U Budage : Abanyarwanda batuye muri Rhine-Main bibutse Jenoside yakorewe Abatutsi

0 24-04-2017 - saa 13:17, Karirima Aimable Ngarambe

Abanyarwanda batuye mu gace ka Rhine-Main (Heidelberg-Mannheim-Mainz) bakoze igikorwa cyo kwibuka ku nshuro ya 23 Jenoside yakorewe Abatutsi, kuwa 22 Mata 2017.

Ambasaderi w’u Rwanda mu Budage, Igor César, yasabye Abanyarwanda guharanira ko Jenoside itazongera ukundi.

Yagize ati "Rwose jenoside ni ikintu kitari mu mico mu mateka y’u Rwanda ku buryo n’ubu twakiburiye izina ry’ikinyarwanda. Muzashyire imbere ubumuntu urwango rugeza ku mahano nk’aya ntiruzongere kubaho aho ariho hose ku Isi."

Yasabye ko Abanyarwanda batuye, bakorera cyangwa biga mu Budage gukomeza umuco wo kwibuka kuko ari imwe mu nzira yo kwerekana amahano yakozwe mu Rwanda kugira ngo atazongera kubaho n’ahandi ku Isi. Akomeza abasaba kuba bashyiraho uburyo bwo gushinga umuryango uzajya ubafasha gukora iki gikorwa cyo kwibuka nk’uko mu bindi bihugu havutse imiryango yigenga, atanga urugero nko kuri "Ibuka."

Mu bandi batanze ibiganiro harimo Murangira César uyobora Umuryango urengera inyungu z’abacitse ku icumu rya Jenoside yakorewe Abatutsi, Ibuka-Suisse. Iyi ni nayo iyoboye Ibuka-Europe ihuriwemo n’ibihugu bitanu by’u Burayi (U Bubiligi, u Buholandi, u Butaliyani, u Busuwisi n’u Bufaransa).

Yamaganye yivuye inyuma ingengabitekerezo ya Jenoside ikomeje kugaragara mu Rwanda nubwo Leta ikora ibishoboka byose ngo icike.

Mujawayo Ester, Umwanditsi w’ibitabo wacitse ku icumu rya Jenoside yakorewe Abatutsi utuye mu Budage, we yavuze ku mibereho y’abana bakomoka ku barokotse jenoside, ashishikariza ababyeyi kubafasha ntibatwarwe gusa n’amateka ya jenoside yakorewe imiryango yabo, ahubwo bagashyira cyane imbaraga mu kwiyubaka.

Valentin Rugina Hategekimana, Umunyamategeko ufite impamyabushobozi ihanitse mu mategeko mpuzamahanga arebana n’uburenganzira bwa muntu, yatanze ikiganiro kijyanye n’imyifatire ya Loni mu gihe cya Jenoside yakorewe Abatutsi, agaragaza intege nke yagaragaje.

Yagize ati "Umuryango w’Abibumbye wateshutse ku ntego zawo ntiwatabara Abatutsi bari mu kaga mu gihe cya Jenoside yabakorewe mu 1994."

Umudage ufite ubwenegihugu bw’u Rwanda wanabaye umuganga muri Kibuye, Wolfgang Blam, yatanze ikiganiro ku buryo bwo kwandika, gusiga amateka y’amahano yabaye muri Jenoside yakorewe Abatutsi, atanga inama ko bigomba gukorwa kandi bigakorwa neza.

Igikorwa cyo kwibuka cyanabayemo misa yayobowe na Padiri Kabanda Régis, basabira abazize Jenoside yakorewe Abatutsi.

Mu biganiro bamaganye ingengabitekerezo ya Jenoside ikigaragara
Bamwe mu Banyarwanda bitabiriye igikorwa cyo kwibuka muri Rhein-Main mu Budage
Padiri Kabanda Régis ayoboye misa yo gusabira abazize Jenoside yakorewe Abatutsi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza