IGIHE

Uruhare rw’abajyanama b’ubuzima mu kurandura ubwandu bwa Virusi itera SIDA

0 2-12-2019 - saa 09:27, Ishimwe Israel

Inama Mpuzamahanga yiga ku Cyorezo cya Sida n’Indwara zandurira mu mibonano mpuzabitsina muri Afurika, ICASA, igiye kubera mu Mujyi wa Kigali kuva ku wa 2 Ukuboza 2019.

ICASA igiye kuba ku nshuro ya 20, ni inama ikomeye izitabirwa n’abasaga 8000 bashobora kugera ku 10 000 baturutse mu bice bitandukanye by’Isi.

Mu kiganiro kibanziriza ICASA cyabaye ku wa 1 Ukuboza 2019, abayobozi mu nzego zitandukanye bagarutse ku ntambwe yatewe mu guhashya SIDA ariko bahuriza ku bigikeneye gukorwa.

Abasesengura bagaragaza ko Afurika izagera ku cyerekezo yihaye cyo kuba Umugabane utarangwamo SIDA buri wese abigizemo uruhare.

U Rwanda rwihangiye uburyo burufasha kwiteza imbere mu bijyanye n’ubuzima aho guhera mu 1995 hashyizweho abajyanama b’ubuzima baba hafi abaturage bakabafasha kugerwaho na serivisi z’ibanze.

Minisitiri w’Ubuzima, Dr Gashumba Diane, yagaragaje ko umuntu abirebeye kure yakeka ko abajyanama b’ubuzima ntacyo bakora mu kurwanya SIDA kandi bafite akazi gakomeye.

Yagize ati ‘‘Ugiye kureba ibyo tuvuga abajyanama b’ubuzima bakora, wakeka ko ntacyo bakora ariko bagize uruhare rukomeye mu rugamba rwo kurwanya icyorezo cya SIDA.’’

Zimwe mu nshingano z’abajyanama b’ubuzima ni ugushishikariza abagore batwite kujya ku ivuriro kare. Mu Rwanda abagore batwite bagera kuri 91% babyarira kwa muganga.

Dr Gashumba avuga ko ‘‘Gahunda yo kubyarira mu mavuriro yatumye mbere yuko umugore ajya kubyara abanza kwisuzumisha, iyo agiyeyo ahura na ba bajyanama bamugira inama ko akwiye kwipimisha icyorezo cya SIDA n’izindi ndwara ngo atanduza umwana we. Iyo basanze yaranduye bamuha umuti, bigaha umwana amahirwe yo kubaho.’’

Yakomeje agira ati ‘‘Abajyanama b’ubuzima iyo bashishikarije umuntu kugana ivuriro, yahagera akabona ubutumwa na serivisi baba bagize uruhare mu kurwanya SIDA, nubwo utahita urubona ariko ruba ruhari.’’

Minisitiri w’Ubuzima, Dr Gashumba Diane, yavuze ko ibyo u Rwanda rwishimira rwagezeho mu myaka 25 ishize bijyanye na politiki ishyigikira serivisi z’ubuzima kuri buri wese

Mu nshingano zabo kandi abajyanama b’ubuzima bagize uruhare mu gukingiza abana, byatumye kuri ubu abagera kuri 93% bakingirwa bikwiye. Iyo umwana agiye gukingirwa nyuma y’ibyumweru bitandatu, iyo umubyeyi we yanduye nibwo apimwa ko arwaye SIDA kandi umujyanama w’ubuzima akabigiramo uruhare.

Gahunda y’abajyanama b’ubuzima yashyizweho mu 1995 hagamijwe gukemura ibibazo birimo iby’abantu batagerwagaho na serivisi z’ubuzima. Mu Rwanda habarizwa abagera ku 58,445.

Mu Rwanda abafite ubwandu bwa Virusi itera SIDA ni 3%; imibare iheruka y’Ishami ry’Umuryango w’Abibumbye ry’Ubuzima (OMS) igaragaza ko abari hagati y’imyaka 15 na 45 yageze kuri 2.6%. Kuri ubu abafata imiti ni 97%.

Umujyanama w’Ibikorwa bijyanye n’Indwara ya SIDA muri OMS, Andrew Ball, yavuze ko u Rwanda rwateye intambwe ikwiye kwishimirwa.

Ati “Turi hano kuganira ku cyakorwa mu kurandura SIDA ariko twanabigiraho. Muri iyi nama tuzareba ahakenewe imbaraga mu kunoza serivisi zo gusuzuma na gahunda zo gutanga imiti.’’

U Rwanda rwarenze zimwe mu ntego Ishami ry’Umuryango w’Abibumbye rishinzwe kurwanya SIDA (UNAIDs) ryihaye yo kugeza ubuvuzi ku bafite virusi itera Sida mu 2020.

Ni intego (90-90-90) isobanura ko abafite virusi itera Sida bazaba bazi uko bahagaze ari 90%, abafata imiti 90% n’ubwandu bwaragabanutse kuri 90%.

Imibare yo mu 2018 igaragaza ko abarenga miliyoni 37.9 bafite virusi itera Sida ku Isi. Muri bo abagera kuri 79% nibo bazi uko bahagaze, 62% bafata imiti igabanya ubukana na 53% bafashe imiti igabanya ingano ya HIV kubera imiti ndetse hari amahirwe make yo kwanduza abandi.

Umujyanama w’Ibikorwa bijyanye n’Indwara ya SIDA muri OMS, Andrew Ball, yavuze ko u Rwanda rwateye intambwe ikwiye kwishimirwa
Perezida wa ICASA, Professor John Alechenu Idoko, yavuze ko intego imwe yahuje abahanga mu bya siyansi, abafata ibyemezo n’abandi ari ukurebera hamwe icyakorwa mu kurwanya icyorezo cya SIDA
Umuyobozi Wungirije wa UNAIDS, Shannon Hader, yashimye imbaraga u Rwanda rwashyize mu gutegura iyi nama iri mu zikomeye ziga ku ngamba zo kurwanya SIDA
Inama ya ICASA iri gusuzumira hamwe ingamba zikeneye gufatwa mu kubaka Afurika itarangwamo SIDA
Ikiganiro n'itangazamakuru cyabereye muri Kigali Convention Center

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza