IGIHE

Umutoza MacManus wo muri Arsenal yagaragaje uko u Rwanda rwateza imbere impano z’abakinnyi

0 22-08-2019 - saa 22:13, Ndayikunda Josué

Umutoza mukuru w’amashuri yigisha umupira w’amaguru mu ikipe ya Arsenal, Simon McManus, yatangaje ko u Rwanda rufite impano nyinshi z’umupira w’amaguru, ikibura ni ukongera ibikorwa remezo no gukarishya abatoza.

Yabitangaje kuri uyu wa Kane kuri Stade Amahoro i Remera, ubwo yasozaga imyitozo yo ku munsi wa kane muri itanu yagombaga kumarana n’ingimbi z’abatarengeje imyaka 17, babarizwa mu ikipe y’Isonga FC.

Yagize ati “Igikenewe ni ukongera ibikorwa remezo, kuzamura urwego rw’abatoza no guha abakinnyi amahirwe yo kwigira ku mitoreze itandukanye, impano zirahari igisigaye ni ukongera ibikorwa remezo.”

Iyi myitozo iri guhabwa ingimbi z’abatarengeje imyaka 17 ikubiye mu masezerano y’ubufatanye y’imyaka itatu ikipe ya Arsenal FC yagiranye n’ikigo cy’igihugu cy’iterambere (RDB), ku bufatanye na Minisiteri y’Umuco na Sport ndetse n’ishyirahamwe ry’umupira w’amaguru mu Rwanda, FERWAFA.

Umuyobozi wa Siporo muri Minisiteri y’Umuco na Siporo, Rurangayire Guy Didier, avuga ko iyi gahunda yo gutoza abana b’abanyarwanda n’abatoza izatanga umusaruro mwiza ndetse n’abana bakagira amahirwe yo gukina mu mashampiyona akomeye.

Yagize ati “Twagiye dukora amahugurwa atandukanye y’abatoza, y’abana bo munsi y’imyaka 15, ubu noneho barimo barakora aba bana bari munsi y’imyaka 17, turizera ko mu gihe kiri imbere dushobora kuzagera ku musaruro w’igihe kirambye tukaba twabasha kubona abana natwe bakina mu mashampiyona akomeye ndetse n’izacu zigakomeza kuzamuka.”

Byitezwe ko iyi myitozo ihabwa abana bakina umupira w’amaguru mu Rwanda ndetse n’abatoza izabafasha kongera ubumenyi no kwiga imikinire y’ikipe ya Arsenal.

Abana batojwe bazashyirwa mu byiciro bahabwe n’amanota bitewe n’uko bakoze mu minsi bamaranye n’umutoza, babafate n’amafoto kugira ngo n’ikipe iyo ariyo yose izajya ishaka umukinnyi hazajye hamenyekana aho yaturutse.

Abasoje imyitozo bagiye bahabwa impamyabushobozi
Abana bahabwa imyitozo kuri Stade Amahoro
Batojwe ibijyanye n'imikinire ya Arsenal FC
Tresor Hirwa yishimiye kwitabira iyi myitozo
Umutoza w'Isonga FC na we yahawe impamyabushobozi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza