Abanyarwanda bagera ku 4000 bategerejwe kuri ‘Flanders Expo’, ahagiye kubera Rwanda Day

4 9-06-2017 - saa 19:20, Karirima A. Ngarambe, Rabbi Malo Umucunguzi

Wa munsi wageze, aho kuri uyu wa Gatandatu tariki ya 10 Kamena 2017, Abanyarwanda n’inshuti z’u Rwanda bazava mu Rwanda, mu Bubiligi, mu Busuwisi, mu Butaliyani, mu Budage, mu Buholandi, mu Bufaransa, mu Burusiya n’izindi mfuruka z’Isi, bazakoranira mu mujyi wa Ghent kuri Flanders Expo.

Ni umunsi udasanzwe kuko bibaye ubwa mbere mu mateka iki gihugu gituwe n’Abanyarwanda bagera ku bihumbi 35 cyakira Rwanda Day, kuko Perezida Kagame aheruka guhurira n’Abanyarwanda mu Bubiligi ku wa 4 Ukuboza 2010, ariko icyo gihe Rwanda Day ntiyari yagatangijwe kuko yatangiye mu mwaka wakurikiyeho mu Mujyi wa Chicago muri Leta Zunze Ubumwe za Amerika.

Ambasaderi w’u Rwanda mu Bubiligi, Amb. Nduhungirehe Olivier yabwiye IGIHE ko hari abanyarwanda bari hagati ya 3000 na 4000 bategerejwe kuzitabira uyu munsi.

Yakomeje agira ati “Abanyarwanda bafite ibyishimo byo kwakira Perezida wa Repubulika ngo bamugaragarize urukundo bamufitiye, bamugaragarize ibyishimo batewe no kwitwa Abanyarwanda no kuba yarabagaruriye ishema.”

Amb. Nduhungirehe yasabye abazitabira Rwanda Day kuba bageze kuri Flanders Expo saa tanu za mu gitondo kuko nibwo ibikorwa byo kwinjira aho igikorwa kizabera bizatangira birangire saa saba.

Yakomeje agira ati “Kwakira Umukuru w’Igihugu bitera ishema birumvikana, yaje kwitabira inama yiga ku iterambere ry’u Burayi, ariko akaba yaranifuje guhura n’Abanyarwanda mu rwego rwa Rwanda Day ngo abasuhuze, baganire, bungurane ibitekerezo ku byerekeye ibibazo bya Diaspora, uruhare rwa Diaspora mu guteza imbere igihugu n’izindi ngingo baba bifuza kuganiraho.”

Kuri uyu munsi kandi, mu bahanzi bafite ubuhanga bwihariye batumiwe kugira ngo bazasusurutse ibirori harimo King James na Diana Teta baturutse mu Rwanda; hari kandi umuhanzi umaze kubaka izina mu Bubiligi Mucumbitsi Ntwari Jean Pierre [Jali].

Muri Rwanda Day y’uyu mwaka hanatumiwemo abahanzi bakorera umuziki i Burayi ariko bakomoka mu Rwanda barimo uwitwa Inki [wazamukiye mu itsinda Zions Youth] n’undi witwa Soul T.

Diana Teta na King James bamaze kwerekeza mu Bubiligi ndetse biteguye kuririmba muri ibi birori, aho Perezida Kagame azahura n’Abanyarwanda baba mu gihugu no mu mahanga kimwe n’inshuti z’u Rwanda bakaganira ku cyarushaho guteza imbere igihugu ndetse bagasabana.

Kuva ku wa Gatatu Perezida Kagame yagera mu Bubiligi, Abanyarwanda bari muri icyo gihugu bakoze imyiyereko bamugaragariza uburyo bamwishimiye, ari na ko berekana inyota bafitiye umunsi bazaganiramo, kuri uyu wa Gatandatu.

Ambasaderi w'u Rwanda mu Bubiligi, Olivier Nduhungirehe, aganira n'Umunyamakuru wa IGIHE
Flanders Expo, inzu mberabyombi izaberamo Rwanda Day ya mbere igiye kubera mu Bubiligi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kalisa 2017-06-10 02:32:59

Batinye Bruxelles, Hahaha !!

2
Manaza 2017-06-09 17:06:02

Hahhaha ibihumbi 4 ,ariko murabeshya ye

3
Habi Mose 2017-06-09 14:21:43

Oyeeee.. komeza imihigo Rwanda dukunda! abahatubereye muduserukire neza muserukane ishema nisheja.

4
remy 2017-06-09 13:12:27

oyeee

Kwamamaza