IGIHE

Amb. Karabaranga yahamije ko u Rwanda rwazutse muri Nyakanga 1994

0 22-07-2019 - saa 08:21, Karirima A. Ngarambe

Ambasaderi w’u Rwanda mu Buholandi, Jean Pierre Karabaranga, yahamije ko umunsi mukuru wo Kwibohora k’u Rwanda ari umunsi ukomeye mu mateka y’Abanyarwanda kuko aribwo igihugu cyabo cyazutse.

Ubu butumwa yabutanze ku wa 20 Nyakanga ubwo Abanyarwanda n’inshuti z’u Rwanda batuye mu Buholandi bizihizaga ibiro umuby’Umunsi wo Kwibohora ku nshuro ya 25.

Amb. Karabaranga yavuze ko itariki ya 4 Nyakanga, ari “Umunsi u Rwanda rwazutse, rutangira urugendo nyarwo rw’ubwigenge.”

Yakomeje agira ati “Mu mateka yacu ni umunsi ukomeye kubera ko ari umunsi igihugu cyacu cyongeye kubona umucyo nyuma y’amezi atatu y’icuraburindi ryagwiriye u Rwanda ubwo Jenoside yakorewe Abatutsi yarimburaaga abarenga miliyoni.”

Yibukije ko Ingabo za RPF zari zirangajwe imbere na Perezida Paul Kagame ari zo zanditse ayo mateka akomeye ku Isi, zihagarika Jenoside yakozwe amahanga arebera.

Ku rugamba rwo kubohora igihugu, Ambasaderi yibukije ko rwariho Abanyarwanda b’ingeri zose ndetse bamwe bahatakariza ubuzima, bakaba bagomba guhora bibukwa.

Izo ntwari zatumye abari barahejejwe ishyanga bahunguka, babona uburenganzira ku gihugu cyabo; imiryango yongera kubonana; n’ivangura rirahagarikwa.

Amb. Karabaranga yishimiye ko ubu u Rwanda rutekanye, rufite ubuyobozi bwiza n’abaturage bunze ubumwe, ntawe uhejwe, bose barangamiye gukomeza urugamba rw’iterambere nyuma y’urw’amasasu.

Ndabarasa Claude uyobora Diaspora nyarwanda mu Buholandi, yavuze ko Abanyarwanda bagomba gusigasira ibyagezweho bivuye mu cyuya abakurambere babize, nabo bagatanga umusanzu wabo, yaba abari imbere mu gihugu cyangwa mu mahanga.

Yagize ati “Kwibohora ni urugamba Inkotanyi zarwanye kubera indangagaciro twese duhuriyeho zirimo uburinganire, kurwanya ubujiji, ubupfura no guha buri wese agaciro akwiye. Uru rugamba tugomba kururangiza, kandi iki nicyo gihe.”

Yibukije ko Diaspora ifite uruhare runini mu iterambere ry’u Rwanda, igira uruhare mu koherereza ibintu inshuti n’imiryango, mu gukora ishoramari, no kugira uruhare mu gutanga amakuru ku masoko mpuzamahanga, banashaka abakiriya b’ibikorerwa mu Rwanda (Made in Rwanda).

Umuhanzi Kitoko na DJ Flora nibo basusurikije imbaga y’abari ibitabiriye uwo munsi.

Ibirori by’umunsi wo Kwibohora byizihijwe ku nshuro ya 25 ku wa 4 Nyakanga, ariko Abanyarwanda mu bihugu bitandukanye bagiye bategura gahunda zo kuwizihiza ku buryo bw’umwihariko.

Amb. Karabaranga yavuze ko u Rwanda rwazutse muri Nyakanga 1994
Claude Ndabarasa, uyobora Diaspora nyarwanda mu Buhorande ubwo yagezaga ijambo ry'uwo munsi ku bari aho
DJ Flora wari ku buhanga bw'ibyuma avanga imiziki
Umuhanzi Kitoko yaririmbiye abaje mu birori byo kwibohora25 mu Buholandi
Pulcherie Nyinawase (ibumoso) wari uhagarariye Rwandair atanga itike y'indege ku wayitomboye uzasura u Rwanda

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza