U Rwanda rwerekanye aho rugeze mu gushyira mu bikorwa imyanzuro ku burenganzira bwa muntu

1 12-06-2018 - saa 18:25, Mukaneza M.Ange

Nyuma y’imyaka isaga itatu u Rwanda rutoranyije imyanzuro 50 irebana no kubahiriza uburenganzira bw’abaturage haba muri politiki, ubukungu, umuco ndetse n’imibereho myiza, kuri ubu 20% muri iyo imaze gushyirwa mu bikorwa mu buryo bwa burundu.

Mu bimaze gushyirwa mu bikorwa harimo ibirebana no kugabanya ubucucike muri gereza zo mu Rwanda, ahubatswe gerezaenye zirimo iya Mageragere, Nyagatare, Rubavu na Nyanza, mu gihe izindi zagiye zagurwa ndetse zikavugururwa.

Mu nama yahuje Minisiteri y’ubutabera (Minijust) n’abafatanyabikorwa bayo mu bijyanye n’iyubahirizwa ry’uburenganzira bwa muntu kuri uyu wa Kabiri, hagaragajwe uko n’indi myanzuro itarashyirwa mu bikorwa ihagaze.

Umuyobozi w’Ishami rishinzwe ubutabera mpuzamahanga muri Minijust, Umurungi Providence, yavuze ko amabwiriza asigaye nayo yatangiye gushyirwa mu bikorwa, ibyinshi akaba atari ibintu bishobora gukorwa ngo bihite birangira.

Yagize ati “Nk’ibijyanye n’ubukungu, uburezi, ubuzima, mbese ibyo by’imibereho y’abaturage muri rusange, ntiwavuga ngo uyu munsi nakoze igikorwa abaturage banjye babayeho neza 100%.”

Yakomeje avuga ko hari n’ibindi usanga bisaba gushyiraho amategeko kandi bimwe muri byo byakozwe, mu gihe hari nk’andi mabwiriza agera ku 10 azashyirwa mu bikorwa neza ubwo igitabo cy’amategeko ahana mu Rwanda kizaba cyamaze gusohoka mu igazeti ya leta.

Umuyobozi ushinzwe imitwe ya politiki n’imiryango itari iya leta mu Rwego rw’Igihugu rw’Imiyoborere, RGB, Kangwagye Justus, yavuze ko ishyirwaho ry’aya mabwiriza ryagize uruhare runini mu guhinduka kw’ibintu byinshi birimo n’itangazamakuru, aho kuri ubu risigaye ryigenga ndetse n’itegeko rirebana naryo rikaba riri kuvugururwa.

Yagize ati “Inenge yari irimo ni uko ritahaga ubwisanzure umunyamakuru, niba agize ibyo avuga ku muntu bikaba byakwitwa icyaha cyane cyane mpanabyaha. Uyu munsi ariko dufite itegeko rimaze kunyura mu nzego nyinshi risigaje gushyirwa ahagaragara, ntabwo ibi birimo.”

“Iyi n’inzira ikomeye nkeka ko u Rwanda ni rugera mu ruhando mpuzamahanga, ruzaba rwarateye intambwe ikomeye kubirebana n’iryo tegeko riha umunyamakuru ubwisanzure n’umutuzo mu gukora akazi ke.”

Mu 2015 nibwo u Rwanda rwatoranyije imyanzuro 50 muri 83 rwari rwahawe ijyanye no kongera iyubahirizwa ry’uburenganzira bw’abaturage muri politiki, ubukungu, umuco ndetse n’imibereho myiza.

Biteganyijwe ko ruzagaragaza aho ruhagaze mu ishyirwa mu bikorwa ryayo mu gikorwa cyise ’Universal Periodic Review: UPR’, mu nama iteganyijwe ku itariki ya 4 Ugushyingo 2020, i Genève mu Busuwisi.

Umuyobozi ushinzwe imitwe ya politiki n’imiryango itari iya leta mu Rwego rw’Igihugu rw’Imiyoborere, RGB, Kangwagye Justus
Umuyobozi w’Ishami rishinzwe ubutabera mpuzamahanga muri Minijust, Umurungi Providence
Iyi nama yitabiriwe n'abafatanyabikorwa ba Minisiteri y'Ubutabera muri gahunda yo kubahiriza uburenganzira bwa muntu

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Niyonkuru j Bosiko 2018-06-23 13:35:03

niyonkuru j Bosiko

Kwamamaza