IGIHE

Amb. Karabaranga yakomoje ku kwiyubaka k’u Rwanda nyuma ya Jenoside yakorewe Abatutsi

0 16-05-2019 - saa 13:44, Karirima A. Ngarambe

Ambasaderi w’u Rwanda mu Buholandi, Karabaranga Jean Pierre, yasangije urubyiruko amateka ya Jenoside yakorewe Abatutsi, agaruka ku buryo u Rwanda rwahanganye n’ingaruka zayo mu rugamba rw’iterambere.

Ni ubutumwa yahaye abanyeshuri biga mu Ishami ry’Imibanire Mpuzamahanga muri Kaminuza ya Amsterdam mu Buholandi, mu kiganiro yahatangiye ku wa 15 Gicurasi 2019.

Iki kiganiro kiri mu rwego rw’ibyo Ambasade y’u Rwanda itanga muri kaminuza zitandukanye mu Buholandi, mu gihe cy’iminsi 100 yo kwibuka Jenoside yakorewe Abatutsi.

Ambasaderi Karabaranga yasobanuye amateka ya Jenoside yakorewe Abatutsi, yakoranywe ubugome bw’indengakamere nyuma y’igihe kirekire itegurwa.

Yaganirije abanyeshuri ku mibereho y’abatuye u Rwanda mbere ya Jenoside, mu gihe yabaga na nyuma yo guhagarikwa n’Ingabo za FPR Inkotanyi.

Yagize ati “Mu 1994, Jenoside yari umusozo w’umugambi mubisha w’igihe kirekire, ntabwo abantu babyutse umunsi umwe ngo bice abaturanyi n’inshuti ku musozi. Iyi Jenoside yakorewe Abatutsi yabaye mu buryo hishwe benshi mu gihe gito mu buryo bwihuse bitandukanye n’izabaye ahandi ku Isi.’’

Yagaragaje uko itangazamakuru ryatije umurindi Jenoside binyuze mu kubiba amacakubiri n’urwango rukabije, ku isonga hari ibyatangazwaga binyuze muri Kangura na RTLM.

Yakomeje ati “U Rwanda ni igihugu muri iyo myaka icyavugwaga ku maradiyo cyafatwaga nk’ihame kuko wari umuyoboro w’itangazabikorwa n’amakuru uhurirwaho n’Abanyarwanda benshi.’’

Icengezamatwara ry’itangazamakuru, ryanashyigikirwaga n’ubutegetsi bubi bwahemberaga amacakubiri na politiki zivangura.

Ambasaderi Karabaranga yavuze ko abakoraga ubwicanyi batahanwaga ahubwo bagororerwaga ndetse amahanga arebera Jenoside kugeza ihitanye inzirakarengane zirenga miliyoni.

Yagize ati “Mu gihe cy’imyaka ibarirwa muri 30, leta yashyigikiye umugambi wa Jenoside ndetse abayobozi bakabihemberwa. Nk’urugero, Burugumesitiri wateguraga neza cyane ubwicanyi yazamurwaga mu ntera, akagirwa nka Perefe cyangwa umudepite; Perefe we yagirwaga Minisitiri cyangwa Depite.”

Yatanze urugero aho Sindikubwabo Théodore yagizwe Depite, anaba no muri Komite nyobozi y’Ishyaka ryari ku butegetsi rya MRND ku rwego rw’igihugu mu myaka ya 1970- 1980. Uyu yaje kuba Perezida w’inzibacyuho, Habyarimana Juvénal amaze gupfa.

Karabaranga yibukije ko amacakubiri yabibwe mu Banyarwanda n’abakoloni b’Ababiligi, by’umwihariko kuva mu 1932 ubwo bashyiragaho itegeko ko ubwoko bwandikwa mu ndangamantu.

Yahamagariye urubyiruko n’abandi kubwira Isi amateka ya Jenoside yakorewe Abatutsi ngo ntizongere ukundi.

Ati “Ku bitwerekeye nk’u Rwanda ntitwabyemera, ubu twabitangiriye mu kubungabunga amahoro aho bishoboka hose twohereza ingabo na polisi mu bihugu bitandukanye mu bikorwa by’amahoro.’’

Nyuma y’imyaka 25 ishize, Jenoside ihagaritswe haracyari abayipfobya n’abayihakana bakomeje kugerageza guhisha ukuri bagamije koroshya uruhare abayikoze bayigizemo.

Yavuze ko “Igishimishije nyuma y’iyo myaka ishize u Rwanda ruvuye mu mateka mabi ni uko rwongeye kwiyubaka. Ubu ni igihugu gifite umuvuduko mu iterambere ry’ubukungu, aho umusaruro mbumbe w’igihugu (GDP) ugera nibura ku 8%.’’

Kuva mu 1994, umubare w’abari mu bukene waragabanutse uva kuri 70%, ugera kuri 39.1% mu 2014, mu gihe intego ari ukubugabanya kugera kuri 20% mu 2020.

Ubukene bukabije bwo bwavuye kuri 40% mu 2000 bugera kuri 16.3%, intego ikaba ari ukuburandura burundu (0%) bitarenze 2020.

Ambasaderi w’u Rwanda mu Buholandi, Karabaranga Jean Pierre, yasangije urubyiruko amateka ya Jenoside yakorewe Abatutsi
Ambasaderi Karabaranga yakomoje ku kwiyubaka k’u Rwanda nyuma ya Jenoside yakorewe Abatutsi mu 1994
Abanyeshuri biga mu Ishami ry’Imibanire Mpuzamahanga muri Kaminuza ya Amsterdam mu Buholandi baganirijwe ku mateka ya Jenoside yakorewe Abatutsi

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza