U Rwanda rwamaganye ubusabe bwo gufungura Ngeze na bagenzi be bahamijwe Jenoside

11 14-05-2018 - saa 08:31, IGIHE

Guverinoma y’u Rwanda yasabye Urukiko rushinzwe gusoza imirimo y’Urukiko Mpuzamahanga Mpanabyaha rwa Arusha (MICT), kutemera ubusabe bwa Col. Aloys Simba, Dominique Ntawukuriryayo na Hassan Ngeze, bahamijwe ibyaha bya Jenoside yakorewe Abatutsi mu 1994.

Aba uko ari batatu basabye MICT, kubarekura mbere y’uko barangiza ibihano bahanishijwe. Ngeze wari umunyamakuru yamenyekanye cyane ku nyandiko ze zirimo amategeko 10 y’Abahutu yasohoye mu kinyamakuru Kangura mu Ukwakira 1990, akubiyemo icengezamatwara ryo kwanga Abatutsi.

Uretse kandi inyandiko yacishaga muri iki kinyamakuru, Ngeze, yagize uruhare mu kwica Abatutsi mu yahoze ari Perefegitura ya Gisenyi, yavukagamo ubu ni mu Karere ka Rubavu.

Kuri ubu afungiye muri Mali, aho arangiriza igihano cy’imyaka 35 yakatiwe nyuma yo kujuririra icya burundu yari yahanishijwe mbere n’Urukiko Mpuzamahanga Mpanabyaha rwashyiriweho u Rwanda (ICTR).

Ntawukuriryayo wahoze ari Sous- préfet wa Gisagara, yasabye ko yarekurwa mbere yo kurangiza igihano cy’imyaka 20 yahawe mu bujurire bwo mu 2012. Uyu azwi ku kuba yarayoboye ubwicanyi ku musozi wa Kibuye ahiciwe Abatutsi basaga 30,000.

Col.Simba wakatiwe imyaka 25, ahamijwe ibyaha byo kuyobora ibitero bitandukanye by’ingabo n’Interahamwe zishe Abatutsi mu yahoze ari Butare na Gikongoro.

Aba bandikiye urukiko barusaba kurekurwa bitewe n’uko barangije 2/3 by’igihano bahawe n’urukiko rwashyiriweho u Rwanda.

Inkuru ya The New Times, ivuga ko yabwiwe ko u Rwanda rwamaganye ubusabe bwo kurekura aba bagabo, rugatanga impamvu nyinshi zirimo; ubukana bw’icyaha cya Jenoside bahamijwe, kuba nta kwicuza bagaragaje ndetse n’ingaruka kurekurwa kwabo kwagira ku barokotse Jenoside.

Mu cyumweru gishize na Minisitiri w’Ubutabera akaba n’Intumwa Nkuru ya Leta, Johnston Busingye, ubwo yari ku cyicaro cya MICT i Arusha, yasabye ko habaho gusuzuma mu ruhame ibivugwa na buri ruhande ku busabe bwa bariya bahamijwe ibyaha bya Jenoside.

U Rwanda kandi ngo rwatanze ibimenyetso n’abatangabuhamya n’ibindi, bihamya uko kurekura abahamijwe ibyaha bya jenoside batarangije ibihano bikomeje kubangamira abayirokotse.

Abahamijwe ibyaha na ICTR bagera ku 10 bamaze kwizezwa n’Umucamanza, Theodor Meron, kurekurwa batarangije ibihano ndetse akaba akomeje n’umugambi wo kugabanyiriza ibihano abacuze bakanashyira mu bikorwa umugambi wa Jenoside.

U Rwanda rukaba rwarahawe na MICT iminsi 14 yo kugira icyo ruvuga ku busabe bwo kurekura Ntawukuriryayo, Simba na Ngeze. Ni mu gihe aba bamaze amezi menshi n’imyaka batanze ubusabe bwabo, kuko nka Simba yabutanze mu 2016, Ntawukuriryayo abutanga umwaka ushize.

Abasesenguzi bagasanga gutanga ibyumweru bibiri gusa ari agahimano no kwikiza dore ko ubu busabe bumaze igihe kinini.

Bavuga kandi ko nubwo u Rwanda rugomba kugira uruhare mu byemezo bifatwa na MICT, rutari rwagasabwe kugira icyo ruvuga ku cyemezo uru rukiko rugiye gufata cyane cyane kurekura abahamijwe ibyaha bya jenoside batarangije ibihano. Urugero ni aho rwarekuye Ferdinand Nahimana, atarangije imyaka 30 yakatiwe.

Minisitiri w'Ubutabera, Johnston Busingye, hamwe n'itsinda ryari rihagarariye u Rwanda ubwo bari muri MICT
Kwamamaza
Kwamamaza

Izindi nkuru wasoma

20 3 20-08-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Angelique 2018-05-14 18:49:52

Reka turebe icyo ubu busabe bwacu buzageraho, bakabuhaye agaciro karenze ahubwo, nubwo wagira ngo Judge Meron ari kuri mission

2
Mazina Deo 2018-05-14 18:48:20

uwafata nk’umwe mu muryango w’uriya muzungu wihaye kurekura ziriya nyamaswa, ukaba umwe mu bishwe muri Jenoside, ndakurahiye nabo yafunguye yabagarura , uko yacura itegeko simbizi. mwihorere ntazabura kubona ko yibeshye na Carla Del Ponte twaramukize

3
Ganza 2018-05-14 18:46:21

Byiganwe ubushishozi icyazanye uriya mucamanza naho ubundi ari kuvangira u Rwanda cg se ari kuri misiyo y’abamutumye

4
Gasana 2018-05-14 18:45:20

Nuko u Rwanda rufatwa nk’insina ngufi iyo muri za UN naho ubundi nta mujenosideri wakagombye no kugabanyirizwa n’isaha imwe ku gifungo yakatiwe, keretse bikozwe n’umusazi nawe utazi ibyabere mu Rwanda

5
Rugazora 2018-05-14 18:41:33

Ubwo warekura Col Simba nibyo yakoze i Murambi ukaba udakoze ishyano? MICT na Meron barashaka iki ku banyarwanda? Nyamara hari igihe baba bazi ko bahimye u Rwanda arko baba bahaye impunity icyicaro

6
Manyinya 2018-05-14 18:39:49

Hatagize igikorwa mu maguru mashya wasanga na Bagosora, wacuze Jenoside nawe afunguwe, ubwo Jenoside yakorewe Abatutsi ikaba irasibanganyijwe burundu

7
Callixte 2018-05-14 18:37:43

Loni yatsinzwe muguhagarika Jenoside yakorerwaga abatutsi none irashaka no kureka abayikoze bakidegembya koko? ibi ni akumiro

8
kamanzi 2018-05-14 10:40:41

ukuntu nari nakunze igihe shaafy bari bamutwite icyo gihe hafi aho, sha, ukuntu yakuze yanga abo bantu sinzi, ibi ni bibki bimeze nkibya nina , busingye azamfasha ko mbona avuga amategeko yurwenya ngirango hari aba ku isi batekereza neza ariko bituruka kuki kubera iki mbese abanyamerika batoranyije umuryango wanjye kuyobora isi bifite ikindi gisobanuro kirimo abana bakura banga ababyeyi kuko batahuye ko abo bayeyi bafite ubuziranenge buke cga se kuki abo babyeiy banga abo bana, ntacyo mwakora tuzarwana dutsinde rwose, arikonkunda busingye ko umusize ku rugo nka bimwe bya sena ngirango wazgarukira ighe ushakiye pe

9
Gashi 2018-05-14 07:32:24

Nubundi amaherezo ukuri kuratsinda.Bazabarekure bajye hanze.Abarokotse genocide muka gisha se bamariwe iki nababaguze agakingirizo?Ni nde se utabona akarengane kabayeho...muvane ibyo aho

10
Gatare 2018-05-14 05:02:18

Nta butabera bw’inkiko za UN.Ni izo guhemba ibifaranga byinshi gusa.Ni gute Bagosora bamukatira imyaka 35,Zigiranyirazo bakamuhanaguraho icyaha?Ubutabera nyabwo tuzabubona ku munsi w’imperuka,ubwo imana izarimbura abantu babi,igasigaza abantu beza nkuko Imigani 2:21,22.Ubucamanza bw’abantu buribeshya,burya ruswa,bukurikiza politike,bureba icyenewabo,etc...Kubera ko mu isi nshya ivugwa muli 2 Petero 3:13 nta bantu babi bazabaho,ibibi byose bizavaho:Akarengane,gutonesha,ubukene,indwara,urupfu,...(Ibyahishuwe 21:4).
Niba ushaka kuzaba muli iyo paradizo,shaka cyane imana.We kwibera mu byisi gusa.

Paji: 1 | 2  

Kwamamaza