Umuhanda wa Kigali - Gatuna ushobora kongera kuba nyabagendwa mu cyumweru kimwe

1 15-05-2018 - saa 17:20, Rabbi Malo Umucunguzi

Minisiteri y’Ibikorwa remezo (Mininfra) yatangaje ko yihutiye gusana umuhanda wa Kigali – Gatuna nk’umwe mu y’igenzi mu bwikorezi mpuzamahanga ku Rwanda, ku buryo amakamyo ava cyangwa yerekeza Uganda ashobora kongera kuwukoresha vuba.

Mu kiganiro n’abanyamakuru kuri uyu wa Kabiri, Mininfra yavuze ko yatangiye gukora ibishoboka byose kugira ngo uyu umuhanda wongere kuba nyabagendwa, nyuma yo kwangizwa n’imvura, byanatumye amakamyo abuzwa kuwunyuramo.

Umunyamabanga wa Leta muri Minisiteri y’Ibikorwa Remezo, Ushinzwe Ubwikorezi, Uwihanganye Jean de Dieu, yavuze ko bigaragara ko umuhanda Kigali-Gatuna wangijwe n’imvura, ndetse yaje mu kiganiro avuye aho byabereye mu Murenge wa Cyumba, Akarere ka Gicumbi nko mu kilometero kimwe uvuye ku mupaka wa Uganda.

Yavuze ko kubera imvura ikomeye iri kugwa, ku Cyumweru aribwo igice kimwe cy’uwo muhanda cyanyereye, ku wa Mbere birakomeza ariko kuri uyu wa Kabiri bisa n’ibyahagaze.

Yakomeje agira ati “Ni ahantu tuba twaratsindagiye hafi y’igishanga, haruguru yaho hakaba imisozi. Imvura yakomeje kuhagwa cyane amazi yinjiramo harimo n’ayo mu gishaga arimo azamuka, hakaba n’ayo mu misozi ajyamo. Iyo bihuye byose rero bituma umusingi ugize umuhanda udakomeza gukomera. Iyo urebye ubona ariyo mpamvu.”

Umunyamabanga wa Leta muri Minisiteri y’Ibikorwa Remezo, Ushinzwe Ubwikorezi, Uwihanganye Jean de Dieu

Mu cyumweru kimwe uraba nyabagendwa

Uwihanganye yavuze ko mu byakozwe bwangu, imodoka nini ziva cyangwa zijya muri Uganda zanyujijwe ku yindi mihanda igana ku mipaka wa Kagitumba na Cyanika ariko imodoka nto n’izitwara abagenzi zirakomeza kuhaca.

Yasobanuye ko batashatse ko imodoka nini zikomeza kuhanyura kuko hari kwangirika kurushaho, ahubwo hashyirwaho ingamba zo kuhakora byihuse.

Yakomeje agira ati “Ubu tuvuyeyo twatangiye kuhakora, imashini zatangiye kuhaza, abakozi, imirimo y’ibanze yatangiye, dutekereza ko turi bukoreshe imbaraga zose ku buryo nibura ku wa Mbere umuhanda uzaba wongeye kuba nyabagendwa ku modoka zose.”

Yanavuze ko hari imiryango umunani irimurwa kuko bitewe n’umuhanda wagiye bashobora kugira ikibazo, hakiyongeraho ko no mu kuwagura hari imitungo yabo iragerwaho.

Minisitiri w’Ibikorwa remezo, Amb Gatete Claver, yagize ati “Turafatanya na Minisiteri y’ubutegetsi bw’igihugu kugira ngo icyo kibazo gikemuke ndetse babone n’indishyi, ku buryo nta kibazo gihari kuko ni inshingano za leta kugira ngo tubiteho.”

Hagiye gusuzumwa niba nta zindi mpamvu zihishe inyuma yo gusenyuka utamaze igihe wubatswe

Mu cyumweru gishize Guverinoma yatangaje ko kuva muri Mutarama imihanda 25 yo ku rwego rw’igihugu yangiritse igahita isanwa; naho imihanda 44 yo ku rwego rw’uturere yarangiritse, 40 ihita iba nyabagendwa ariko indi ine yari itarasanwa. Ibyo bigatuma hibazwa niba nta yubatswe nabi ku buryo imvura yasanze imwe idakomeye.

Umunyamabanga wa Leta muri Mininfra yavuze ko umuntu atahita amenya niba hari uruhare uwahawe isoko ryo kubaka umuhanda Kigali –Gatuna abifitemo, kuko iyo umuhanda ugiye kubakwa, mu bipimo byibandwaho harimo amazi agera aho hantu, ariko bigaragara ko imvura yagiye yari itarabaho mu myaka 36 ishize.

Yakomeje agira ati “Bivuze ko ibipimo abubatse umuhanda bari bafite, utahita uvuga ako kanya ko aribo bafite ikosa kubera ko imvura dufite ubu idasanzwe. Navuga ko tugiye gukora isesegura mu bijyanye na tekiniki muri icyo kibazo, igisubizo kikaba arimo kizava.”

Yakomeje agira ati “Turabikoraho iperereza, ariko dutekereza ko impamvu nyamukuru ari ibi bihe turi kunyuramo.”

Minisitiri Gatete yavuze ko ingaruka z’imihindagurikire y’ibihe zitakiri mu mvugo ahubwo ziri kwigaragaza kurusha ikindi gihe icyo ari cyo cyose.

Yakomeje agira ati “Uwo muhanda wubatswe na Strabag ku nkunga y’Umuryango w’Ubumwe bw’u Burayi kandi ni umuhanda wari ufite ikigo gikurikirana uko wubakwa, guverinoma yarabikurikiranga, ariko ibyabaye muri uyu mwaka ntabwo bisanzwe, si imvura isanzwe kandi yagize ingaruka ku bintu byose birimo amashanyarazi, amazi, imihanda, imyubakire, ibintu byose.”

Guverinoma y’u Rwanda ivuga ko nibura hakenewe miliyari 13 Frw kugira ngo isane ibiraro n’imihanda y’uturere bigenda bisenyuka, naho mu gusana imihanda y’igihugu hakaba hakenewe agera kuri miliyari 9 Frw.

Abayobozi ba Mininfra mu kiganiro n'abanyamakuru
Abayobozi ba Mininfra mu kiganiro n'abanyamakuru

Indi nkuru wasoma: Amakamyo ava i Kigali ajya muri Uganda yahagaritswe kunyura i Gatuna

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
nkotanyi 2018-05-15 11:04:13

iyi mvura ni nyinshi ahubwo njye ahari hanteye ubwoba ni ahitwa murubaya ho hamwe hapfa kuva kera biratangaje ko ho nta kibazo hagize.

Kwamamaza