IGIHE

Urugendo rusharira n’imirire mibi mu bana bahungukanye n’abarwanyi ba FLN na CNRD (Video)

2 11-02-2020 - saa 10:41, Rabbi Malo Umucunguzi

Mu banyarwanda baheruka gutahuka nyuma yo kugabwaho ibitero n’ingabo za FARDC, abari abarwanyi bajyanwe mu nkambi ya Mutobo ngo bahabwe amasomo mbere yo gusubizwa mu buzima busanzwe, abagore n’abana bajyanwa mu nkambi ya Nyarushishi.

Iyi nkambi ya Nyarushishi icumbikiye abagore 498 n’abana 1375, babanaga n’abagabo babo mu mitwe ya FLN na CNRD, bo bari i Mutobo ari 341.

Urugendo rwo gutaha barutangijwe ku wa 17 Ugushyingo 2019 ubwo ingabo za Congo zabagabagaho ibitero mu gace ka Kalehe aho babaga, zibarusha ingufu bakwira imishwaro ubwo.

Abenshi baje gufatwa bajyanwa mu kigo cya gisirikare cya Nyamunyunya muri RDC bahamara icyumweru bafunzwe, Ingabo za Congo zibashyikiriza ingabo z’u Rwanda ku wa 21 Ukuboza 2019.

Nyirangendahayo Donatille ni umwe mu bafashwe boherezwa mu Rwanda, afite abana babiri nubwo umuryango we munini baburanye ubwo baraswagaho na FARDC.

Yagize ati “Hariya i Nyamunyunya niho abana barembeye, hanapfuye abana benshi. Twageze hano abana bacu babitaho, umwana wanjye yari ari mu mutuku, none yavuye mu mutuku ageze mu muhondo, ku buryo nshimira Imana kandi ngashimira n’abayobozi batwitayeho hano mu gihugu.”

Nyirangendahayo kimwe na bagenzi be bafite abana bafite imirire mibi, i Nyarushishi bashyiriweho irerero, bajyanayo abana mu gitondo bakitabwaho mu n’imirire, bakahava ku gicamunsi. Abana bakuru bo bashyiriweho amashuri, abategura kwinjira mu burezi bw’u Rwanda ubwo bazaba basezerewe mu nkambi.

Mukamana Clotilde we avuga ko yageze muri Congo ari muto, baza kugabwaho ibitero bageze ahitwa Malembe, aburana n’ababyeyi be atyo. Abanye-Congo baramutograguye baramurera, aza gushaka umugabo w’umurwanyi muri CNRD.

Ubwo FARDC yabagabagaho ibitero, bahunganye abana, bagenda iminsi myinshi mu ishyamba batagira icyo babaha, ni uko batangiye gufatwa n’imirire mibi. Mbere ngo barahingaga bakabona ibibatunga bakagaburira n’abana.

Ati “Aho twari turi umwana wanjye yari muzima, afatirwa mu nzira, tugeze hano atangira kurwara, arwara biriya biheri by’abana, bamujyana kwa muganga barabivura, bakadutekera ibiryo bakaduha n’uimigati, ubu arimo koroherwa nta kibazo.”

“Uyu munsi ubu natwe turimo koroherwa. None se ko twageze hano nta kigenda, bimeze neza nta kibazo. Batwakiriye uko bashoboye. Umwana ubu arimo kurya nta kibazo, baduhereza amashu, umuceli, injanga, tukabagaburira, baduha n’igikoma.”

Magingo aya yishimira ko umwana we akomeje guhinduka kubera uburyo arimo kwitabwaho mu bijyanye n’imirire.

Nyirangendahayo avuga ko aza mu Rwanda yatandukanye n’umubyeyi we n’abavandimwe be babiri. Bo ngo bashatse bashatse abanye-Congo, ubwo igihe cyo gutaha mu Rwanda cyageraga bo basigayeyo.

Ati “Mama namusize aho bita i Gatoyi, rwose niba yanyumva, ndimo kumubwira ko nageze muri Rusizi i Nyarushishi, n’abana bose narabazanye, uwo ntari kumwe na we ni Se gusa. Bumve ko ndi hano, ntabwo napfuye, ndiho n’abana ndabafite.”

“Abana barabagaburira bakabaha igikoma, bakabaha n’ibiryo bivanzemo injanga, umwana wanjye kandi we afite appetit arabirya, arabishoboye.”

Mukagakwaya Marie Rose we avuga ko bagera mu Rwanda abana bari barembye cyane, ariko ubu batangiye kugarura umubiri.

Yagize ati “Tugera hano urebye ntabwo yasereganyaga, ariko nkurikije uko amerewe buno, umwana arimo gutangira gukina, akaganira n’abandi nanjye akanganiriza, nanjye nkumbva ndishimye. Ntangiye kugira icyizere ko azakira rwose.”

Icyizere agishingira ku kuba umwana we yaratangiye kurya, nyamara bagera i Nyarushishi nta kintu na kimwe yakozaga ku munwa.

Yakomeje ati “Ubuzima twahuye nabwo twabuze ibyo tubaha ku buryo rwose bari bagiye no kuva mu mubiri, ariko Imana yaradufashije tugera ahangaha, ku buryo nageze hano aba bandobanuye mu bandi bati wowe ngwino kwa muganga, ubwo baramanura banjyana i Gihundwe.”

Umwana we ngo bamwitayeho bamuha amata, nyuma baza kumusezerera asubira mu nkambi ya Nyarushishi. Ubu ngo agenda arya gahoro gahoro, n’umutuku ari kugenda awuvamo ajya mu muhondo.

Umufashamyumvire Barakagwira Béatrice, ni umwe mu itsinda rifasha ababyeyi kwita ku mirire y’abana batahutse, buri wese akitabwaho bitewe n’umwihariko w’ikibazoumwana we afite.

Ati “Twatangiye twakira abana bafite ibibazo, ariko uko iminsi igenda ishira tubitaho, tubategurira indyo yuzuye, tubaha igikoma, abari mu ibara ry’umuhondo tubaha amata, ndetse tugerekaho n’imbuto, tumaze iminsi igera kuri 20 dukorana nabo, ariko muri iyo minsi yose tumaranye turimo gufata ibipimo tukabona bihinduka ku buryo bushimishije.”

Kugeza ubu abana bari mu muhondo bari hejuru ya 150, naho abari mu mutuku barenga 130. Barakagwira avuga ko urebye nk’abari mu muhondo barimo kujya mu cyatsi kibisi, hafi ya bose.

Uretse indyo ihabwa abana, ababyeyi bigishwa isuku, bakigishwa no gutegura indyo yuzuye irimo ibyubaka umubiri, ibitera imbaraga n’ibirinda indwara, ndetse abana bagahabwa imbuto n’igikoma, ndetse nibura buri mwana afata ½ cya litiro y’amata mu bari mu muhondo n’amata. Abari mu mutuku bahabwa by’umwihariko inombe igizwe n’ibyubaka umubiri.

Barakagwira yakomeje ati “Bitewe n’ibipimo twafashe muri iki cyumweru, dufite icyizere gihagije ko bazakira vuba kubera ko natwe byaradutunguye kubona umwana ari mu ibara ry’umutuku ari gupima nka 11, wamufata igipimo ukabona ageze muri 13, 14, mu gihe kitageze mu minsi 20. Nko mu gihe cy’ukwezi, ukwezi n’igice, tuzaba nta mwana tugifite ugifite ikibazo.”

Ababyeyi kandi bahabwa ubumenyi buzatuma ababyeyi nibamara kuva mu nkambi, bazabashe gutegurira abana babo indyo yuzuye kandi hakitabwa ku isuku.

Bibarwa ko umwana uri mu mutuku ahabwa inombe irimo ubunyobwa n’ibindi, mu mezi atatu yaba akize, naho uri mu muhondo, yakurikiranwe neza kandi agahabwa ibiribwa bihagije birimo isuku, mu kwezi kumwe yaba akize.

Umunyamabanga Mukuru wa Komisiyo yo gusubiza mu buzima busanzwe abari abasirikare, Musoni Francis, yabwiye IGIHE ko abahungutse bahise bafashwa bitewe n’ikibazo buri wese afite.

Ati “Abari bafite ikibazo cy’imirire, abaje baremerewe, buri muntu wese yagiye afashwa ku buryo akeneye gufashwa.”

Ni ibikorwa bigirwamo uruhare n’imiryango itari iya Leta, inzego z’ubuyobozi n’abandi, hagamijwe kubafasha kwiyakira no kwitegura gusubira mu buzima busanzwe.

Ati “Nibajya kuva ahangaha buri muntu azahabwa ibihumbi 60 Frw, nibagerayo bamare amezi abiri babongere ibihumbi 60 Frw, ariko ibyo ngibyo byose tubyita imperekeza, umuntu ni ukumuherekeza kugira ngo agere hahandi muri bwa buzima busanzwe, hahandi agomba kubaho n’uko abanyarwanda babaho.”

Abandi baziga imyuga cyane cyane abadamu n’urubyiruko, bazajya mu mashuri bahisemo bitewe n’icyo umuntu yifuza kugeraho.

Abana bahungutse bashyiriweho ishuri ribafasha kwisanga mu Rwanda
Umufashamyumvire arimo kwita ku bana mu ishuri ryashyizweho
Mu bahungutse harimo n'abatewe inda bakiri bato cyane
Usanga abana bamwe bari mu mirimo inyuranye mu nkambi
Mu nkambi usanga umukozi wa Croix - Rouge agerageza guhuza imiryango yaburanye n'abayo
Isuku ni ngombwa cyane mu nkambi, buri wese arayitozwa
Abana bahabwa amata mu kurwanya imirire mibi
Buri mwana yitabwaho bitewe n'ikibazo afite
Abana bahabwa amata n'igikoma
Abana bapimwa ibiro hakarebwa niba bijyanye n'imyaka bafite
Abana bakuru bahabwa amasomo azabafasha kwisanga mu burezi bwo mu Rwanda
Uwagiriye ikibazo mu nzira ahabwa ubuvuzi akeneye
Abana bahabwa inkingo zinyuranye mu kwirinda indwara
Imbere mu nkambi usanga impunzi ziri mu mirimo inyuranye ya buri munsi
Umunyamabanga Mukuru wa Komisiyo yo gusubiza mu buzima busanzwe abari abasirikare, Musoni Francis, avuga ko buri wese akomeje gufashwa bitewe n'ikibazo afite

Amafoto: Dushimimana Ami Pacifique

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Gahunde 2020-02-12 00:02:40

Naba n’aba bari mu ishyamba abari imbere mu gihugu ko bagwingira nabo?

2
Eric 2020-02-11 11:13:32

Abo bana bavuga uruhe rurimi?

Kwamamaza