Sobanukirwa igihe ibikoresho by’ubwiza byagakwiye kumara

2 16-04-2018 - saa 15:45, Mukaneza M.Ange

Si igitangaza kuba uyu munsi hari umuntu wasanga agikoresha amavuta yo mu mutwe cyangwa ibirungo bitandukanye by’ubwiza amaranye igihe kirenga umwaka, ndetse nta na gahunda afite yo kubijugunya, yumva ko yabikoresha kugeza bishize.

Nubwo usanga abantu benshi batita ku bijyanye no kumenya igihe runaka ibi bikoresho bizateraho agaciro cyangwa nabyo ubwabyo ugasanga ntibyanditseho, biba byiza kutabikoresha igihe kirekire mu kwirinda ingaruka zirimo n’uburwayi bw’uruhu.

Ku bufatanye n’abantu batandukanye bafite ubunararibonye mu by’ubwiza, ikinyamakuru Huffington Post cyagerageje gukora urutonde rwa bimwe mu bikoresho by’ubwiza bikunze gukoreshwa cyane n’abagore ndetse n’igihe bikwiye kumara, uhereye ku munsi wa mbere babikoresheje.

1.Amavuta agabanya ubunini bw’utwenge tw’uruhu

Ni’Kita Wilson, umuhanga mu bijyanye n’ubwiza agaragaza ko amavuta akoreshwa mu guhanagura no kuzibura utwenge tw’uruhu ariko akagabanya n’ubunini bwatwo azwi nka ‘toner’ yagakwiye gokoreshwa igihe kitarenze umwaka.

Mu gihe ariko ubonye atangiye guhindura ibara, kuzana impumuro mbi no gufatana ni byiza ko wihutira kuyajugunya kuko aba yatangiye gutakaza umwimerere wayo.

2. Amavuta atuma uruhu rutoha

Kuri uru rutonde kandi hazaho amavuta yifashishwa mu gutuma igice cy’inyumu cy’uruhu kirushaho kugira itoto no koroha (moisturizer), aho abanga bagaragaza ko atakwiye kurenza umwaka 1.5 bitewe nabwo n’igikoresho abitsemo.

Kimwe na Toner kandi ntukwiye gutegereza umwaka urenga ngo uhagarike gukoresha aya mavuta, ahubwo igihe ubona atangiye guhinduka no kumera nk’akomeye nibyiza ko wihutira kuyajugunya ukagura andi.

3. Amavuta arinda uruhu gusaza n’arurinda kwangizwa n’izuba

Nubwo amavuta agira uruhare mu gutuma uruhu rudasaza (Retinol Cream) nayo ashobora kumara igihe kigera ku mwaka 1.5, The New York Times yagaragaje ko ibintu birimo ikinyabutabire cya Retinol byangirika vuba cyane.

Niyo mpamvu ari byiza ko igihe ubonye aya mavuta atangiye guhindura ibara, imiterere n’impumuro wihutira kuyajugunya. Ikindi iteka ugakora ku buryo uyabika ahantu hatagera urumuri rwinshi.

Ibi kandi bigendana n’amavuta arinda uruhu kwangizwa n’imirasire y’izuba (sunscreen) atagomba kurenza imyaka itatu akoreshwa, ariko nayo ukaba ukwiye kwihutira kuyahindura igihe ubona atangiye guhindura ibara cyangwa yabitswe ahantu hari ubushyuhe bwinshi.

4. Ibikoresho bituma ibirungo bitinda ku mubiri

Umuhanga mu gusiga ibirungo byongera ubwiza, Kari Bauce, avuga ko amavuta afasha gutuma bigutindaho azwi nka ‘primer’ adakwiye kurenza umwaka uyakoresha.

Aya kandi ajyana n’indi mbanziriza birungo (foundation), ikwiye gukoreshwa igihe kitarenze umwaka 1.5 kandi ugaharanira kuyibika ahantu hari ubushyuhe buringaniye, hatagerwa n’imirasire y’izuba.


5. Agakoresho kifashishwa mu guhisha ibibara ku mubiri

Kuri uru rutonde kandi hagaragaraho agakoresho kifashishwa mu guhisha inkovu cyangwa andi mabara ari ku mubiri, no gutuma ibice bitandukanye urugero nk’ibitsike birushaho kugaragara neza kazwi nka ‘concealer’.

Bauce avuga ko concealer udakwiye kuyikoresha igihe kirenze umwaka umwe, kandi igihe ubona itangiye kumagara ukaba ukwiye kwihutira kuyijugunya, kuko n’ubundi iba itagituma igihe ushyizeho ibirungo bigaragara neza uko ubyifuza.

6. Ibirungo byo ku maso

Ibindi bikoresho usanga abantu batita ku gihe runaka babimaranye harimo ‘mascara’ na ‘eye liner’ byombi bigira uruhare mu gutuma amaso arushaho kugaragara neza.

Wilson avuga ko uko ibi byombi ugenda ubifungura ariko umwuka ugenda usohoka, ku buryo bitangira kumagara no gutakaza umwimerere wabyo.

Mu gihe ‘mascara’ wagakwiye kuyikoresha byibura amezi atarenze atatu, ‘eye liner’ yo ushobora kuyikoresha kugeza ishize, ariko buri uko ugiye kuyisiga ukibuka kuyihanaguza alcool kugira ngo wice udukoko tuba twagiyeho.

7. Ibirungo byo ku munwa

Ntiwavuga ibirungo byo ku maso kandi ngo wibagirwe ibyo ku munwa birimo lipstick ikoreshwa mu guhindura ibara ryawo ariko ikaba ijya kumera nk’ikibuye (solid) na lip-gloss ikunze kuba ari amazi cyangwa yorohereye.

Lipstick ntukwiye kuyikoresha igihe kirenze umwaka, mu gihe lip gloss yo idakwiye kurenza amezi 18. Nibyiza kwihutira kubijugunya ariko iyo wumva impumuro wabiguranye itangiye guhinduka.

8. Uburoso n’ipamba bikoreshwa mu kwisiga ibirungo

Ikindi gikwiye kwitabwaho cyane ni uburoso n’ipamba byifashishwa mu kwisiga ibirungo, kuko nubwo bidafite igihe runaka kizwi bishobora kumara uko ubifata bishobora kukugiraho ingaruka zirimo n’uburwayi bw’uruhu.

Wilson avuga ko nk’uburoso ari byiza kubukorera isuku wirinda ko bwagutera indwara z’uruhu, igihe ubona amenyo yabwo atangiye kugwa akaba aribwo ubujugunya. Ushobora kubusukura ukoresheje amazi n’isabune cyangwa indi miti yabugenewe.

Ni mu gihe ipamba (sponge) naryo ryagakwiye gufurwa inshuro nyinshi zishoboka, kandi byaba byiza rigahindurwa buri mezi atatu kuko bitewe n’imiterere yaryo rishobora kubika udukoko dushobora kugutera indwara.


9. Irangi ry’inzara

Umuhanga mu gutunganya inzara, Annette Soboleski, avuga ko irangi ryazo (Nail polish), ritagakwiye kurenza imyaka ibiri nyuma y’uko rifunguye.

Buri uko icupa ririmo irangi ry’inzara rifunguwe, hari bimwe mu birigize bigenda bitakara, ku buryo nk’igihe ubona ryatangiye gutakaza umwimerere ibyiza ari ukurijugunya utitaye ku minsi urimaranye.

10. Umubavu

Pamela Dalton ukora mu kigo ‘Monell Chemical Senses Center’ avuga ko nubwo nta ngaruka zizwi gukoresha umubavu umaze igihe bishobora kugira ku mubiri, ibyiza ari ukuwujugunya igihe wumva impumuro yawo itangiye guhinduka kuko bikurinda kuba wabangamira abo muri kumwe cyangwa nawe ubwawe.

10. Isabune yo mu mutwe

Abahanga mu bijyanye n’imisatsi bagaragaza ko iyo isabune yo mu mutwe (shampoo) yarengeje igihe akenshi itakaza icyo yakorewe, urugero ugasanga niba igenewe kukurinda kurwara imvuvu ntibikora.

Ni byiza rero ko shampoo utayikoresha igihe kirenze umwaka n’igice, kuko uretse kuba nta kintu iba ikikumariye ishobora no guhinduka indiri y’udukoko dushobora gutuma umusatsi wawe ucika cyangwa tukagutera ubundi burwayi bufata uruhu.

Aha kandi umuntu ntiyakwibagirwa ibindi bikoresho birimo amavuta yo ku mubiri, mu mutwe ndetse n’uruvange rushyirwa ku ruhu ngo rurusheho gusa neza (face masks), aho ugirwa inama yo gucunganwa n’impumuro n’ibara ryabyo kuko akenshi aribyo bigaragaza ko igihe cyo kubishyira ahagenewe imyanda cyageze.

Ibikoresho bitandukanye by'ubwiza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
UMURERWA lencia 2018-06-19 22:00:11

bantumukoresha ayamavuta ngomujyire ubwiyza sibyiza mubamurikwica impu zanyu nago aribyiza.

2
Bebe 2018-04-16 14:48:03

Murakoze rwose. nkanjye njya nsiga abageni ariko ibi biramfashije cnee

Kwamamaza