IGIHE

U Rwanda rwohereje indi batayo y’ingabo muri Centrafrique

0 3-08-2021 - saa 19:15, Ferdinand Maniraguha

U Rwanda rwatangiye kohereza izindi ngabo 750 mu butumwa bwa Loni bwo kugarura amahoro muri Centrafrique (MINUSCA).

Kuri uyu wa Kabiri, icyiciro cya mbere kigizwe n’ingabo 300 ziyobowe na Lt Col Patrick Rugomboka cyahagurutse ku Kibuga Mpuzamahanga cya Kigali zerecyeza i Bangui.

Izi ngabo zaherekejwe ku kibuga cy’indege n’Umuyobozi wa Diviziyo ya mbere mu Ngabo z’u Rwanda, Brig Gen Eugene Nkubito.

Umugaba w’Ingabo zirwanira ku butaka. Lt Gen Mubarakh Muganga kuri uyu wa Mbere yari yahaye impanuro abo basirikare, abasaba kuzarangwa n’ikinyabupfura n’indangagaciro bisanzwe biranga ingabo z’u Rwanda.

Yavuze ko bagenzi babo bagezeyo mbere bakoze akazi keza, abasaba kuzakomereza aho.

Ubwo bageraga i Bangui, bakiriwe n’Umugaba Mukuru w’ingabo za Minusca, Lt Gen Sadiki Traoré n’Umugaba Mukuru w’Ingabo za Centrafrique, Maj Gen Zephlin Mamadou.

Lt Gen Sadiki yashimiye Ingabo z’u Rwanda ku muhate zikomeje kugaragaza mu kurinda abasivile no mu rugamba rwo kugarura amahoro n’umutekano muri Centrafrique.

Izi ngabo zoherejwe nyuma y’ubusabe bwa Loni bwo kongera ingabo ziri mu butumwa bw’amahoro muri icyo gihugu.

Izi ngabo zizaba zifite inshingano zo kurinda umuhanda unyuramo ibicuruzwa uhuza Umujyi wa Bangui na Cameroun.

Iyo batayo yerekeje muri Centrafrique izatuma u Rwanda rugira batayo eshatu zishinzwe kubungabunga amahoro n’umutekano muri Minusca.

Mbere y'uko izi ngabo zihaguruka mu Rwanda, zabanje guhabwa impanuro z'uburyo zigomba kwitwara
Brig Gen Eugene Nkubito aha impanuro aba basirikare mbere y'uko bafata urugendo
Muri Centrafrique, Ingabo z'u Rwanda nizo zicunga umutekano mu Mujyi wa Bangui
Bitwaje udutabo turimo amahame agenga imyitwarire y'umusirikare wa RDF
Ubwo ingabo z'u Rwanda zari zigeze i Bangui, zakiriwe n'ubuyobozi bwa Minusca ndetse n'ubuyobozi bw'ingabo za Centrafrique

Amafoto: RDF

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza