IGIHE

Amb. Habimana yakomoje ku isano yo kwibohora ku Rwanda no kwigira kwa Afurika (Amafoto)

1 12-07-2019 - saa 07:34, IGIHE

Abanyarwanda baba mu Misiri bifatanyije n’inshuti z’igihugu kwizihiza isabukuru y’imyaka 25 ishize u Rwanda rubohowe mu maboko y’ubutegetsi bubi bwaryanishije abaturage kugeza kuri Jenoside yakorewe Abatutsi mu 1994.

Ibi birori byabereye muri Conrad mu Mujyi wa Cairo mu Misiri ku wa 10 Nyakanga 2019. Byitabiriwe n’abagera kuri 320 barimo abambassaderi 90 baturuka hirya no hino ku Isi biganjemo abo muri Afurika.

Ambasaderi w’u Rwanda mu Misiri, Sheikh Habimana Saleh, mu ijambo rye yagarutse ku mpamvu zatumye habaho urugamba rwo kwibohora.

Yashimye Ingabo za RPA zahoze ari iza FPR Inkotanyi zitangiye gutangiza urugamba rwo kubohora igihugu zigahagarika Jenoside yakorerwaga Abatutsi, yahitanye inzirakarengane zisaga miliyoni mu minsi 100.

Ambasaderi Habimana yashimye abitabiriye ibi birori avuga ko byagaragaje ko Afurika ihagaze hamwe, ishikamye kandi isangiye ibyishimo n’inzira y’iterambere.

Yagize ati “U Rwanda rwishimira isano iri hagati y’urugendo rwacu rwo kwibohora na gahunda yagutse yo kwigira kwa Afurika. Dusangiye intego zimwe zo kwigenga no kwiteza imbere bifatika.’’

Yakomeje ati “Umugabane wacu ntuzakomeza gutegera amaboko ku biba ahandi. Imitekerereze yacu igomba kuba kwiyitaho ubwacu hanyuma abaterankunga bakaba abafatanyabikorwa bakomeye. Ni ingenzi kuvuga ko kuba Umunyarwanda bisobanura kuba Umunyafurika w’ahantu hihariye, dufatanyije twagera kuri byinshi.’’

Afurika yatangiye kwiharurira inzira zayo ndetse ku wa 7 Nyakanga 2019, Inama y’Umuryango wa Afurika Yunze Ubumwe, AU, yabereye i Niamey muri Niger yemerejwemo ko gutangira gucururiza ku isoko rusange rya Afurika, AfCFTA, bizatangirana na Nyakanga 2020.

Ni umwanzuro ugamije guha ibihugu umwanya wo gutegura abaturage babyo kuri iri soko rishya no kugira ngo hanozwe amategeko n’amabwiriza azaba arigenga.

Ni isoko ryitezweho kuzamura ubucuruzi hagati y’ibihugu bya Afurika ku gipimo cya 53% kugeza mu 2022, hakavanwaho imisoro itari ngombwa ku buryo byarema isoko rusange rihuriza hamwe abaturage miliyari 1.2 bagize uyu mugabane, rifite umusaruro mbumbe wa miliyari 2500 $.

Tariki ya 4 Nyakanga niyo yizihizwaho isabukuru yo kwibohora k’u Rwanda, ahazirikanwa intangiriro y’ubuzima bushya nyuma yo gushyira iherezo ku ngoma y’igitugu yahezaga igice kimwe cy’Abanyarwanda.

Ambasaderi Habimana yashimangiye ko kwizihiza isabukuru y’imyaka 25 byabaye ingenzi cyane kuko ari “iby’agaciro gakomeye kwishimana n’inshuti n’abavandimwe.’’

“Turishimira ubwitange bw’izari ingabo za RPA. Urugamba rwo kwibohora si ukugarura akashize ahubwo ni ukurema ikintu gishya kubereye Abanyarwanda bose, intambara yari ngombwa kandi itagomba gusubira inyuma.’’

Ibihe u Rwanda rwanyuzemo byatumye ruha agaciro cyane ubutumwa bwo kubungabunga amahoro ku Isi aho kuri ubu ruza ku mwanya wa kabiri mu bihugu bifite ingabo zoherejwe mu butumwa bwo kubungabunga amahoro ku Isi barenga 4000.

Mu myaka 25 ishize kandi u Rwanda rwariyubatse mu nzego zose kuko Jenoside yasize izishegeshe ahantu hose. Ni iterambere ryagezweho binyuze mu mbaraga z’Abanyarwanda zo gukorera hamwe hagamijwe guhindura igihugu.

Ambasaderi Habimana yavuze ko “Ibitarashobokaga byarashobotse, biba ibisanzwe.’’

U Rwanda ubu ruza mu bihugu bya mbere ku Isi mu kugira umubare munini w’abagore bari mu myanya y’ubuyobozi, aho mu Nteko Ishinga amategeko abagore ari hafi 62%, mu gihe muri Guverinoma ari 50%.

U Rwanda kandi ruza ku mwanya wa kane ku Isi mu bihugu bibereye guturwamo n’umugore, nk’uko biheruka kugarukwaho muri Global Competitive Report.

Umuyobozi wungirije muri Minisiteri y’Ububanyi n’Amahanga mu Misiri, Ambasaderi Abubakri El Hifny, yashimye ukwiyubaka k’u Rwanda nyuma ya Jenoside yakorewe Abatutsi.

Yanashimiye Perezida Kagame waharaniye impinduka muri Afurika. Yagize ati “Nkuko Kagame yabivuze Afurika ntikwiye gutegereza ibikorerwa ahandi. Birakwiye ko Abanyafurika bisungana mbere ya byose bakiteza imbere.’’

Yanakomoje ku murage Perezida Kagame wayoboye Umuryango wa Afurika Yunze Ubumwe (AU) mu 2018 yasigiye mugenzi we wa Misiri, Abdel Fattah as Sisi avuga ko ari impamba yo kwitwaza.

Ambasaderi wa Malawi mu Misiri, Caroline, yashimye uko u Rwanda rukomeje kwaguka, anasaba ko ubumwe bwakomeza kwimakazwa muri Afurika yose.

Yagize ati “Wakoze cyane nyakubahwa ku gikorwa cyari giteguye neza . Wakoze kudufasha ijoro ry’ubusabane bwa Kinyafurika ryuzuyemo ibyishimo n’umunezero. Byampaye urwibutso mu buzima bwanjye.”

Mu bindi bikorwa byahuriranye n’ibirori byo kwibohora birimo amarushanwa yateguwe na Ambasade y’u Rwanda mu Misiri yiswe KWIBOHORA25 KAGAME CUP 2019.

Muri iyi mikino igikombe cyatwawe na Rwanda A, umwanya wa kabiri ufatwa na Sudani mu gihe uwa gatatu wabaye uwa Repubulika Iharanira Demokarasi ya Congo.

Abitabiriye ibirori by’umunsi wo kwibohora babisoje mu gitaramo cyagutse aho abarimo n’abanyacyubahiro bose bacinye akadiho mu kwishimira ibyo u Rwanda rumaze kugeraho.

Abanyarwanda baba mu Misiri bifatanyije n’inshuti z’igihugu kwizihiza isabukuru y’imyaka 25 ishize u Rwanda rubohowe
Ambasaderi w'u Rwanda mu Misiri, Sheikh Habimana Saleh, yagaragaje isano yo kwibohora ku Rwanda no kwigira kwa Afurika
Wari umwanya w'umunezero ku bitabiriye ibi birori
Abahanzi batandukanye basusurukije abitabiriye ibirori by'umunsi wo kwibohora
Amakipe yitwaye neza mu irushanwa yahembwe
Amakipe y'ibihugu bitatu birimo u Rwanda, Repubulika Iharanira Demokarasi ya Congo na Sudani yahuriye mu irushanwa ryiswe KWIBOHORA25 KAGAME CUP 2019
Bafashe umwanya wo gucinya akadiho bishimira intambwe u Rwanda rumaze kugeraho
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kay 2019-07-12 08:29:37

Nyakubahwa Ambassador uzaze udusimburire prf shyaka kuko rwose ntamusaruro wowe mbona wabishobora

Kwamamaza