Urukiko rwatesheje agaciro ikirego Radio Amazing Grace yarezemo RURA na RMC

1 11-10-2018 - saa 11:23, Ferdinand Maniraguha

Urukiko Rwisumbuye rwa Nyarugenge rwatesheje agaciro ikirego Umuyobozi wa Radio Amazing Grace, Pasiteri Gregg Schoof yaregagamo urwego ngenzuramikorere (RURA) n’Urwego rw’abanyamakuru bigenzura (RMC).

Pasiteri Schoof yajyanye izi nzego mu nkiko muri Mata uyu mwaka, nyuma y’uko Radio Amazing Grace ikuwe ku murongo nyuma yo gusabwa gusaba abayumva imbabazi ntibikore.

Iyi radiyo izwi mu Kinyarwanda nk’Ubuntu Butangaje, yagiye ku gitutu gikomeye ubwo muri Gashyantare, Pasiteri Niyibikora Nicholas yayivugiragaho amagambo yigisha ko umugore ari umuntu mubi muri sosiyete, agendeye ku mateka ya kera avugwa muri bibiliya.

Umwanzuro wabanje gufatwa n’Urwego Ngenzuramikorere, RURA wari uwo gusaba iyi radio gusaba imbabazi Abanyarwanda mu gihe kitarenze amasaha 12 uhereye igihe icyemezo cyatangarijwe, ubuyobozi bugafunga radiyo mu gihe cy’ukwezi kumwe, bukanishyura amande ya miliyoni ebyiri z’amafaranga y’u Rwanda.

Gusa ubuyobozi bwa Amazing Grace ntibwabikoze, kugeza ubwo Urwego Ngenzuramikorere, RURA, rufashe umwanzuro wo kuyambura uburenganzira bwo gukora isakazamakuru.

Schoof yahise ajyana RURA na RMC mu rukiko, avuga ko izo nzego zamurenganyije zikamufungira radiyo kandi bitari mu bubasha bwazo ahubwo ari ubw’inkiko.

Yanavuze ko atagombaga kubwirwa gusaba imbabazi kandi atari we wakoze icyaha, uretse ko atemera ko na Niyibikora yakoze icyaha cyatuma radiyo ifungwa kuko ngo nta rukiko rwabimuhamije.

Kuri uyu wa Kabiri nibwo urukiko rwisumbuye rwa Nyarugenge rwanzuye ko ikirego Schoof aregamo RURA ndetse n’icyo aregamo RMC nta shingiro bifite.

Urukiko rwategetse ko Schoof yishyura amafaranga ibihumbi 500 Frw by’ikurikiranarubanza RURA yakoresheje nk’uko ubwanditsi bw’urukiko bwabitangarije IGIHE.

Schoof yatangaje ko azajuririra uwo mwanzuro w’urukiko.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Sakega 2018-10-11 13:16:13

Najye gukorera ahandi, ubwo ntibamushaka, niba ikosa ryarakozwe na Nicolas niwe byagombaga kubazwa, uyu Munyamerika abonye uko Justice z’Africa zikora.

Kwamamaza