IGIHE

Rwamucyo yafatishijwe n’umuvandimwe wa Brig Gen Kandiho acucurwa ibihumbi 48$ n’umusirikare wa Uganda

14 14-01-2020 - saa 08:43, IGIHE

Inkuru y’uko abanyarwanda bafatirwa muri Uganda bagatotezwa, bagakorerwa iyicarubozo, imaze kuba kimomo, gusa icyibabaje kurushaho ni uko ababashimuta babacuza utwabo twose bakabasiga iheruheru nta n’urwara rwo kwishima babasigiye.

Rwamucyo Emmanuel, ni umwe mu banyarwanda wafungiwe muri Uganda hafi imyaka ibiri, uherutse kurekurwa n’urukiko rwa gisirikari akagarurwa mu Rwanda.

Uyu mugabo w’imyaka 56, yavukiye i Mbarara muri Uganda akaba ahafite ibikorwa birimo hoteli ariko agatura mu Rwanda. Yafashwe n’inzego z’umutekano za Uganda ashinjwa gutunga imbunda mu buryo butemewe n’amategeko.

Rwamucyo wafashwe ubwo yari agiye kwitegura gushyira mu bikorwa amasezerano yo kugemurira uruganda rwa Cimerwa, ibishishwa by’ikawa yagombaga kujya akura muri Tanzania, yibwe ibihumbi 48 by’amadolari n’abamufashe n’ibindi.

Mu kiganiro yagiranye na IGIHE, aho we na bagenzi be barimo kwitabwaho n’abaganga mu bitaro bya gisirikare i Kanombe, Rwamucyo yavuze ko ahangayikishijwe cyane no kwibwa ako kayabo ndetse n’imodoka ye iparitse ku cyicaro cya CMI kuva agifatwa.

Uko Rwamucyo yafatishijwe n’umuvandimwe wa Kandiho

Ku wa 25 Gicurasi 2018, Rwamucyo yavuye i Kigali ajya iwe muri Uganda, akigerayo ahamagarwa n’uwitwa Moses Mukama Kandiho, akaba umuvandimwe wa Brig Gen Abel Kandiho uyobora urwego rw’iperereza rw’igisikari cya Uganda (CMI), amubwira ko amushaka.

Rwamucyo yabanje kumuhakanira kubera gahunda yari afite ariko undi akomeza kumwereka ko amukeneye nk’umuntu uzwi kandi usanzwe ari n’umukiriya wa Hoteli ya Rwamucyo iri Kikagati mu Karere ka Isingiro.

Rwamucyo avuga ko yamubwiye ko batabonana uwo kuko agiye Mbarara kugura amapine y’imodoka. Moses Kandiho yamubwiye ko nawe agiye kujya Mbarara bari buhahurire.

Ku mugoroba nibwo yongeye guhamagara Rwamucyo amubwira ko imodoka zashize yajya kumufata bakaganira undi amubwira ko bidashoboka.

Moses Kandiho yahise amusaba ko yamwoherereza amafaranga akifatira imodoka, Rwamucyo amwoherereza ibihumbi 100 by’amashilingi ya Uganda, afata imodoka.

Bavuganye aho bahurira, Rwamucyo na Rutayisire Augustin, nka saa tatu z’ijoro barahamusanga, ako kanya haza abantu batangira kubabaza imyirondoro, barabafata. Rwamucyo avuga ko bajijishije ko na Moses Kandiho bamufatiyemo babinjiza mu modoka ariko ahita arekurwa.

Ubwo Rwamucyo na Rutayisire bagezwaga imbere y’urukiko rwa gisirikare, Moses Kandiho, ushinzwe umutekano mu gace ka Ruborogota mu karere ka Isingiro, yavuze ko Rwamucyo yagize uruhare mu mugambi w’ubujura.

Ubuhamya bw’uyu muvandimwe wa Kandiho bwatanzwe mu nyandiko, buvuga ko ku wa 28 Gicurasi 2018 yahamagawe na Rwamucyo, amusaba ko bahurira kuri hoteli Kikagati, yamwitaba agasanga ari kumwe na Rutayisire.

Uwo muvandimwe wa Kandiho yavuze ko Rwamucyo yamugejejeho gahunda afite yo kwiba miliyoni y’amadolari ku munyemari ariko ko akeneye imbunda ebyiri zo kwifashisha, akaba yabashije kubona imwe yo mu bwoko bwa AK47 ndetse akamubaza niba yamufasha kubona iya kabiri.

Ubwo buhamya bukomeza buvuga ko aho gufatanya na we, Mukama Kandiho yahise abimenyesha umwe mu bashinzwe iperereza witwa Maj. Mushambo, ngo aze ate muri yombi abo banyarwanda babiri.

Mu bikorwa byo gushaka abarwanyi bajya mu mitwe yitwaje intwaro irwanya ubutegetsi bw’u Rwanda, uruhare rwa Brig Gen Kandiho nk’umuyobozi wa CMI rwagiye rugarukwaho cyane. Ibi bigatuma hibazwa ku byatangajwe n’umuvandimwe we kuri Rwamucyo na Rutayisire.

Yibwe ibihumbi 48 by’amadolari

Rwamucyo na Rutayisire bagifatwa, bahise bajyanwa mu kigo cya gisirikare cya Makindye barabasaka babambura amafaranga [Rwamucyo yari afite ibihumbi 260 by’amashilingi na telefoni] babinjiza muri gereza buri wese mu kumba ke.

Mu modoka yari afitemo ibihumbi $ 50 yari yakuyeho $ 2000 gusa andi asigaramo. Mu kubasaka bamukuyemo imfunguzo z’imodoka bayikura aho babafatiye ubu iparitse kuri CMI, ibyari birimo byose barabitwaye.

Ati “Natinye kuvuga ko ayo mafaranga ari mu modoka kuko nari nzi ko ari ibintu biri burangire. Muri kwa kudusaka imfunguzo z’imodoka barazitwara”.

“Turimo nijoro nagiye kumva numva ijwi ry’imodoka yanjye iciyeho, ndayumva menya ko ari yo ndahangayika nti aya mafaranga ntabwo ndi buyabone”.

Akomeza avuga ati “Amafaranga ubwo ahongaho ntacyo nongeye kuvuga kuko nta n’uwo wabazaga. Uwamfashe naje kugira umugisha ejobundi kuko niwe waje kudutangaho ubuhamya mu rukiko, nibwo namumenye.”

"Nari muzi isura ariko ntazi amazina ye, muri kwa gutanga ubuhamya akora imvugo ni Maj. Emmanuel Anshemeza, niwe wayajyanye ariko amabwiriza yose yo gufatwa kwacu arava kuri Brig Gen Abel Kandiho, umuyobozi wabo”.

Rwamucyo asaba leta ko uko yabarwaniye ishyaka bagafungurwa ari nako barenganurwa ku mitungo yabo, aho hari amafaranga yambuwe ajya gufungwa n’ayo yari yasize mu modoka.

Hari n’imitungo afite muri Uganda afite impungenge ko izafatirwa bitewe n’umwenda abereyemo banki yafunzwe amaze gufatamo inguzanyo.

Ati “Ubu njye nambuwe uburenganzira bwanjye, singishobora gusubira muri kiriya gihugu, mpafite inzu ifite agaciro ka miliyoni 800 z’amashilingi ya Uganda. Irimo ibintu bya hoteli. Nari mfite ideni rya banki miliyoni 176 kuva mfashwe banki simvugana na yo ubu hashobobra kuba harimo umugambi wo kuba bafatira iyo nzu yanjye.”

Uretse Rutayisire wambuwe akayabo kangana gutyo, undi witwa Mugabo Nelson, uri mu icyenda baherutse kurekurwa na Uganda uvuga ko yambuwe ibihumbi 10 by’amadolari n’amashilingi imitwaro 18, telefoni ebyiri, imyenda n’inkweto.

Undi witwa Iyakaremye Claude, yambuwe miliyoni 3.5 z’amashilingi yari agiye gukoresha mu bucuruzi na telefoni.

Hari kandi n’abandi banyarwanda benshi barondora imitungo bambuwe n’inzego z’umutekano za Uganda ndetse na Kayirere Julienne wambuwe uruhinja nyuma akabwira ko rwapfuye.

Rwamucyo Emmanuel avuga ko yibwe arenga ibihumbi 48 by'amadolari n'umusirikare wa Uganda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Van 2020-01-14 23:42:06

Eeh ayo mafr kwarime shi koko azayasubizwa koko,none mwakoherezayo abakozi ba leta yacu bakajya gukurikirana ikibazo ke nibyo bya bank bigakurikiranwa niyo hotel ye

2
Rukara 2020-01-14 15:43:49

Eeehh ihangane wa mugabo we. Uko umugabo aguye siko ameneka ama...

3
Higiro 2020-01-14 14:29:33

Yarimo bank ideni ariko abitse cash $$ 50milles mu modoka ??
Abakire murakimara pe

4
Seruhanga 2020-01-14 14:18:19

Wowe wiyise Rutebuka claver, uri umutindi muri wowe. Nta na pole! Wa njiji we urinda ubashinja ubutasi hari nibura n’umuntu umwe muri bo wigeze ahamwa n’ibyo bashinjwaga? Wowe wa ubikuye he? Nawe uri nkabo bagizi ba nabi babahohoteye. Uri umujura nkabo. Kandi reka nkubwire sha: "iyo inda yasumbye indagu,..." Bariya baturanyi baribeshya cyane, ahubwo bararoha igihugu. Uhohoteye u Rwanda ntibizamuhira. Nibace bugufi tubane mu bwubahane no ku neza y’abaturage b’ibihugu byombi. Amateka azavuga ibi. Rwamucyo na bagenzi bawe ndabasaba ko mwatekereza uko mwakwandika igitabo cy’ubuhamya kivuga kuri iyi nzira y’umusaraba mwanyuzemo, no ku bandi bose bafatiweyo bagahohoterwa. Murakoze kandi mukomeze kwihangana.

5
Rukara 2020-01-14 08:41:58

This story iteye kwibaza byinshi! Mu gihe tugezemo usibye abanyabyaha, amabandi..nabandi banyamanyanga nibo bonyine ushobora gusangana cash zingana kuriya... ni ikihe kintu muri iki gihe wajya kwishyura cash 50,000$ ??? en plus muri Uganda...

6
Rukara 2020-01-14 08:41:56

This story iteye kwibaza byinshi! Mu gihe tugezemo usibye abanyabyaha, amabandi..nabandi banyamanyanga nibo bonyine ushobora gusangana cash zingana kuriya... ni ikihe kintu muri iki gihe wajya kwishyura cash 50,000$ ??? en plus muri Uganda...

7
Nzungu 2020-01-14 07:04:47

nubwo kugira imitungo hanze y’igihugu cyawe 1 na 1 bifasha ariko iyo bihombye bihomba nabi cyane. uwo muvandimwe niyiturize, haguma amagara naho ibintu n’ibishakwa ,natora ahatege azakore Kandi azongera akire, abo bamwambuye nabo n’akamanyu k’umutsima igihe kizagera kabanige.

8
Dieudonne Hakizayezu 2020-01-14 06:48:21

Ndumva bizamusaba gusubirayo agatanga ikirego mu rukiko ariko nta nama nabimugiramo rwose!

9
Abandi 2020-01-14 05:27:18

Ayo mafaranga yose se kuki atayabitsaga muri banki?

10
Rutebuka Claver 2020-01-14 04:49:34

hahaha, who’s innocent?! Ahubwo nibakenyere babne! Icyo nzi ni uko umuntu wese ukora akazi ko kuneka arangiza/ra nabi! Reka ejo babatikure, tubasange muri Rweru cyangwa se twumze ngo bishwe n’umwijima, etc. (kubera twa tuzi twa afande)!

Ndabizi ko igihe.com comment nk’iyi mutayitambutsa, ariko byibuze namwe muyisome!

Paji: 1 | 2  

Kwamamaza