IGIHE

Mushikiwabo yasabye ibiganiro byihariye ku Banyarwanda baba mu mahanga

9 5-10-2019 - saa 16:51, Karirima A. Ngarambe

Umunyamabanga Mukuru w’Umuryango w’Ibihugu bikoresha Ururimi rw’Igifaransa, OIF, Mushikiwabo Louise, yagaragaje ko hakenewe ikiganiro cyihariye gihuriza hamwe Abanyarwanda baba mu bihugu bitandukanye mu mahanga.

Mushikiwabo yabivugiye mu Mujyi wa Bonn mu Budage kuri uyu wa Gatandatu, tariki ya 5 Ukwakira 2019, ahahuriye Abanyarwanda bavuye imihanda yose y’Isi mu munsi uzwi nka ‘Rwanda Day’ ubahuriza hamwe bakaganira ku iterambere ry’igihugu cyabo.

Mushikiwabo imbere y’abasaga ibihumbi bitatu, yavuze ko hari Abanyarwanda baba mu mahanga bitinya, bakumva ko atari Abanyarwanda nk’abandi.

Yagize ati “Usanga hari Abanyarwanda bakiri bato bameze nk’abikirigita, bitinya, muganira wamubaza uti ko twagiye ahantu nk’aha, ati njye se ambasaderi yantumira. U Rwanda muri uyu mwaka turimo ni u Rwanda aho buri wese afite aho abarizwa, afite igihugu cye. Abari mu mahanga dutangire icyo kiganiro nyuma ya Rwanda Day.”

Mushikiwabo wahoze ari Minisitiri w’Ububanyi n’Amahanga w’u Rwanda, yavuze ko nta Munyarwanda ucagase ubaho ku buryo yumva ko aciriritse mu bandi.

Ati “Nta Munyarwanda ucagase ubaho, uba Umunyarwanda ukanaba Umudage, Umushinwa ariko Ubunyarwanda buruzuye. Icyo kintu tugice muri diaspora. Umunyarwanda aruzuye, ndibaza ko Bamporiki atampakanya ariko wa mwihariko wacu, uko turamukanya n’uko dukora birihariye.’’

Yakomeje agira ati “Nta Munyarwanda ucagase, u Rwanda ni urwacu twese. Icyo kiganiro cy’abana bakiri bato, nta wa kera ugihejwemo. Ndifuza icyo kiganiro.”

Rwanda Day ni ibirori by’imbonekarimwe ku Banyarwanda baba mu mahanga n’inshuti zarwo ziba zishaka kumenya amakuru y’umunsi ku wundi yarwo n’amahirwe rwibitseho.

Kuva mu 2010, Rwanda Day yasize amateka akomeye mu mpande zose z’Isi, yaba muri Leta Zunze Ubumwe za Amerika no mu Burayi aho imaze kubera.

Ni ibihe biba bidasanzwe byatangiye mu Ukuboza 2010 nubwo uyu munsi utari wakiswe Rwanda Day, aho Perezida Kagame yahaye impanuro Abanyarwanda basaga 2400 baba mu Bubiligi; abashishikariza ko bakwiye ‘kwiyizera aho gutegereza ak’i muhana’.

Ni umunsi ukoranyiriza hamwe Abanyarwanda mu mahanga wahawe inyito ya Rwanda Day ku nshuro ya mbere muri Kanama 2011 i Chicago muri Leta ya Illinois muri Amerika, ukoranya abasaga 4000.

Kuva mu 2011, Rwanda Day imaze kubera i Chicago, Boston na Atlanta muri Leta Zunze Ubumwe za Amerika, i Paris mu Bufaransa, i Toronto muri Canada, i Londres mu Bwongereza, i Amsterdam mu Buholandi, i San Francisco muri Leta Zunze Ubumwe za Amerika (Rwanda Cultural Day), i Ghent mu Bubiligi, none uyu mwaka yerekeje mu Mujyi wa Bonn mu Burengerazuba bw’u Budage.

Umunyamabanga Mukuru wa OIF, Mushikiwabo Louise, yagaragaje ko hakenewe ikiganiro cyihariye gihuriza hamwe Abanyarwanda
Mushikiwabo yasabye ibiganiro byihariye ku Banyarwanda baba mu mahanga

Amafoto: Philbert Girinema na Karirima A. Ngarambe - Bonn; Rwanda Gov

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
girishya 2019-10-06 13:08:45

Nibyo rwose nta munyarwanda ucagase..

2
Immac 2019-10-06 03:07:13

Ndagukunda nkabura icyo nguha!! Icyampa tukazahura. Uwampa contact yawe. Umbera icyitegererezo. Ijambo ryawe rimera nkirya nyakubahwa!!! NTA MUNYARWANDA WIGICE RWOSE!!! Blessing 😠Louise

3
Brend 2019-10-05 21:36:46

Mushikiwabo aravuga neza rwose!
Nituganira n’abana baba mu muhanga hazakenerwa indi myumvire irenze iyo dufite ubu. Dufite ikibazo gikomeye kuko aho kuganira ibintu, duhitamo kuganira abantu.
Umwana wakuriye Europe cg America ashaka kuganira uko igihugu cye gihagaze, aho kigana. Ntabwo azemera ibiganiro bitangizwa ndetse bikikirizwa n" imivugo yo kwamamaza izina y’umuntu 1 ( prezida) . Nizeye ko prezida Kagame azabyumva vuba kuko nubushize yasabye ko tutazongera kumuririmba ahubwo tukavuga ibyo twese twagezeho cyangwa duteganya kugeraho. Murakarama.

4
Live rwanda 2019-10-05 17:11:30

Uyu mu maman ndamukunda cyane.ari mu bahanga urwanda rufite kandi ni umudiplomate usobanukiwe neza ibyo akora.
Tugize abategarugori bareba kure nkawe urwanda rwatumbagira.

Long live Rwanda mubyeyi uduhetse

5
Immac 2019-10-05 16:50:26

Ndagukunda nkabura icyo nguha!! Icyampa tukazahura. Uwampa contact yawe. Umbera icyitegererezo. Ijambo ryawe rimera nkirya nyakubahwa!!! NTA MUNYARWANDA WIGICE RWOSE!!! Blessing 😠Louise

6
John 2019-10-05 15:34:15

Courage Louise.Abanyarwanda turagukunda kdi turagushyigikiye.
Komeza uhatubere ,Aho mu gihugu cy’abafransa,

7
Munyuramungoyi 2019-10-05 15:12:55

impamvu abanyarwanda bamwe bumva ko batuzuye ni ivangura bakorerwa, ubuse nko mu mirimo ihemba amafaranga menshi uhasanga abantu batize binjiye mu kazi kubera icyenewabo kandi bakomoka hamwe (abahanga barabizi) , nepotism make us half Rwandan.

8
Manzi Josephine 2019-10-05 14:27:07

Ibyo Mme Mushikiwabo yavuze bifite ishingiro.
Ariko igitangaje nuko akiri Minister wa Foreign Affairs ntacyo yabikozeho at all. Ubu se ari I Paris niho azaganirira Abanyarwanda bari mu mahanga,kandi akibashinzwe atarabaganirije? Ese iyo umuntu ahawe
floor ngo avuge,ni ngombwa ngo avuge ibyo atemera kuko H.E. ahari? Murabeshya bande? Icyizica Abanyarwanda ndetse n’igihugu, n’uburyarya,gukorera ijisho,kwishushanya no kugira inda nini. Benshi mu bayobozi bakora itekinika,babeshya H. E.,bangiza akazi ku bushake

9
JMV 2019-10-05 12:08:47

Courage Mme Louise! Ni igitekerezo cyiza cyane. Usanga hari urubyiruko rumwe rwifuza gusura igihugu cy’amavuko ariko rugacibwa intege n’ababyeyi. Ni byiza ko hagira ababwira urubyiruko nk’urwo bati karibu mu Gihugu cy’amavuko muri abanyarwanda buzuye. Ni byiza kandi no kwiyama abumva ko barusha abandi ubunyarwanda kuko arahari!

Kwamamaza