IGIHE

Abanyarwanda baba muri Pologne basabwe gukomeza ihame ry’uburinganire

0 25-03-2024 - saa 20:07, Karirima A. Ngarambe

Ambasaderi w’u Rwanda muri Pologne, Shyaka Anastase, yasabye Abanyarwanda baba muri icyo gihugu, cyane abasore n’abakobwa bakiri bato, gukomeza intambwe ubuyobozi bw’u Rwanda bwateye, mu guharanira imiyoborere idaheza no gusigasira iterambere ry’umugore.

Ni ubutumwa yagejeje ku Banyarwanda barenga 100 n’inshuti zabo baba muri Pologne, mu birori byo kwizihiza Umunsi Mpuzamahanga w’Umugore. Muri uyu mwaka, uyu munsi wari ufite Insanganyamatsiko igira iti ‘Shora mu bagore, wihutishe iterambere’.

Ni igikorwa cyabaye ku wa 24 Werurwe 2024, muri Kaminuza ya Lazarski, iherereye mu Murwa Mukuru wa Pologne, Warsaw, kiyoborwa n’urubyiruko. Cyaranzwe n’ubusabane n’imbyino aho abacyitabiriye bataramiwe n’itorero ryaho rigizwe n’Abanyarwanda ribyina imbyino gakondo ryitwa Icyeza.

Ibi birori byaranzwe n’ibiganiro binyuranye birimo ibyagarutse ku ngingo irebana n’ubuzima bwo mu mutwe n’uburinganire, kurebera hamwe imbogamizi zikigaragara ku mukobwa cyangwa umugore mu kwitabira amasomo ajyanye na siyansi, Ikoranabuhanga n’Imibare [STEM], n’uko barushaho kuyashishikarizwa.

Amb Shyaka yashimiye urubyiruko rw’abakobwa na basaza babo b’Abanyarwanda baba muri Pologne, ku ruhare bagize mu itegurwa ry’iki gikorwa haba mu biganiro no mu imurikagurisha.

Yasabye kandi uru rubyiruko kuba abahamya b’ibyiza u Rwanda rwagezeho mu kwimakaza uburinganire n’imiyoborere idaheza.

Nyuma ibi birori byahumujwe n’imurikabikorwa ryitabiriwe n’ibigo icyenda byo mu Rwanda byamuritse ibyo bikora bitandukanye birimo imyenda n’indi.

Hagiye hatangwa ibiganiro ku ngingo zitandukanye
Amb. Shyaka Anastase, yasabye Abanyarwanda baba muri Pologne, cyane abasore n’abakobwa bakiri bato, gukomeza intambwe ubuyobozi bw’u Rwanda bwateye, mu guharanira imiyoborere idaheza no gusigasira iterambere ry’umukobwa
Ibi birori byosojwe n'imurikabikorwa ry'bigo icyenda byo mu Rwanda byari byitabiriye iki gikorwa
Ibi birori byitabiriwe n'Abanyarwanda basaga 100 barikumwe n'inshuti zabo

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza