'abitabiriye Rwanda Day 2017
Hari gusuzumwa ko uje muri Rwanda Day yanditse muri mudasobwa
Bamwe baje bambaye imyambaro igaragaza amabara y'ibendera ry'u Rwanda
Abanyarwanda baturutse imihanda yose bageze ahari bubere Rwanda Day 2017
Mbere yo kwinjira mu cyumba kiri buberemo uyu muhango, abawitabiriye bari kubanza guhabwa ikarita (Badge)
Abanyarwanda b'ingeri zitandukanye bitabiriye Rwanda Day bari buganiriremo na Perezida Kagame

12:40: Abantu bakomeje kwinjira ari benshi mu cyumba kiri buberemo iyi Rwanda Day. Hanze ku muryango hari umurongo munini w’abantu bari kwireba niba bari ku ilisiti hanyuma bakinjira. Ni mu gihe imbere mu cyumba imyiteguro nayo irimbanyije hari gucurangwa zimwe mu ndirimbo zizwi mu Rwanda.

Ku muryango abantu ni uruvunganzoka...
Abanyarwanda baturutse imihanda yose nibo bitabiriye uyu munsi udasanzwe
Icyumba kigiye kuberamo Rwanda Day ni uku giteguye
Abari ku buhanga bw'ibyuma bariteguye
Ambasaderi w'u Rwanda mu Buholandi, Jean Pierre Karabaranga, nawe yahageze

- Abanyarwanda baba muri Suède ubwo bageraga mu Mujyi wa Ghent

Bagiye baririmba ibyiza by'u Rwanda
Ibyishimo byari byose...
Ubwo bageraga mu Mujyi wa Ghent bavuye muri Suède

- Urwibutso rwa Rwanda Day

Uhereye ibumoso: Minisitiri w’Ubutabera akaba n’Intumwa Nkuru ya Leta, Johnston Busingye; Umugore wa Ambasaderi Olivier Nduhungirehe; Ambasaderi w’u Rwanda mu Bubiligi, Olivier Nduhungirehe; Umuyobozi Mukuru wa RDB, Clare Akamanzi; Minisitiri w’Ibikorwaremezo, James Musoni; Minisitiri w’Ubuzima, Dr Diane Gashumba; Minisitiri w’Ububanyi n’Amahanga, Louise Mushikiwabo; Umunyamabanga wa Leta muri MINECOFIN, Dr Uziel Ndagijimana na Minisitiri w’Urubyiruko n’Ikoranabuhanga, Jean Philbert Nsengimana
Bafashe selfie nk'urwibutso rwa Rwanda Day y'i Ghent
Depite Gatabazi JMV (wa kabiri uturutse iburyo) nawe yageze kuri Flanders Expo

- Abaturutse mu Mujyi wa Liège berekeza Ghent

Abanyarwanda batuye mu Mujyi wa Liège nabo bafashe imodoka berekeza kuri Flanders Expo ahagiye kubera Rwanda Day
Ibyishimo ni byose mu nzira berekeza Ghent

11:50: Abanyarwanda n’inshuti z’u Rwanda baturutse hirya no hino bakomeje kwinjira muri Flanders Expo ku bwinshi. Kwinjira biraba birangiye Saa saba z’amanywa ku isaha y’i Kigali ari nayo yo mu Mujyi wa Ghent.

Hanze y'inyubako iri kuberamo Rwanda Day hari imodoka nini nyinshi zaje zitwaye abanyarwanda baturutse hirya no hino
Imodoka ziri kwiyongera buri kanya zizanye abitabiriye uyu munsi

- Hagati aho igihe nk’iki umwaka ushize mu Mujyi wa San Francisco naho imyiteguro yari irimbanyije hategurwa ibyicaro…

Urubyiruko i San Francisco rwari rwabukereye
Urubyiruko rw'abanyarwanda umwaka ushize rwagize uruhare rukomeye mu migendekere myiza ya Rwanda Day yabereye i San Francisco
Umwaka ushize, Umuco Nyarwanda werekanwe i San Francisco

11:45: Ambasaderi w’u Rwanda mu Bubiligi, Amb. Nduhungirehe Olivier yabwiye IGIHE ko hari abanyarwanda bari hagati ya 3000 na 4000 bategerejwe kuzitabira uyu munsi. Ati “Abanyarwanda bafite ibyishimo byo kwakira Perezida wa Repubulika ngo bamugaragarize urukundo bamufitiye, bamugaragarize ibyishimo batewe no kwitwa Abanyarwanda no kuba yarabagaruriye ishema.”

11:30: U Bubiligi, Igihugu cyakiriye Rwanda Day gicumbikiye Abanyarwanda bagera ku 35 000. Harimo abanyeshuri bahiga bagaruka mu Rwanda, abahakorera igikorwa bibyara inyungu,…

11:00: Aba mbere bageze ku nzu mberabyombi ya Flanders Expo aho biteganyijwe ko abanyarwanda bagera ku bihumbi bine baza guhurira muri iki gikorwa cya Rwanda Day. Ubu bari ku mirongo binjiza.

Imodoka ziturutse i Bruxelles ubwo zageraga i Ghent
Berekeza kuri Flanders Expo kugira ngo binjire mu cyumba kiri buberemo Rwanda Day
Flanders Expo, inzu mberabyombi igiye kuberamo Rwanda Day yafunguwe mu 1987
Aba mbere batangiye kwinjira mu cyumba kiri buberemo Rwanda Day muri Flanders Expo

Reka twibukiranye uko imijyi yagiye igira umugisha wo kwakira uyu munsi. Byatangiriye:

-  Chicago ku ya 10 na 11 Kamena 2011
-  Paris ku ya 11 Nzeri 2011
-  Boston ku ya 28 na 29 Nzeri 2012
-  Londres ku ya 15 Gicurasi 2013
-  Toronto ku ya 20 Nzeri 2013
-  Atlanta ku ya 19 na 20 Gicurasi 2014
-  Amsterdam ku ya 3 Ukwakira 2015
-  San Francisco ku ya 24 Nzeri 2016
-  None hatahiwe Ghent/ Gand

- Abambere bageze i Ghent baturutse mu Mujyi wa Bruxelles, Liège ndetse no mu bindi bice birimo Paris n’ahandi.

Soma: Amasaha arasiganwa amasigamana…Inkwakuzi mu nzira zerekeza Ghent muri Rwanda Day

-  Hagati aho, Perezida Kagame yaherukaga mu Bubiligi mu Ukuboza 2010 aho yahuriye n’abanyarwanda batandukanye ariko mu gikorwa kitari Rwanda Day kuko yo yatangiye mu mwaka wakurikiyeho.

Perezida Kagame ubwo yahuraga n’abanyarwanda baba mu Bubiligi mu Ukuboza 2010

Perezida Kagame yabwiye abanyarwanda bari i Bruxelles “Abantu batiha agaciro ntibashobora gutera imbere; ibi mbabwira byigeze kubaho mu gihugu cyacu no ku mugabane wacu”
Wari umwanya mwiza wo kuganira ku mateka y’Igihugu, kureba aho kigeze no kureba uruhare rwa buri wese mu iterambere ryacyo

Izindi nkuru wasoma:

- Agakeregeshwa wasigarana kuri Rwanda Day

- Imiterere ya ‘Ghent’, Umujyi ugiye kwakira Rwanda Day ya mbere mu Bubiligi

- Akanyamuneza n’imbamutima muri Rwanda Day ziheruka (Amafoto)

Amafoto: Village Urugwiro, Jessica Rutayisire na Karirima A. Ngarambe - IGIHE / Ghent

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
Louis Rushema Mukeshumuremyi 2017-06-13 08:57:29

Rimwe mu magambo meza Nyakubahwa yavuze nanyuzwe naho agira ati : ’u Rwanda Rugali mujya
mwumva’ . Nanjye ndarurota

Rushema Bruxelles

2
AZ 2017-06-13 07:09:00

Erega Rwanda day yabayeho kuva cyera, no ku Mulindi wa Byumba yabagayo nuko mutabyibuka!!

3
john 2017-06-12 17:58:53

Nifuzaga ko ubutaha Intore TUYISENGE yazajya muri Rwanda day aho izabera hose

4
gahimano 2017-06-12 08:11:18

Iyo umuntu avuze ko arimo kwandika amateka MASHYA aba ashatse kuvuga iki? Iki ni ikibazo benshi mpamyako batibajiojeho ariko uwabasha gusengura yakwibaza byinshi.Mashya kuki? Ashaje ni ayahe? Ese amateka arasaza cg se ajya aba mashya? Hagire unsobanurira

5
uwamahoro 2017-06-12 05:19:34

Nanjye ndifuza kubageraho Nyakubahwa Perezida wacu dukunda ngo mbature akababaro kanjye kubera ingurane y’imitungo natsindiye muri Gacaca mu mwaka wa 2009 ingana na Miliyoni 135 na n’iyi saha nkaba maze guhabwa miliyoni eshanu gusa. Mudusabire Akarere ka Musanze katwishyurize kuko niho imitungo yari iherereye n’ababyeyi bacu niho biciwe. Imana ikomeze kubaha imigisha itagabanyije.

6
Kagabo 2017-06-11 18:06:28

Je ne peux pas m’exprimer sur cette article, kuko le Rwanda appartiennent aux Rwandais. Et non aux étrangers.

7
Adam 2017-06-11 15:39:56

Kagame!👠👠👠✊✊✊🙠🙠tuzumutora 100% master wacu. Yeeeessss.

8
Hakizimana Samuel 2017-06-11 13:45:08

H.E. Paul Kagame nukuri nabaho sindabona undi muyobozi nkawe uha umwanya abanyarwanda bari kw’isi hose ngo bamenye aho ugejeje Urwanda rwacu.imana ikomeze igushyigikire . inkoko niyongoma kuri 3

9
Merci H E 2017-06-11 06:13:11

Ibitekerezo bya Perezida birubaka kabisa. Kuko iyo utuye Buruseli, ni nkaho utuye i Kigali. Ushobora kurarira agatoki kavuye iwacu buri munsi...cyangwa ukarya akanyogwe gaturutse iwacu.... Muri make, mu Bubiligi niho hari daspora Nyarwanda nini ku Isi.
Mbese twabikoze nka aba Marocains? Tukemererwa kujya dutaha iwacu nta kwishisha. Tukahakora imishinga.
Muhumure! Jenoside yabaye muri 1994, abantu babonye isomo, nta yindi izongera. Twubake igihugu cyacu mu mahoro.
Mwahurira?

10
Situation 2017-06-11 01:56:40

iya San Francisco yari agahebuzo. Go USA

Paji: 1 | 2 | 3  

Kwamamaza