IGIHE

Nta Munyarwanda uhaha ngo arire aho yahahiye- Impanuro za Dr Sezibera ku baba mu Misiri

1 6-06-2019 - saa 13:21, IGIHE

Minisitiri w’Ububanyi n’Amahanga w’u Rwanda, Dr Richard Sezibera, yahanuye Abanyarwanda baba mu Misiri ku myitwarire ikwiye kubaranga aho baherereye mu mahanga, anabibutsa inshingano bafite zo kubaka igihugu cyabibarutse.

Ni ubutumwa yatanze ku wa 5 Kamena 2019, ubwo yasozaga uruzinduko yagiriye mu Misiri rugamije kunoza umubano hagati y’u Rwanda na Misiri.

Ibi biganiro byabereye mu Mujyi wa Cairo byahuje Abanyarwanda barenga 80 barimo abari mu mahugurwa y’igihe gito n’abandi batuye mu Misiri.

Minisitiri Dr Sezibera yabahaye ubutumwa bukubiye mu ngingo eshatu z’ingenzi, ziganisha ku kubaka u Rwanda rushingiye ku musingi udadiye.

Aba Banyarwanda agereranya n’abatuye ‘mu Rwanda rwa Cairo’, yabasabye kurangwa n’imyitwarire n’indangagaciro z’umuco nyarwanda.

Yavuze ati “Hari ibyo mukora n’ibindi mutemerewe nk’Abanyarwanda. Mutuye hanze y’u Rwanda ariko ntimwaruhunze. Nyuma ya 1994, nta Munyarwanda uzongera kubunza imitima yibaza uko azataha mu gihugu cye.’’

Yagize ati “Abanyarwanda aho bagiye guhahira, baba bagiye guhahira umuryango. Hari abandi bajya guhaha, ibyo bahashye bakabirira aho babihahiye bakabirangiza. Ibyo mwaje guhaha, byaba ari ubumenyi cyangwa umutungo mugomba kubisubiza mu Rwanda mukajya kurwubaka.’’

Yakomeje abasaba gukoresha ubumenyi n’ubushobozi babonye mu kubaka igihugu aho kukiganisha ahabi.

Ati “Ibyo mwaje guhaha, muramenye ntibizabe intandaro yo guhungabanya umutekano w’u Rwanda.’’

Mu mpanuro ze, yagaragaje ko umutekano w’igihugu ushingira ku bumwe bw’Abanyarwanda, umuco wabo n’ibindi bityo uwo mudahuje idini iyo ushatse kumuhutaza muba mwahungabanyije ubumwe bw’Abanyarwanda.

Yagize ati “Muramenye ntimuzahahe uwo muco uhungabanya umutekano w’Abanyarwanda. Muramenye muzirinde indi mico, usanga yimakaza urupfu. Ubwo twimakazaga urupfu, Abatutsi basaga miliyoni bahaburiye ubuzima.’’

Minisitiri Dr Richard Sezibera yahanuye Abanyarwanda baba mu Misiri ko mu muco nta Munyarwanda uhaha ngo arire ku isoko, ahubwo asangira amafunguro n'umuryango we

Dr Sezibera yageze i Cairo ku wa 4 Kamena 2019 yakirwa na Minisitiri w’Ububanyi n’Amahanga wa Misiri, Sameh Shoukry, bagirana ibiganiro bigamije kunoza umubano w’ibihugu byombi.

Yanaganiriye kandi na Minisitiri w’Ingabo wa Misiri Gen. Mohamed Zaki n’Umuyobozi w’Inteko Ishinga Amategeko ya Misiri, Dr. Ali Abdel -Aal Sayed Ahmed [Utegerejwe mu Rwanda mu minsi ya vuba.]

Uyu muyobozi wari utwaye intashyo za Perezida Kagame, yanaganiriye n’abakozi ba Ambasade y’u Rwanda mu Misiri.

Mu butumwa bwe, yabasabye kunoza imikorere igamije kugaragaza isura nziza y’u Rwanda no guharanira inyungu zarwo. Yabasabye kandi kujya bahanahana amakuru hagati yabo ndetse na Minisiteri ibafite mu nshingano.

Yagize ati ‘‘Nta murimo ukwiye kuba umwihariko w’umwe ku buryo iyo adahari akazi gahagarara. Hagomba no kubaho uburyo buhoraho hagati ya Ambasade, mukamenyekanisha ibyo mukora n’ibikorerwa i Kigali. Ubuke bw’abakozi ntibukwiye kudindiza umurimo.’’

Yababwiye ko bakwiye guhanga udushya mu byo bakora bityo umuntu umwe agakora ibirenze ibyo asabwa kuko aribyo bigaragaza imbaraga z’u Rwanda mu kugera kuri byinshi hakoreshejwe ubushobozi buke.’

Muri gahunda ye, Dr Sezibera yanaganiriye n’abashoramari bo mu Misiri, abasangiza amahirwe abategereje mu Rwanda.

Ku munsi we wa nyuma w’uruzinduko, Dr Sezibera yahuye n’Abanyarwanda baba mu Mijyi ya Cairo na Alexandria mu Misiri, banasangira ibyishimo ku munsi w’ibirori wa Eid el-Fitr.

Mu butumwa yanyujije ku rukuta rwe rwa Twitter, Dr Sezibera yashimye urugwiro bamweretse muri ibyo birori bamutunguriyemo, bakamwifuriza isabukuru y’amavuko, yizihiza ku wa 5 Kamena.

Yagize ati “Nishimiye kwizihizanya Eid n’Abanyarwanda baba i Cairo! Mwakoze cyane.’’

Umubano w’u Rwanda na Misiri umaze gushinga imizi

Umubano wa Misiri n’u Rwanda watangiye mu myaka yo hambere ubwo u Rwanda rwafunguraga Ambasade yarwo i Cairo n’iki gihugu cyo mu Majyaruguru y’Uburasirazuba bwa Afurika kigafungura iyacyo mu Rwanda nyuma gato yaho ruboneye ubwigenge.

Ambasade y’u Rwanda mu Misiri yaje gufungwa gusa nyuma iza kongera gufungurwa mu 2015, Ambasaderi Sheikh Habimana Saleh wahoze ari Mufti w’u Rwanda aba ariwe wa mbere uyiyobora.

U Rwanda na Misiri bifatanya mu nzego eshatu zirimo ubucuruzi, uburezi ndetse n’ubuzima ari nazo ibihugu byombi biri gushyiramo imbaraga ngo binoze ubufatanye bubyarira inyungu ababituye.

Mu rwego rw’uburezi hari abanyeshuri b’abanyarwanda biga mu Misiri aho bajyayo mu rwego rw’idini ya Islam, mu rwego rwa leta n’abasaba bakiyishyurira amashuri yabo.

Kugeza ubu, abanyeshuri 63 nibo biga mu Misiri barimo 51 biga muri Kaminuza ya Al-Azhar ku bufatanye bw’iri shuri n’Umuryango w’Abayisilamu mu Rwanda, barindwi biyishyurira muri Kaminuza ya Alexandria, babiri biga muri Kaminuza ya Cairo, babiri boherejwe n’ibitaro bya Kanombe nabo biga muri Kaminuza ya Cairo n’umwe wiga muri British University i Cairo.

Abanyarwanda baba mu Misiri basabwe gukoresha ubumenyi n'ubushobozi mu kubaka igihugu cyabo
Minisitiri w'Ububanyi n'Amahanga, Dr Sezibera Richard, yasangiye Eid el-Fitr n'Abanyarwanda baba mu Misiri
Minisitiri Dr Sezibera Richard yagiriye urugendo mu Misiri nyuma y'urwo Perezida Kagame aheruka kuhakorera mu minsi yashize
Minisitiri Dr Sezibera yasabye Abanyarwanda guhora baharanira icyateza imbere u Rwanda, kikanaruhesha isura nziza
Ambasaderi w'u Rwanda mu Misiri, Sheikh Saleh Habimana, ageza ubutumwa ku bitabiriye uyu muhango
Iri sangira ryitabiriwe n'Abanyarwanda bagera kuri 87 barimo abari mu mahugurwa y'igihe gito n'ababa mu Misiri
Minisitiri Dr Sezibera yagiranye urugwiro n'abana bato bitabiriye iri sangira
Abanyarwanda bahawe umwanya, batanga ibitekerezo bitandukanye biganisha ku iterambere ry'igihugu cyabo
Abanyarwandakazi baba mu Misiri baserutse mu mwambaro uranga Abayisilamukazi
Umujyanama muri Ambasade y'u Rwanda mu Misiri, Eric Kayoge, ageza ijambo ku bari bitabiriye uyu mugoroba
Haguma, Umujyanama wa Minisitiri w'Ububanyi n'Amahanga, Dr Sezibera, akurikiye ibiganiro

Minisitiri Dr Sezibera yatunguwe yifurizwa isabukuru y’amavuko

Dr Sezibera yatunguwe yifurizwa isabukuru y'amavuko yizihiza ku wa 5 Kamena 2019
Umutsima wari wateganyirijwe Minisitiri w'Ububanyi n'Amahanga, Dr Sezibera Richard
Nyuma y'impanuro za Minisitiri w'Ububanyi n'Amahanga, Dr Sezibera Richard, bafashe ifoto y'urwibutso
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nshimiyimana Abdoul Aziz 2019-06-06 08:25:49

Byari iby’agaciro rwose gusangira na Honourable minister Imana ikomeze iturindire abayobozi b’igihugu cyacu barangajwe imbere na H.E Paul Kagame

Kwamamaza