IGIHE

Turikiya: Abanyarwanda n’inshuti zabo bizihije isabukuru y’imyaka 25 u Rwanda rubohowe

0 8-07-2019 - saa 18:40, Ndayikunda Josué

Abanyarwanda n’inshuti zabo baba muri Turikiya bahuriye mu birori byo kwizihiza isabukuru y’imyaka 25 u Rwanda rubohowe.

Ibi birori byabaye ku wa 4 Nyakanga 2019 mu murwa mukuru wa Turikiya, Istanbul, byitabirwa n’abagera kuri 210 bari biganjemo abanyarwanda n’inshuti zabo, abacuruzi b’abanya-Turikiya, bamwe mu bakora muri guverinoma ya Turikiya, ndetse n’abanyeshuri b’abanyarwanda biga muri iki gihugu.

Ambasaderi w’u Rwanda muri Turikiya, Williams Nkurunziza, yabwiye abari bitabiriye ibi birori byabereye muri Hotel ya Hilton Maslak ko itariki y’umunsi wo kwibohora irenze kuba amateka ku banyarwanda bose.

Yagize ati “Ni ibihe by’ingezi n’ikimenyetso cyo kurwanya akarengane, ingengabitekerezo ya Jenoside. Ni imbaraga mu kurinda icyubahiro cy’u Rwanda”.

Ambasaderi Nkurunziza yakomeje asobanurira abari bitabiriye ibi birori impamvu u Rwanda rwizihiza umunsi wo kwibohora, maze ababwira uko Jenoside yakozwe ingabo za FPR Inkotanyi zari ziyobowe na Perezida Kagame zikayihagarika.

Yagize ati “Mu 1994 ishuheri y’ubusazi yateye mu Rwanda ituma abarenga miliyoni bicwa muri Jenoside yakorewe abatutsi. Ku itariki ya 4 Nyakanga 1994, ingabo za FPR zari ziyobowe na Perezida Paul Kagame zahagaritse jenoside”.

Uretse kuba wari umugoroba wo kwizihiza isabukuru y’imyaka 25 u Rwanda rwibohoye, ibi birori byahuriranye n’inama y’ubucuruzi yahaye urubuga abashoramari b’abanya-Turikiya kuvuga imyato u Rwanda, banashishikariza bagenzi babo gushora imari mu Rwanda.

Hakan Karasoy ufite ikigo cya HQ Power gitanga megawati 80 z’amashanyarazi aturuka ku zuba mu Ntara y’Amajyepfo, yasobanuye impamvu yamuteye gushora imari ye mu Rwanda, avuga ko u Rwanda ruteye amabengeza.

Yashishikarije bagenzi be gushora imari yabo mu Rwanda bishingiye ku buyobozi bwiza bw’u Rwanda n’amahirwe menshi yo gukora ubucuruzi ahari.

Ambasaderi Nkurunziza yagaragarije abari bitabiriye inama y’ubucuruzi yahuriranye n’umunsi wo kwizihiza imyaka 25 u Rwanda rwibohoye amahirwe ari mu Rwanda, kubifuza kuhashora imari ndetse no kuhakorera ubucuruzi.

Umuyobozi waza ambazade muri Turikiya, Abdurrazaq Mouktar, wari umushyitsi mukuru yashimiye guverinoma y’ u Rwanda umunsi wo kwibohora, anashimira intabwe rumaze kugeraho mu bukungu bwarwo nyuma y’imyaka 25 habaye genocide yakorwe abatutsi mu 1994.

Amasaderi Nkurunziza yavuze ko nubwo inzira ikiri ndende, kugeza ubu u Rwanda rushikamye, rwunze ubumwe, rwuje amahoro n’umutekano ndetse rwuje ijabo.

Ibi birori byasusurukijwe n’itorero ribyina imbyino za gakondo rigizwe n’abanyeshuri b’abanyarwanda biga muri Turikiya.

Ambasaderi Nkurunziza n'abandi bayobozi ubwo bari mu birori byo kwibohora
Ambasaderi Nkurunziza arimo kuganira n'abacuruzi n'abashoramari batandukanye
Abanyarwanda n'inshuti zabo bishimira umunsi wo kwibohora
Ifoto y'urwibutso nyuma y'ibiganiro
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza