IGIHE

U Bubiligi: Gusangiza abandi ibikomoka mu Rwanda, ni ukuba ba Ambasaderi b’igihugu cyacu

2 17-07-2019 - saa 16:10, Karirima A. Ngarambe

Muri iyi minsi iyo uganiriye na ba rwiyemezamirimo b’abanyarwanda, usanga mu mvugo yabo bashimangira ko ‘gukorera igihugu aho turi hose ku Isi twerekana iby’iwacu bahinga, beza, bakora muri gahunda ya Made in Rwanda, ari iby’agaciro, biduhesha ishema’.

Rwiyemezamirimo Kabagwira Delphine n’umugabo we Bizumuremyi Christian, batuye mu Majyaruguru y’u Bubiligi mu Mujyi wa Ostende uherereye hafi y’inyanja ya ruguru, biyemeje guhesha agaciro ibikorerwa mu Rwanda, bafungura iduka ry’ibiribwa byinshi byatunganyijwe.

Mu kumenyekanisha ibikorwa by’Abanyarwanda batuye, bakorera mu Burayi, IGIHE yasuye iri duka ry’ibiribwa by’umwimerere, isangamo ikawa iryoshye nyarwanda, yaba iseye ikomeye, iri mu rugero; icyayi cya Karongi kizwiho uburyohe; ifu y’ubugari ikomoka muri Nyamiyaga; amafu avanze y’igikoma meza ku buzima bw’abana n’abakuru, yaba ay’amasaka, ibigori, uburo; unahasanga ifu y’ubunyobwa n’ubuki.

Kabagwira agaragaza ko ibi bicuruzwa bidakundwa n’Abanyarwanda gusa n’abanyamahanga babikunda, bakamenya ibiryo nyarwanda.

Yagize ati “Hari ubwo ugera mu munsi mukuru ugasanga bateguye ibintu by’iwacu, nanjye byampaye ishyaka ryo kuba naba mu bantu bageza kuri benewacu ndetse no ku banyamahanga tubana nabo.”

Yakomeje avuga ko bafite intego yo kumenyekanisha hirya no hino mu Burayi ibi bicuruzwa, kandi abantu bose aho bari bashobora gutumiza byinshi bakabibagezaho.

Aba barwiyemezamirimo ntibategereza ko ibi biribwa bibasanga i Burayi, bambutse inyanja baza mu Rwanda, bakorana n’abahinzi.

Bizumuremyi Christian yasobanuye ko ibicuruzwa byinshi byitwa KABIZU, bituruka ku mpine y’amazina ye n’umugore.

Yasobanuye ko bafite kompanyi bise Kabizu Group ikorera mu Rwanda ifite inshingano zo gutunganya neza umusaruro w’ibihingwa, bigapfunyikwa neza kugira ngo bigere i Burayi bimeze neza.

Nyuma y’umwaka urenga bongerera agaciro ikawa, Bizumuremyi avuga ko bateye intambwe ikomeye ku cyayi.

Yagize ati “Twiguriye imashini ipfunyika, twe tukagura nk’abacuruzi bose bakigura Mombasa ariko twebwe akarusho tukacyisangira mu murima aho gihingwa.”

Iyi kompanyi yanageze ku bahinzi b’imyumbati, yita ku buryo itunganywa kuva ku byo yinikwamo.

Bizumuremyi yagize ati “Hari amakoperative menshi mu gihugu, adafite ubushobozi bwo kwigereza ibicuruzwa mu masoko cyangwa kuzuza ubuziranenge mu mikorere yabo.”

Kuri ubu, ubugari bwiza bwa Nyamiyaga buri mu bicuruzwa bikorerwa mu Rwanda, Kabizu igeza i Burayi.

Uretse mu Bubiligi iduka ryashinzwe, Kabagwira Delphine yizeza abakenera ibi bicuruzwa bya Kabizu ko babibagezaho aho baba baherereye hose i Burayi.

Ikiganiro muri vidéo:

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Jean Leonard Karuranga 2019-07-19 08:18:48

Coup de chapeau a Christian

2
Yego 2019-07-17 17:04:02

Ni byiza rwose,bene wacu mukomeze mutere imbere nshuti bana Bene Imana bene Gihanga.

Kwamamaza