IGIHE

Abanyarwanda baba Abuja muri Nigeria basangiye Umuganura

0 30-09-2019 - saa 16:22, IGIHE

Abanyarwanda baba Abuja muri Nigeria, ku wa Gatandatu taliki ya 28 Nzeri 2019 bahuriye mu gikorwa cy’ Umuganura, barasangira bibukiranya umuco mwiza uranga abanyarwanda kuva kera

Kwizihiza Umuganura kuri uyu munsi byatewe n’uko abenshi, ku mpamvu zinyuranye batabashije kuba bari Abuja ku munsi ngarukamwaka wabugenewe, uba muri Kanama.

Ibyo birori byabaye umwanya wo kuganira ibijyanye n’amateka arebana n’umunsi w’Umuganura n’icyo kuwizihiza bisobanuye ku banyarwanda.

Umuyobozi wungirije w’Abanyarwanda baba Abuja, Madamu Sheila Mutesi, yavuze ko kwizihiza umuganura ari igikorwa cyiza gikomoka ku bakurambere, kigaragaza ubufatanye bw’abanyarwanda mu kwishimira umusaruro bagize no kujya imigambi yo gukora ibyisumbuye kurushaho.

Ambasaderi w’u Rwanda muri Nigeria, Stanislas Kamanzi yashimiye abitabiriye iki gikorwa. Yabasabye kurushaho kugira uruhare mu kwifatanya n’abandi banyarwanda mu gushyira mu bikorwa gahunda z’Igihugu zigamije kubyara umusaruro mwiza ufasha u Rwanda gukomeza gutera imbere.

Yashimiye kandi abitabiriye iki gikorwa umugambi mwiza wo gukomeza gusangiza ku musaruro wabo imiryango itishoboye y’ abanyarwanda, mu gikorwa cyo kwegeranya inkunga yo kubarihira ubwisungane mu kwivuza.

Ku bijyanye n’icyo gikorwa cyo gukusanya inkunga, hemejwe ko cyaba cyasojwe bitarenze impera z’ Ukwakira 2019.

Kwizihiza Umuganura byaranzwe n’ubusabane no kwishimira intambwe nziza u Rwanda rukomeje gutera rujya mbere.

Wabaye umwanya wo gusangira ku banyarwanda batuye Abuja
Ambasaderi w’u Rwanda muri Nigeria, Stanislas Kamanzi yashimiye abitabiriye iki gikorwa. Yabasabye kurushaho kugira uruhare mu kwifatanya n’abandi banyarwanda mu gushyira mu bikorwa gahunda z’Igihugu
Abana bahawe amata batozwa gukurana umuco wo gusangira no gufatanya
Abanyarwanda batuye Abuja biyemeje gukomeza umuco w'ubufatanye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza