Uko Uwimana yahohoteye abaturanyi n’uwo bashakanye yitwaje ubuyobozi yatorewe

1 3-06-2018 - saa 16:26, Evariste Nsengimana

Uwimana Étienne, umuturage wo mu Murenge wa Gihango mu Karere ka Rutsiro, yitangira ubuhamya bw’ukuntu yajujubije abaturage nyuma y’uko abaye Umuyobozi ushinzwe umutekano mu Kagari atuyemo, n’umugore bashakanye akamubuza uburenganzira ku mitungo y’urugo, yavuga akamukubita.

Yabivugiye mu mahugurwa umuryango ‘Humanite & Inclusion’ wahoze ari Handicap International, wahaye abanyamakuru, kuri uyu wa 30 Gicurasi 2018, agamije gukumira ihohoterwa rikorerwa mu ngo.

Uwimana washyingiranywa na Mukamurenzi Xaverine mu 2004, yavuze ko akimara gutorwa yahoraga arekereje ashaka abo aca amande kugira ngo abone amafaranga yo kujyana mu kabari atavunikiye.

Ati “Twabanye neza, bigeze mu 2008 ntorerwa kuba ushinzwe umutekano w’akagari ka Teba. Uwo murimo wari mwiza cyane kubera ko ni njye wapangaga uburinzi, amarondo [...] nari nshinzwe no gufata amatungo, ataba mu biraro n’abandi batwika amakara n’ibiyorero.”

Yunzemo ati “Saa 18:30, nahitaga mpanga irondo nkarigenzura kugeza saa munani z’ijoro, nkatangira gufata abasibye irondo nkabakusanyiriza hamwe mfatanije na Local Defense, bumaze gucya nkajya gufata inka […] imwe yari 5000 Frw, umpaye 3000 Frw, umpaye 4000 Frw byose nkagenda nkubita ku mufuka.”

Uwimana yavuze ko n’uwasibye irondo yagombaga gutanga 2000 Frw, ariko bakumvikana akamuha 1000 Frw, bikagera saa yine afite asaga ibihumbi 40 Frw.

Ati “Ako kanya ngahita nkuramo ayo mpemba ba local defence, andi yose nkayakubita ku mufuka, nagera ku kabari ngatangira kuyanywera [...] ijisho ryamara guhindukira bimaze kuba nka saa munani, ngatangira gukora mu mufuka ngasanga nta mafaranga asigayemo.”

“Hashiraga icyuweru ntari nagera mu rugo. Ni aho nahereye mpohotera umuryango wanjye n’abaturage muri rusange, ntuma bataryama ndi gushakisha ibyaha. Icyo gihe nabaga mfite amafaranga menshi n’abaturage bakaza kumvumba, nkagurira abantu bose, ibihumbi 30 Frw bikahashirira.”

Byaje kumugaruka, ubwo Komite y’akagari yaseswaga, hagashyirwaho indi, nta faranga asigaranye, ariko ahabwa inshingano zo gukusanya ay’ubwisungane mu kwivuza.

Ati “Nahise mpabwa agatabo ka mitiweli, noneho umpaye 5000 Frw, umpaye 10000 Frw, nkumva ko nabwo nongera nkisubirira mu kabari, kugeza ubwo baje kunyishyuza ibihumbi 30 Frw byayo ndabibura, ninginga umugore ngo ngurishe umurima, abanza kwanga, ubuyobozi buje aremera.”

Nta somo yakuyemo kuko nyuma y’ukwezi, yaje guhabwa inshingano zo gukusanya inkunga ya FARG, nayo akayajyana mu kabari. Icyo gihe, yasabye umugore ko bagurisha undi murima arabyanga, awugurisha batabyumvikanye.

Ati “Nta cyizere nongeye kugirirwa, ahubwo najyaga muri ka kabari nanyweragamo nkababwira nti ariko ejo bundi bagiye kuzampa amafaranga, mukomeze munyihere inzoga ninywere, nzabishyura. Igihe rero cyaje kugera nsanga amafaranga yabaye menshi agera mu bihumbi 30 Frw.”

Yadukiriye inzu yari afite y’ubucuruzi ayigurisha ibihumbi 70 Frw, abanje kuyisanisha ibikoresho akuye ku yo yabagamo birimo n’inzugi, bamuha ayibanze ibihumbi 40 Frw nayo ayajyana mu kabari, umugore abimenye, agize umujinya atemagura imyaka uwahaguze yari yateye mu nkengero zayo, Uwimana ataha amukubita, arahukana.

Yaje kugirirwa impuhwe na Se wabo, amushingira akabari ngo acuruze ariko kubera ubusinzi, akajya asinzira inzoga bakazinywera ubuntu, nako ntikamara kabiri; abaturanyi babyinira ku rukoma kubera uburyo yari yarabajujubije.

Yatekereje kwiyahurira mu Kivu

Ati “Naje kuvuga nti ‘uwajya kwiyahura! Ndamanuka, ndavuga nti ngiye mu Kivu [...] ndacyitegereza, ndavuga nti uwabikora yaba ari umuswa.”

Nyuma yaje guhamagazwa ku Murenge yarezwe n’umugore, yitaba yishimye yifuza ko bamufunga ngo nibura akajya atungwa n’impungure kuko yari ageze aho aburara.

Icyo gihe bamubariye umutungo w’urugo yangije ugera mu bihumbi 300 Frw ariko yemera ko yabona ibihumbi 120 Frw kugira ngo umugore agaruke.

Si we yabonye umugore agaruka

Ati “Nubwo yari atashye, ntiyigeze abyishimira na rimwe. Nari mbaye rubebe, ategereza ko nicisha bugufi, nkicara ku ziko gusa numva ibyo avuga kuko n’ibyo twaryaga ni ibyo yari yarahinze iwabo.”

Nyuma, urugo rwabo rwaje kugaruka mu murongo bitewe n’amahugurwa bahawe na Handicap International.

Uwimana ati “Narahindutse, bangirira icyizere mba Perezida w’itsinda rigizwe n’ingo 13 [...] Bakimara kubona ko bihindutse, nahise ngerageza kwigurira inka imwe n’ingurube ebyiri ndetse igiye kubyara n’utundi dutungo tugufi turi gukora umushinga wo guhinga inanasi n’ibisheke, mfite n’urutoki.”

Abaturage bongeye bamugirira icyizere, atorerwa imyanya itandukanye irimo, umukuru w’umuryango remezo gatolika, umunyamabanga wa Caritas, kuba mu nshuti z’umuryango mu mudugudu guhagararira njyanama yawo muri njyanama n’ibindi.

Umugore we Mukamurenzi, yagize ati “Aho tuboneye ubufasha, muri make nyuma y’umwaka umwe twiga, yari amaze guhinduka, ubu nta kibazo rwose.”

Uyu muryango umaze guhindura imiryango ibiri yari ibanye mu makimbirane n’undi rukiri mu nzira.

Umuhuzabikorwa w’umushinga Humanite & Inclusion, Charles Karangwa, avuga ko abantu bakwiye gutinyuka bakavuga ihohoterwa ribakorerwa, mu rwego rwo kwirinda ingaruka zayo zirimo urupfu, ubuzererezi, gukoresha ibiyobyebwenge n’izindi.

Uyu mushinga ukorera mu Karere ka Gasabo na Rutsiro, umaze gufasha abantu mu byiciro bitandukanye birimo abakobwa babyariye iwabo, ingo zabanaga mu makimbirane, abana birera n’abandi bashinga amatsinda 213 abafasha kwiteza imbere, agizwe n’abantu 5350 barimo abagore 4137, abafite ubumuga 299 n’abagabo 1561.

Uwimana n'umufasha we batanga ubuhamya
Umuhuzabikorwa w’umushinga Humanite & Inclusion, Charles Karangwa, avuga ko abantu bakwiye gutinyuka bakavuga ihohoterwa ribakorerwa

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kirenga 2018-06-03 09:56:49

Uvugishije ukuri wa mugabo we ,ba mudugudu na ba mutekano Mana yanjye,ariko disi Imana ishimwe ko wahindutse maze uza komereze aho ni umuvumo wabo wahohoteraga waku gendagaho ,Gisharara Rusororo ,Gasabo nabo bumvireho.

Kwamamaza