IGIHE

U Rwanda rwamurikiye abikorera bo muri Hongrie amahirwe bashobora kubyaza ishoramari (Amafoto)

0 14-05-2019 - saa 22:54, Habimana James

Abahagarariye Hongrie bari mu Rwanda, kuri uyu wa Kabiri bagiranye ibiganiro n’abikorera bo mu gihugu bamurikirwa amahirwe bashobora kubyaza ishoramari, mu biganiro byateguwe n’Ikigo cy’Igihugu cy’Iterambere, RDB.

Ni ibiganiro byateguwe mu gihe u Rwanda rurimo kwakira inama ya Transform Africa. U Rwanda na Hongrie bihuriye ku kuba byombi bidakora ku mazi magari.

Hongrie iherereye ku mugabane w’u Burayi, ihana imbibi n’ibihugu birimo Autriche, Ukraine, Slovakia, Serbia, Croatia na Slovenia. Gifite kilometero kare ibihumbi 93 n’abaturage miliyoni 9.

Umuyobozi ushinzwe ishoramari muri RDB, Guy Baron, yagaragarije abahagariye iki gihugu amahirwe y’ishoramari ari mu Rwanda n’uburyo ari ahantu heza ho gushora imari. Yagaragaje ko u Rwanda ari igihugu cyorohereza abashoramari mu kuhakoresha ubucuruzi, rukaba rufite umutekano usesuye.

Minisitiri wungirije ushinzwe iterambere ry’ibyoherezwa mu mahanga, Istvàn Joó, yagize ati “Turimo kureba aho twafatanya n’abikorera bo mu Rwanda mu guteza imbere abikorera bakiri bato, ibyoherezwa mu mahanga, mu ikoranabuhanga n’irindi shoramari rishobora gufasha guhindura ubuzima bw’abanyarwanda.”

Bimwe mu bigize ubukungu bwa Hongrie birimo ubwubatsi, ubucukuzi bw’amabuye y’agaciro, inganda zikora imyenda, izikora imiti, imodoka, izikora ibirirwa n’ubuhinzi n’ibindi.

U Rwanda rukeneye abashora imari mu gice cy’ubucukuzi bw’amabuye y’agaciro ndetse no mu iterambere ry’ubuhinzi nk’urwego rushobora gutanga imirimo myinshi. Ibi bihugu byombi bishaka kandi gufatanya mu gice cy’ubuhinzi, ibi bikaba byafasha abahinzi bo mu Rwanda kohereza muri iki gihugu ibyo bafite, iki gihugu nacyo kikazana mu Rwanda ikoranabuhanga mu buhinzi.

U Rwanda kandi rukeneye gufatanya na Hongrie mu bukerarugendo cyane ko iki gihugu cyakataje muri iki kiciro kuko gisurwa n’abarenga miliyoni 10 ku mwaka.

U Rwanda runakeneye gukurura ba mukerarugendo bava mu bihugu by’i Burayi bihana imbibi n’iki gihugu bagasura bimwe mu byiza nyaburanga birimo inyoni, ingagi zo mu Birunga n’ibindi.

Umuyobozi w’Urugaga rw’abikorera mu Rwanda Robert Bapfakurera, yavuze ko ari ngombwa ko abikorera bahura bakungurana ibitekerezo mu bijyanye n’ubucuruzi.

Ati “Nk’urugaga rw’abikorera mu Rwanda twiteguye kuborohereza gukorera ubucuruzi mu Rwanda, aya ni amahirwe yo guhura n’abacuruza mu Rwanda.”

Guy Baron yabwiye IGIHE ko inama ya Transform Africa ari andi mahirwe akomeye yo kugaragariza abashoramari amahirwe u Rwanda mu ishoramari.

Ati “Transform Africa ni inama tumaze igihe dutegura, uyu mwaka abazayitabira bashobora kugera ku 5000, urumva iragenda ikura, ugasanga yitabiriwe n’ibigo n’abantu baturutse hirya no hino, kuri twe mu bijyanye noneho n’ikoranabuhanga no guhanga udushya akaba ari amahirwe akomeye yo guhuriza hamwe ibigo bitandukanye, abashoramari n’ibindi, bikaba byatuma habaho n’ubufatanye, guhanahana ubumenyi, kuri twe aya ni amahirwe akomeye.”

Ibyo u Rwanda rwatumije muri Hongrie mu 2018 byari bifite agaciro k’amadorali ya Amerika ibihumbi 820 avuye kuri 798 mu 2017, naho ibyo rwohereje muri iki gihugu mu 2018 byari bifite agaciro k’amadorali ya Amerika ibihumbi 25 mu gihe mu 2017 byari ibihumbi $38.

Umuyobozi Mukuru Wungirije wa RDB, Emmanuel Hategeka aha ikaze abitabiriye ibi biganiro
Habayeho kungurana ibitekerezo ku mahirwe y'ishoramari aboneka mu bihugu byombi
Minisitiri w'Ikoranabuhanga Ingabire Paula ni umwe mu bitabiriye ibi biganiro
Ibi biganiro byitabiriwe n'abantu batandukanye
Minisitiri wungirije ushinzwe iterambere ry’ibyoherezwa mu mahanga, Istvàn Joó, avuga ko bifuza gufatanya n'u Rwanda mu nzego nyinshi
Marc Holtzman ni we uhagarariye inyungu za Hongrie mu Rwanda
Umuyobozi ushinzwe ishoramari muri RDB, Guy Baron yavuze ko u Rwanda rufite amahirwe menshi y'ishoramari
Minisitiri w'Ikoranabuhanga Ingabire Paula ageza ijambo kuri aba bashoramari
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza