Umukoro utegereje Abaminisitiri bashya muri Mininfra na Minecofin

4 16-04-2018 - saa 09:24, IGIHE

Impinduka ziheruka gukorwa muri Guverinoma zasize uwari Minisitiri w’Imari n’Igenamigambi, Gatete Claver, agizwe uw’Ibikorwa Remezo naho Dr Ndagijimana Uzziel agirwa Minisitiri w’Imari n’Igenamigambi, avuye ku mwanya w’Umunyamabanga wa Leta ushinzwe Igenamigambi yasimbuweho na Dr Claudine Uwera wigishaga muri Kaminuza y’u Rwanda.

Aba baminisitiri bose bafite umukoro ukomeye urangajwe imbere no gushaka ubushobozi bw’amafaranga bukenewe mu kurangiza imishinga y’ibikorwa remezo irimo gukorwa.

Ibikorwa remezo nk’inkingi ikomeye y’iterambere ry’igihugu, bikeneye amafaranga menshi cyane cyane aturutse imbere mu gihugu kugira ngo imishinga yabyo ishyirwe mu bikorwa.

Mu kiganiro yagiranye na Rwanda Today, Depite Karenzi Theoneste, umwe mu bagize Komisiyo ishinzwe gukurikirana Imikoreshereze y’Imari n’Umutungo by’Igihugu (PAC), yasabye ko habaho igenamigambi riboneye kugira ngo hirindwe ubwiyongere bw’imishinga minini itwari umutungo w’igihugu ariko ntitange umusaruro.

Yagize ati “Imishinga y’ibikorwa remezo itwara amafaranga menshi. Twavuga amashanyarazi, amazi, imyubakire n’ubwikorezi. Ibi bitanga umusaruro mu gihe habayeho igenamigambi ryiza, gukoresha neza ingengo y’imari yagenwe ndetse n’ishyirwa mu bikorwa rigendanye n’ibyateganyijwe.”

Akomeza avuga hakenewe cyane kubahiriza inshingano kugira ngo imishinga yatangiye irangire. Aha harimo kwagura imikorere ya sosiyete Nyarwanda y’ubwikorezi bw’indege, RwandAir, no kwihutisha iyubakwa ry’ikibuga Mpuzamahanga cy’indege cya Bugesera, aho igice cya mbere kizuzura umwaka utaha gitwaye miliyoni 400 z’amadolari ya Amerika.

Hari kandi kugeza amazi meza n’amashanyarazi ku Banyarwanda bose bitarenze mu 2024, kuri ubu abafite amashanyarazi ni 40.8%.

Imishinga yitezweho kongera amashanyarazi irimo; urugomero rw’amashanyarazi rwa Rusumo ruhuriweho n’ibihugu by’u Burundi na Tanzania, ku masumo ya Rusumo ku mugezi munini w’Akagera, rukazaba rufite ubushobozi bwo gutanga MW 80 n’uruganda rw’amashanyarazi akomoka kuri nyiramugengeri ruzatanga MW 80.

Hari uruganda ruzatanga amashanyarazi akomoka kuri Gaz Methane ruzatanga MW 50 mu Karere ka Rubavu n’iyindi.

Gahunda ya Guverinoma iteganya ko Abanyarwanda bose bazagezwaho amazi meza bavuye kuri 85%, ibi bizagerwaho hubakwa kandi hanasanwa imiyoboro y’amazi yo mu mujyi wa Kigali, indi mijyi no mu cyaro, hazongerwa ingano y’amazi atunganywa ku munsi akazava kuri metero kibe 182 120 akagera kuri metero kibe 303 120.”

Ikigo cy’Igihugu gishinzwe amazi n’isukura (WASAC), gitangaza ko gifite imishinga izatuma u Rwanda rugera kuri iyi ntego. Hari imishinga yatangiye gukorwa uw’imiyoboro y’amazi no kubaka ikigega cyo kuyakwirakwiza gifite ubushobozi bwa metero kibe 5000 kuri Mont Kigali aricyo cya kabiri mu gihugu nyuma y’igifite 10 000, n’ikindi cya metero kibe 2000, byose bizakemura ibibazo byo kubura amazi mu duce twa Remera, Kimironko, Kanombe na Kicukiro.

Hari kandi n’imishinga iri mu turere by’umwihariko udufite imijyi ya kabiri izunganira Kigali ariyo Nyagatare, Musanze, Rusizi, Rubavu, Muhanga na Huye.

Depite Karenzi avuga kandi ko abayobozi muri Minisiteri y’imari n’igenamigambi bakeneye gukorana cyane n’Ikigo cy’Igihugu gishinzwe imisoro n’amahoro (RRA), mu gushyiraho politiki n’uburyo bwo gukusanya imisoro ihagije y’imbere mu gihugu.

Yagize ati “Twiteze ingufu nyinshi mu gukusanya imisoro y’imbere mu gihugu, ibi bizakorwa binyuze mu kwagura ahashobora kuva imisoro no kongera imbaraga mu gukusanya imisoro no kugaruza iyanyerejwe.”

Inzobere mu bijyanye n’amazi n’ibidukikije, Kenezio Kayima, avuga ko intego u Rwanda rwihaye zishoboka ariko Guverinoma igomba guteganya ubushobozi bw’amafaranga buhagije ndetse n’ubunararibonye bukenewe.

Avuga ko Guverinoma ikwiye kwihutisha ishyirwa mu bikorwa ry’ibishushanyo mbonera by’isukura by’umwihariko mu Mujyi wa Kigali kandi igahamagarira abikorera gushora imari mu bijyanye no gutunganya imyanda.

Banki y’ishoramari y’u Burayi (EIB), iherutse gusinyana n’u Rwanda amasezerano y’inguzanyo ya miliyoni 45 z’amayero ni ukuvuga miliyari 46 na miliyoni 845 z’amafaranga y’u Rwanda, azifashishwa mu gice cya mbere cy’umushinga wo kubaka uruganda rw’amazi mabi mu Mujyi wa Kigali.

Uru ruganda ruzubakwa ku Giticyinyoni mu byiciro bitatu rutware Miliyoni 262 z’amadolari. Igice cya mbere cy’igerageza kizatunganya ku munsi amazi mabi angana na metero metero kibe 12 000 azaturuka mu bice bya Camp Kigali, Serena Hotel, mu Mujyi rwagati, Muhima, na Kiyovu.

Uhereye ibumoso: Minisitiri w’Ibikorwa Remezo, Amb. Gatete Claver; Umunyamabanga wa Leta muri Minisiteri y’Imari n’Igenamigambi Ushinzwe Igenamigambi, Dr Uwera Claude; Minisitiri w’Imari n’Igenamigambi, Dr Uzziel Ndagijimana n’Umunyamabanga uhoraho muri Minisiteri y’Imari n’Igenamigambi, Caleb Rwamuganza
Kwamamaza
Kwamamaza

Izindi nkuru wasoma

19 3 20-08-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
RKUS 2018-04-16 10:59:45

Aka gafaranga ni kenshi ! ! ! Sinzi niba kugashyira mu mazi mabi mu gihe n’ameza agifite ibibazo ariyo nzira iruta izindi. Twizere ko abaduha inguzanyo batagira uruhari mu kutubwiriza icyo tuyikoresha.
Ikindi. Ese ibi bigo by’amazi n’umuriro byatangiye no guteketreza ukuntu byakora investments muri business izana inyungu. Bityo mu gihe kiri i mbere bikazabasha kwibeshaho atari ugusaba inguzanyo buri gihe, kandi byazanagira uruhare mugutuma igiciro cy’amazi cyangwa umuriro ku muturage kigenda kigabanuka.

2
Magnus 2018-04-16 08:48:10

Igikorwa cyo gusebanya kwa bamwe mu bakozi ba WASAC binyuze muri tract banditse kiragayitse cyane kandi kirerekana ko ari abantu bafite uburere nubushobozi buciriritse. Ese abantu bazajya bihitiramo abayobozi wa mugani? Ese benshi ko bakora ibitajyanye nibyo bigiye bo bageze gute muri iyo myanya? Ese ninde utabona ko hari ikibazo cyamazi mu RWANDA kuburyo hakenewe impinduka muri management ya WASAC. kirya abandi bajya kukirya kikishaririza

3
sandra Rusaro 2018-04-16 04:41:26

None se koko buriya bazashyira uruganda rwo gutunganya amazi yanduye ( waste water ), mu yandi magambo, bazashyira umusarane mu marembo y’umujyi wacu koko?? Abava DRC banyuze Rusizi cyangwa Rubavu, aba Uganda baciye Gisoro-Musanze, abavuye Burundi banyuze Huye, abo bose binjirira Gitikinyoni!! Kandi bazi neza ko uriya muhanda uzongerwa.
Nizere ko bazagira ubwenge n’ubushishozi burenze ubwo abo basimbuye bakabishyira aho bitabangamira ubwiza n’iterambera by’Umujyi wacu!! Sinzi niba muzi umunuko uvamo uko uba umeze? Reka nzarebe ko MoS/Minecofin wize "environmental economics" nawe azabeshya HE ngo birashoboka, ngo nta kibazo kandi hari ahandi henshi iriya system yajya kandi igakora neza. Ministers muzatege amatwi impuguke mufite mureke kuzikoresha ibitemewe nk’uko abo musimbuye bari baramenyereye batareba inyungu rusange!!

4
diore Ndikuriyo 2018-04-16 02:35:33

Mfashe kano kanya ngo nshimire byimazeye Nyakubahwa Padiri Ubaldi umubyeyi wacu twese, Imana yakurize mu gihe wahigwaga yashakaga ko muri iki gihe ubera igisubizo ku bibazo byinsi cyane biri mu mitima yacu, ukadufasha kubohoka dusaba kandi dutanga imbabazi ku byadukomerekeje byose bityo tukabona kubaho mu mudendezo. Mubyeyi wacu warakoze Nyagasani yarakoze cyaaane kuko yakurinze nukuri nagabwe icyubahiro ku byicyo gikorwa gikomeye yakoze. Komeza ufasha abanyarwanda bose kugira ngo dukire ibikomere byatwishe imitima. mbashimiye byimazeyo ku giterane mwaraye mukoreye kuri stade Amahoro twaranezerewe mu mutambagiro twabonye Imana twararuhutse imitima. twarahimbaje Nyagasani twatashye tumeze neza mu mitima kandi twabohotse.
Nyagasani akomeze kukurinda nawe ukomeze kwegera abababaye bakeneye gukira ibikomere ku mutima
Yezu Kristu akuzwe iteka ryooose
Diore

Kwamamaza