Urugendo rwa Dubai-Kigali muri RwandAir rwimuriwe i Entebbe

4 11-10-2018 - saa 09:02, Ferdinand Maniraguha

Urugendo ruva Dubai muri Leta Zunze Ubumwe z’Abarabu rujya i Kigali mu ndege ya Rwandair rwimuriwe Entebbe muri Uganda kubera ikirere kitameze neza.

Mu itangazo Rwandair yanyujije kuri Twitter mu gitondo cyo kuri uyu wa Kane, rivuga ko urugendo WB305 rwimurie ku kibuga cy’indege cya Entebbe, rukaza gusubukurwa ikirere kibaye cyiza.

Rigira riti “Kubera ikirere kitameze neza ku kibuga cy’indege cya Kigali, urugendo WB305 ruva i Dubai rwimuriwe Entebbe kugeza igihe ikirere cyongeye kuba cyiza ku kibuga mpuzamahanga cya Kigali. Bishobora kugira impinduka kuri gahunda y’ingendo, tubiseguyeho.”

Rwandair isanzwe ikora ingendo enye mu cyumweru ziva Dubai zirimo urwo kuwa Mbere, kuwa Kabiri, kuwa Kane no kuwa Gatandatu.

Iyo urugendo rw’indege rwimuriwe ahandi, abagenzi bafashwa mu bundi buryo kugira ngo bagere aho bari bateganyije kujya cyangwa bagategereza ko icyatumye urugendo rwimurwa kirangira.

Ikigo cy’igihugu gishinzwe iteganyagihe, Meteo Rwanda cyatangaje ko kuva ku itariki ya 09 kugeza kuya 13 Ukwakira 2018, hateganyijwe imvura nyinshi irimo n’umuyaga mu Rwanda.

Kwimura cyangwa guhagarika ingendo z’indege kubera ikirere kibi birasanzwe kuko ingendo zo mu kirere zikorana cyane n’imiterere y’ikirere.

Iyo hari kugwa mvura nyinshi, inkubi y’umuyaga bishobora gutuma ingendo z’indege zihagarara cyangwa zikimurirwa ahandi kubera ko ku kibuga cy’indege haba hatagaragara ku buryo indege zagwa cyangwa ngo zihaguruke.

Ubushyuhe bwinshi nabwo bushobora kugira ingaruka ku ngendo z’indege kuko ireme ry’umwuka wo mu kirere riba rike bigasaba indege kubanza kugenda urugendo runini hasi kugira ngo ibone imbaraga ziyihagurutsa mu kirere.

Icyo gihe nk’iyo umuhanda indege zigendeshamo amapine ku kibuga cy’indege ari muto, bisaba ko imitwaro imwe n’abantu bavamo uburemere bukagabanyuka kugira ngo ifate ikirere.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Harerimana jean claude 2018-10-11 06:39:37

Ibaze kuba bizwi neza ko ikirere kimeze nabi ... Gusa ikibabaje nuko kugeza ubu hari abayobozi binzego zibanze ku rwego rw’umudugudu Akagari , umurenge banga ko abaturage basana inzu zabo kugeza ubwo zibagwaho bagapfa nyuma bamwe mu abaturage baba bapfuye abo bayobozi bakabeshya abapfuye bose bari mu manegeka kandi hari aba badatuye mu manegeka ahubwo abo bayobozi bakanga kubaha uburenganzira bwo gusana inzu yawe ,, nuwabikwemera ko usana ugasanga aguciye nka mafaranga ibihumbi ijana kugirango aguhe icyo cyangombwa cyo gusana ,,, ikibabaza kurushaho nuko abayobozi baguca ayo mafaranga birengagije ko nta kazi ikindi birengagije ko ubuzima busigaye bugoye hano mu gihugu cyacu bazi neza ko ubu harya uwifite abandi twizirika umukandara ... Urwanda rwacu aho kuba urwi misozi igihumbi ubu ruri kugenda rugana kubibazo igihumbi .

2
Harerimana jean claude 2018-10-11 06:30:34

Ibaze kuba bizwi neza ko ikirere kimeze nabi ... Gusa ikibabaje nuko kugeza ubu hari abayobozi binzego zibanze ku rwego rw’umudugudu Akagari , umurenge banga ko abaturage basana inzu zabo kugeza ubwo zibagwaho bagapfa nyuma bamwe mu abaturage baba bapfuye abo bayobozi bakabeshya abapfuye bose bari mu manegeka kandi hari aba badatuye mu manegeka ahubwo abo bayobozi bakanga kubaha uburenganzira bwo gusana inzu yawe ,, nuwabikwemera ko usana ugasanga aguciye nka mafaranga ibihumbi ijana kugirango aguhe icyo cyangombwa cyo gusana ,,, ikibabaza kurushaho nuko abayobozi baguca ayo mafaranga birengagije ko nta kazi ikindi birengagije ko ubuzima busigaye bugoye hano mu gihugu cyacu bazi neza ko ubu harya uwifite abandi twizirika umukandara ... Urwanda rwacu aho kuba urwi misozi igihumbi ubu ruri kugenda rugana kubibazo igihumbi .

3
Kanyarwanda 2018-10-11 04:27:32

Mu ngendo nyinshi za rwandair, ijambo ryumvikana cyane kurusha ayandi ni: "we sincerely apologize.....", kuko hafi buri gihe basigaye bahaguruka bakererewe.

4
Rukundo 2018-10-11 03:33:14

Murakoze kutugezaho amakuru, ariko RwandAir ntabwo igira ingendo 4 zonyine, ikora buri munsi kuva no Kujya Dubai, bivuze ikora inshuro 7 kuva Dubai.

Kwamamaza