IGIHE

U Bufaransa: Umubyeyi we yitabye Imana adatashye u Rwanda rwibohoye, yihoza amarira ahashora imari

1 23-07-2019 - saa 13:08, Karirima A. Ngarambe

Uko politiki y’ishoramari mu Rwanda ireshya abanyamahanga kuhakorera, Abanyarwanda baba ibwotamasimbi bahagurukiye kubyaza inyungu ayo mahirwe akomeza iterambere ryarwo.

Mu kumenyekanisha ibikorwa by’Abanyarwanda batuye, bakorera mu Burayi, IGIHE yaganiriye n’umushoramari w’umunyarwanda utuye mu Bufaransa, witwa Nduwimana Lefebvre Marie Chantal, wiyemeje gukorana n’amahoteli, amahahiro agezweho n’utubari dukomeye mu Rwanda mu kubagezaho imivinyo na za Champagne zo mu Bufaransa.

Yashinze sosiyete y’ubucuruzi yise ‘La Bodega’ imaze imyaka icumi ifasha abakeneye kugerwaho n’imivinyo ariko ku isoko ry’u Rwanda ihamaze imyaka ine.

Uyu Munyarwandakazi wakuriye mu buhunzi mu Burundi kubera amateka u Rwanda rwaciyemwo mu myaka yashize, yatumye habaho abanyarwanda benshi bavukiye cyangwa bagakurira mu mahanga aho ababyeyi babo bari barahungiye kubera ivanguramoko ryari ryahawe intebe guhera mu 1959.

Nyina wa Nduwimana Lefebvre Marie Chantal yitabye Imana atageze mu Rwanda, ariko umukobwa we ubu anezezwa n’ubwisanzure ahafite mu ishoramari.

Yagize ati “Uno munsi ikintu numva kinshimishije ku mutima wanjye, mbese gishimishije n’umufasha wanjye w’Umufaransa, ni umunsi wa mbere namubwiye ko ngiye gukorera mu Rwanda kubera ko ari igihugu cyanjye, kubera ko umubyeyi wanjye yapfuye atakigezemo, nkaba mbona n’imikorere y’u Rwanda iduha ubushobozi, buri muntu akisanga mu gihugu cye.”

Ku ikubitiro, umuvinyo na Champagne bikunzwe cyane bizanwa n’iyi sosiyete, biboneka nko muri Kigali Marriott Hotel, muri za Simba Supermarkets, muri Pili Pili n’ahandi.

Nduwimana avuga ko nyuma yo kwiga isoko, yaganiriye n’abayobozi b’abo azanira imivinyo na Champagne, abasezeranya ko batazigera babura izo nzoga ku buryo n’uwakenera kontineri eshanu yazibona.

Asobanura ko kugira ngo abigereho kandi azane mu Rwanda ibicuruzwa byiza, akorana n’abahinzi i Burayi “akaba ari ikintu nitwararitse nk’umuyobozi wa ‘La Bodega’”.

Nk’umubyeyi washakanye n’Umufaransa, anezezwa no kubona abatuye mu Rwanda babasha kwicara bagasabanira ku mivinyo iryoshye kandi myiza ku buzima iyo uyifashe mu rugero rwiza.

Ati “Abafaransa baravuga ngo kunywa ibirahuri bibiri by’umuvinyo, ntubirenze bituma ugira ubuzima bwiza.”

Uretse i Kigali, Musanze na Rubavu, Nduwimana avuga ko ‘La Bodega’ yateye ijisho n’isoko ry’i Goma na Bukavu muri Repubulika Iharanira Demokarasi ya Congo, ku buryo naho bazajya bagezwaho imivinyo na champagne nziza zidatera umutwe uwazinyweye.

Raporo ya Banki y’Isi, ‘2019 World Bank Doing Business Report’, yashyize u Rwanda ku mwanya wa 29 ku Isi mu koroshya ubucuruzi, uwa kabiri muri Afurika n’uwa mbere mu karere.

Nduwimana Lefebvre Marie Chantal wiyemeje gukorana n’amahoteli, amahahiro agezweho n’utubari dukomeye mu Rwanda mu kubagezaho imivinyo na za Champagne zo mu Bufaransa
Mu kiganiro na IGIHE mu Burayi aho atuye mu rwego rwo kumenyekanisha ibikorwa by’abanyarwanda bashora imari mu Rwanda
Yashyize izina bwa mbere rya Kigali hagati y’indi mijyi ikomeye ku Isi ku binyobwa bya Champagne, mu rwego rwo kumenyekanisha u Rwanda
Ibumoso Nduwimana Lefebvre Marie Chantal amurika Chapagne mu Rwanda
Nduwimana Lefebvre Marie Chantal wiyemeje gukorana n’amahoteli, amahahiro agezweho n’utubari dukomeye mu Rwanda mu kubagezaho imivinyo na za champagne azivanye mu bahinzi ku isoko
Imwe mivinyo atumiza ya Rose
La bodega yo muri Kigali

Karirima A.Ngarambe

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rafiki 2019-07-23 22:40:50

Yewe nta kubohorwa kurabaho,Imana yonyine niyo izatubohora,ubuse abirirwa bacibwa imitwe imirambo igatoragurwa hirya no hino uko bi ukwibohora muvuga?ubwo ariko nizereko mubicurika kuko ni ingoyi100% kuko niba abenegihugu bicwa nk isazi abandi bakarushwa ijambo n abanyamahanga muri gakondo yabo nta kubahwa kurenze uku,iyi leta wagirango ni iy abakoroni nibo bakandamiza abaturage mu gihugu cyabo maze abanyamahanga bakisanzura ngo ni za bashoramari hah,ariko igihe kimwe nizera ntashidikanya ko Imana igiye kutubohora ,kugeza ubu nta prezida numwe wari wayobora bose barategeka kandi bategekana ubugome n ubutindi bwinshi bose ni interahamwe.

Kwamamaza