IGIHE

U Rwanda rukomeje imyitozo yo guhangana na Ebola imaze guhitana abarenga 300 muri RDC

0 11-01-2019 - saa 10:48, Mukwaya Olivier

Umunyamabanga wa Leta muri Minisiteri y’Ubuzima, Dr Ndimubanzi Patrick yashimangiye ko igihugu kimaze kubaka ubushobozi mu kwitegura guhangana n’indwara ya Ebola, imaze igihe muri Repubulika Iharanira Demokarasi ya Congo ndetse yahitanye abatari bake.

Kuri uyu wa Kane Dr Ndimubanzi yakurikiye imyitozo ku kigo cyihariye mu gihugu cyashyiriweho kwita ku barwayi ba Ebola igihe baba bagaragaye mu Rwanda, kiri i Rugerero mu karere ka Rubavu.

Iyi myitozo ijyanye n’uburyo bukwiye bwo kwita ku muntu wanduye ebola, uko avurwa n’uko yashyingurwa bibaye ngombwa. Ni imyitozo irimo kubera mu turere twa Rusizi na Rubavu, duhana imbibe na RDC.

Ati “Bariya barwayi twabonye mu mikino y’imyiteguro twabazanye mu Rugerero aho tuzabavurira tureba uko uzakira azataha, uzagira ibyago agapfa uko azashyingirwa, uko azaherekezwa mu buryo bwihariye ku muntu wa ebola, kandi byose turi gutoza abaganga bahuguriwe kwita ku murwayi no ku baganga bamuvuye kandi biragenda neza biratwereka ko hari ubushobozi buhagije.”

Yavuze ko muri iyi myitozo yahereye i Rusizi, banarebye uburyo umurwayi azavanwa ku bitaro yakiriweho by’agateganyo akagezwa mu Rugerero ahari ubushobozi bwo kumufasha mu buryo bwihariye, ari naho hatoranyijwe mu rwego rw’igihugu hari n’ibikoresho byose.

Umwe mu baturage b’Umurenge wa Rugerero, Nsengiyaremye Viateur, yemeza ko bumvise ibijyanye na Ebola ariko bakeneye gukomeza gusobanukirwa kugira ngo mu gihe bagize uwo bakeka ko ayifite bamenye uko bamwitwaraho.

Ati “Nkatwe duturanye na Congo ntabwo turasobanukirwa neza n’uburyo twakoresha mu kwita ku wagaragaweho icyorezo cya Ebola. Turifuza ko bazashaka uburyo bakomeza ubukangurambaga, ariko binyura kuri radiyo n’ibitangazamakuru.”

“Natwe tugiye kurushaho kujya dushaka amakuru, turashima ingamba zagiye zishyirwaho mu kurinda abanyagihugu kuko ku mupaka ntibasiba gupima, biradufasha cyane natwe bikaduha umutekano usesuye.”

Dr Ndimubanzi avuga ko kumenyakanisha ko hari Ebola cyangwa ko umuntu yafashwe ku gihe bimuha amahirwe yo kwitabwaho agakira, mu gihe utinze kubera kutamenya bwo amahirwe yo kwivuza ugakira akaba agabanyuka.

Ibimenyetso byayo ni ukugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri w’umuntu.

Icyorezo cya Ebola cyatangiye kumvikana muri RDC muri Kanama 2018. Ntabwo iragera mu Rwanda ariko igihugu cyiteguye ku buryo buhagije, aho ikigo cy’igihugu gishinzwe ubuzima, RBC, kimaze guhugura abaganga 117, abapolisi 190 n’abajyanama b’ubuzima 20 000.

Umuntu wahitanywe na Ebola ashyingurwa mu buryo bwihariye
Umuntu wanduye Ebola ntaba agomba guhura n'umuzima
Umurambo w'uwishwe na Ebola utwarwa ukwawo
Ikigo cya Rugerero cyagenewe kwita ku barwayi ba Ebola by'umwihariko
Umurwayi agira umwanya wo kuganirizwa
Uwamaze kwitaba Imana nawe atwarwa mu buryo bwihariye kuko aba ashobora kwanduza
Umuryango uhumurizwa mu gihe mwene wabo agiye gushyingurwa
Umunyamabanga wa Leta muri Minisiteri y’Ubuzima Ushinzwe Ubuvuzi bw'Ibanze, Dr Ndimubanzi Patrick, avuga ko u Rwanda rumaze kubaka ubushobozi mu kurwanya Ebola
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza