Bimwe mu byo ushobora kuba utazi kuri Heineken, inzoga ikunzwe mu bihugu 170

1 12-02-2018 - saa 08:38, Mukaneza M.Ange

Heineken Pilsener cyangwa se Heineken ni inzoga ikorwa n’uruganda Heineken International rwo mu Buholandi kuva mu myaka igera ku 145 ishize.

Iyi nzoga icuruzwa mu bihugu bigera ku 170 ku Isi birimo n’u Rwanda, aho ikwirakwiza n’Uruganda rukora ibinyobwa bisembuye n’ibidasembuye, BRALIRWA; yatangiye gukorwa nyuma y’uko ku wa 15 Gashyantare 1864, Gerard Adriaan Heineken aguze uruganda De Hooiberg rwakoreraga mu Mujyi wa Amsterdam abifashijwemo na nyina.

Nyuma yo kugura uru ruganda, Heineken wari ufite imyaka 22 yatangiye kwenga inzoga zitandukanye ariko ntizakundwa, kubera ko Abaholandi bikundiraga iziri mu bwoko bwa lager zitarwa igihe gito, ikinini kigashira ziri ahantu hakonje.

Urubuga rw’uru ruganda rugaragaza ko kubera ko Abaholandi batari bafite ubumenyi buhambaye mu kwenga inzoga zo muri buriya bwoko, yifashishije Dr Hartog Elion, Umuhanga mu bijyanye n’ubutabire maze mu 1873 avumbura umusemburo wa A na D Yeast, Heineken ya mbere ikorwa ubwo.

Nyuma y’imyaka ibiri Heineken yegukanye umudali wa zahabu mu imurikagurisha ryabereye mu Mujyi wa Paris mu Bufaransa ndetse iba inzoga ya mbere yinjizwa muri iki gihugu cyane ugereranyije n’izindi.

Heineken igizwe n’ibintu bitatu gusa

Mu gihe ibindi binyobwa bisembuye cyangwa n’ibidasembuye usanga bikozwe n’ibintu byinshi bitandukanye, Heineken igifite uburyohe yatangiranye mu myaka 145 ishize, ikozwe mu mazi meza kandi y’umwimerere, ingano (malted barley) n’igihingwa cya Hops gituma inzoga idakomeza gushya byongererwa uburyohe n’umusemburo wa A Yeast.

Yengwa hafi ukwezi kose

Ubusanzwe kwenga nyinshi mu nzoga ziri mu bwoko bwa lager bimara ibyumweru bibiri gusa ariko urugendo rwa Heineken kugeza ishyizwe mu icupa rumara iminsi 28.

Kuba yengwa iminsi myinshi kandi bigira uruhare mu buryohe bwayo bwihariye n’ibara ryayo ry’umuhondo wa zahabu.

Heineken nta bumenyi buhambaye yari afite ku nzoga

Gerard Heineken yari afite imyaka 22 ubwo yaguraga uruganda De Hooiberg, rwari rwarashinzwe mu 1592, ariko rufite ibibazo by’ubushobozi no gukora inzoga ntizimenyekane.

N’ubwo nta bumenyi buhambaye yari afite ku bijyanye n’inzoga, ntibyamubujije gukora inzoga yamwitiriwe ikamamara ku Isi yose, ibi akaba yarabigezeho yifashishije ubumenyi yakuye kuri Dr Elion ndetse n’abandi bahanga bafatanyije nawe.

A Yeast, umusemburo Heineken yihariye

Umwihariko w’uburyohe n’impumuro ya Heineken bikomoka kandi ku musemburo wa A Yeast wihariye kuri iki kinyobwa.

Uyu musemburo hamwe n’uwa D Yeast wavumbuwe ubwo mu 1886 Heineken yubakaga laboratwari akayishyikiriza Dr Elion wari ufite inshingano yo gushakisha umusemburo uzakoreshwa mu kwenga inzoga yamwitiriwe.

Uyu musemburo n’ubu ugikoreshwa mu kwenga Heineken ucungwa n’abasogongezi b’iyi nzoga, kugira ngo hatazagira icyo uhindukaho ugasanga itaye umwimerere wayo.

Iyi nzoga yishimirwa na benshi kubera ko idatera amavunane

Byagusaba imyaka 15 ngo ube umusogongezi

Buri ruganda rukora ibinyobwa byaba ibisembuye n’ibidasembuye, rugomba kuba rufite umuntu runaka ushinzwe kumva uburyohe bwabyo, akagaragaza niba hari impinduka zihari cyangwa bimeze nk’uko babyifuza.

Nk’uko bitwara igihe kirekire ngo Heineken benshi bakunda yengwe, ni nako uramutse wifuza kuba umusogongezi wayo w’umwuga, bigusaba imyaka 15 uhabwa amahugurwa n’ubumenyi butandukanye ku bijyanye n’iyi nzoga.

Yengerwa mu bihugu 70

Heineken iza mu nzoga eshatu zigaraga ahantu henshi ku Isi yengerwa mu bihugu bigera kuri 70 igakwirakwiza mu bisaga 170.

Kuba yengerwa mu bihugu byinshi ariko ntacyo bihindura ku buryohe bwayo, kuko umusemburo ukoreshwa ari umwe n’inzira inyuramo kugeza igeze mu icupa akaba ari imwe.

Uretse kuba ikunzwe n’abatari bake kubera uburyohe bwayo budahinduka no kuba nta ngaruka zikomeye igira ku wayinyoye nko kumeneka umutwe cyangwa gucika intege dore ko ifitemo ibisindisha (alcohol) iri ku kigero cya 5%, Heineken imaze no kwisanisha na byinshi mu bikorwa by’imyidagaduro bikurikirwa na benshi hirya no hino ku Isi nk’imikino y’amakipe yabaye aya mbere iwayo mu Burayi izwi nka Champions League yamamaza iki kinyobwa.

Amacupa ya Heineken akoreshwa mu bwubatsi

Mu rwego rwo kubungabunga ibidukikije, uruganda Heineken rwanakoze amacupa atandukanye ashyirwamo iyi nzoga, nyuma y’uko ishizemo akaba ashobora kwifashihwa mu bwubatsi agasimbura ikoreshwa ry’amatafari cyangwa ibiti.

Umushinga wo gukora amacupa ashobora kwifashishwa mu bwubatsi waturutse ku gitekerezo cya Alfred Heineken mu 1963, afatanyije n’umunyabugeni John Habraken.

N’ubwo utigeze ugera kure ngo abantu batangire kuyubakisha, zimwe mu nyubako za Alfred Heineken, umwuzukuru wa Gerard Adriaan Heineken, ndetse na bimwe mu bice by’uruganda rwa mbere byubakishije aya macupa.

Uruganda rwa mbere rwahinduwe ingoro y’amateka

Heineken Experience, ni ingoro iherereye mu Mujyi wa Amsterdam mu Buholandi, ikaba yarahoze ari uruganda rwa mbere rwengerwagamo iyi nzoga.

Uru ruganda rwubatswe mu 1867, rwahinduwe ingoro y’amateka y’iki kinyobwa nyuma y’uko mu 1988 hubatswe urundi runini hanze y’umujyi.

Kuva mu 1991, iyi ngoro yatangiye gusurwa n’abaturutse imihanda yose basobanurirwaga inzira Heineken inyuramo ndetse iza mu myanya ya mbere mu hantu nyaburanga hasurwa cyane mu Buholandi.

Kuva mu 2005, Heineken itera inkunga irushanwa rihuza amakipe yabaye aya mbere i Burayi, UEFA Champions League n’aho mu 2016 yagizwe inzoga ikoreshwa byemewe mu marushanwa y’imodoka azwi nka Formula One.

Heineken Group ikorana na BRALIRWA kuva mu 1971, kugera ku wa 31 Werurwe 2016, yari ifite imigabane ingana na 40.01% muri uru ruganda Nyarwanda. Umwaka ushize byatangajwe ko Heineken ishobora gutangira kwengerwa mu Rwanda.

Ni inzoga iboneka mu icupa rya Cl 33 ariko mu minsi ishize uru ruganda ruherutse gushyira hanze akagunguru ka litiro eshanu k’iyi nzoga kanatangiye no kuboneka ku isoko ryo mu Rwanda.

Agakarito kabamo Heineken kabamo amacupa 24
Ni imwe mu nzoga ikunzwe mu bihugu bisaga 170 byo ku Isi
Iyi nyubako yari urwengero rwa Heinken, mu 2004 yahinduwe ingoro ndangamurage
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
NICK HEROGISA 2018-02-12 13:17:01

NI BYIZA PE

Kwamamaza