Abanyeshuri ba kaminuza ya ISS i La Haye bibutse Jenoside yakorewe Abatutsi

0 19-06-2017 - saa 21:46, Karirima A. Ngarambe

Abanyarwanda n’abandi banyeshuri biga muri Kaminuza yitwa ‘Institute of Social Studies’ (ISS) y’i La Haye mu Buholandi, bibutse ku nshuro ya 23 Jenoside yakorewe Abatutsi.

Iki gikorwa cyo kwibuka cyabaye kuwa 16 Kamena 2017 cyateguwe n’abanyeshuri b’Abanyarwanda biga muri ISS, bafatanyije n’ubuyobozi bw’iyi kaminuza; cyanitabiriwe na Ambasaderi w’u Rwanda mu Buholandi, Jean Pierre Karabaranga n’abarimu b’iyi kaminuza.

Mdubusi Zingelwayo Molefi uturuka muri Afurika y’Epfo, uhagarariye abanyeshuri bose biga muri ISS, yahaye ikaze abayobozi bose, bacana urumuri rw’icyizere, hanerekanwa filime ngufi y’amateka ya Jenoside yakorewe Abatutsi.

Uhagarariye abarimu bigisha muri iyi kaminuza, Prof Helen Hintjes, yagarutse ku kwamagana abahakana n’abapfobya Jenoside, anagaragaza ko guhakana no gupfobya Jenoside birimo ibice bitatu: Icya mbere ni icy’abavuga ko itigeze ibaho, icya kabiri bavuga ko yabayeho ariko abayikorewe bakaba aribo babigizemo uruhare n’igice cy’abavuga ko yabaye ariko ko atari bo bayikoze.

Amaze gusobanura ibiranga ihakana n’ipfobya rya Jenoside, yasabye Leta y’u Buholandi ko yashyiraho itegeko rihana guhakana no gupfobya Jenoside yakorewe Abatutsi.

Umuyobozi wa ISS, Prof. Inge Hutter, we yijeje ko iyi kaminuza izahora ishyigikira kuvuga ukuri kuri Jenoside yakorewe Abatutsi.

Yagize ati “Kaminuza nyoboye ntizatezuka na rimwe ku nshingano zo gufasha Abanyarwanda mu bikorwa byo kwibuka Jenoside yakorewe Abatutsi.”

Ambasaderi w’u Rwanda mu Buholandi, Karabaranga Jean Pierre, yashimiye ubuyobozi bwa ISS uburyo buhora butera inkunga umuhango wo kwibuka Jenoside yakorewe Abatutsi.

Amb. Kabaranga yanaboneyeho kubabwira ko Jenoside yakorewe Abatutsi yateguwe, igashyirwa mu bikorwa ariko ko yahagaritswe n’Abanyarwanda.

Yagize ati “Iyo bitaba ubwitange bw’abari mu ngabo za FPR Inkotanyi bemeye gutanga ubuzima bwabo ngo bayihagarike, banarokore abari basigaye bataricwa nta n’umwe wari kurokoka kuko intego yari ukurimbura ubwoko bw’Abatutsi.”

Yashimiye abanyeshuri b’Abanyarwanda na bagenzi babo bagize uruhare mu gutegura icyo gikorwa cyo kwibuka.

Ambasaderi yanakomoje ku kuvuga ko hari benshi mu bakoze Jenoside bakomeje kugenda bidegembya mu bihugu by’amahanga kandi bakagombye gufatwa bagashyikirizwa ubutabera.

Nyuma y’imyaka 23 Jenoside yakorewe Abatutsi ihagaritswe, Ambasaderi Karabaranga yabwiye abari muri uyu muhango ko Abanyarwanda batangiye urugendo rurerure rwo kwiyubaka kandi igihugu kigeze ku ntera ishimishije, aho kimaze kubera icyitegererezo ibindi bihugu byinshi.

Bafashe umunota wo kuzirikana inzirakarengane zishwe muri Jenoside yakorewe Abatutsi
Ambasaderi w'u Rwanda mu Buholandi, Jean Pierre Karabaranga, yashimiye ubuyobozi ISS ku gutegura ibikorwa byo kwibuka Jenoside yakorewe Abatutsi
Uhagarariye abarimu bigisha muri kaminuza ya ISS, Prof Helen Hintjes, yagarutse ku kwamagana abahakana n’abapfobya Jenoside
Umuyobozi wa ISS, Prof. Inge Hutter, we yijeje ko iyi kaminuza izahora ishyigikira kuvuga ukuri kuri Jenoside yakorewe Abatutsi
Amb. Karabaranga n'abandi bitabiriye ibikorwa byo kwibuka Jenoside

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza