U Rwanda n’u Burusiya byiyemeje kurushaho gufatanya mu nzego zirimo iza gisirikare

13 3-06-2018 - saa 14:10, Rabbi Malo Umucunguzi

Minisitiri w’Ububanyi n’Amahanga w’u Burusiya, Sergey Lavrov, yagiranye ibiganiro na Perezida Kagame n’inzego zitandukanye mu Rwanda, by’ibanze ku mubano w’ibihugu byombi no kureba izindi nzego barushaho gufatanyamo.

Minisitiri Lavrov yaje mu Rwanda aturutse mu ruzinduko muri Korea ya Ruguru, aho ku wa Kane yagiranye ibiganiro na Perezida Kim Jong Un.

Minisitiri w’Ububanyi n’Amahanga w’u Rwanda, Louise Mushikiwabo, yavuze ko uyu mwaka ari uwa 55 w’umubano ibihugu byombi bifitanye, bityo uru ruzinduko rusobanuye byinshi.

Yashimye imbaraga u Burusiya buri gushyira mu gufatanya n’Umuryango wa Afurika Yunze Ubumwe uyobowe n’u Rwanda muri uyu mwaka, avuga ko mu biganiro hagati y’impande zombi biyemeje gukora byinshi kurushaho.

Yakomeje agira ati “Twagize n’umwanya wo kugaruka ku bufatanye hagati y’ibihugu byacu, by’umwihariko mu kubaka ubushobozi, amahugurwa, uburezi, byose ku ruhande rw’abasivili n’ibijyanye na gisirikare.”

Yanavuze ko bemeranyije kurushaho kungurana ibitekerezo hagati y’ibihugu byombi ku birebana n’ibibazo bireba Isi muri rusange, haba ku bihugu byombi cyangwa mu bahagarariye ibi bihugu mu Muryango w’Abibumbye i New York nabo bakorana bya hafi.

Yanavuze ko Perezida Kagame azitabira inama y’ibihugu bitanu bifite ubukungu buri kuzamuka cyane ku Isi izwi nka BRICS (Brazil, India, China na South Africa) muri Afurika y’Epfo muri Nyakanga, ukazaba ari umwanya wo kongera guhura n’u Burusiya nka kimwe mu bihugu bikomeye bigize iri huriro.

Mushikiwabo yavuze ko u Rwanda rwiteguye guhuza Afurika y’Iburasirazuba n’u Burusiya haba mu bijyanye n’ubukungu na politiki, aho u Rwanda rwemeye kuba nk’umuyoboro w’itumanaho ry’u Burusiya n’ibi bihugu byo mu karere, igihe bwaba bubyifuje.

Yakomeje agira ati “U Rwanda rurifuza kurushaho gukorana n’u Burusiya cyane cyane mu bijyanye no kwimakaza amahoro n’umutekano kuri uyu mugabane, duhamya ko u Burusiya bushobora kugira uruhare runini mu kugarura amahoro muri Afurika.”

“Uru ruzinduko ni indi ntambwe itewe hagati y’ibihugu byombi, twemeranyije ko tuzasurana cyane muri buri gihugu, ndetse tukazategura uruzinduko rw’abakuru b’ibihugu.”

Minisitiri Sergey Lavrov kuri iki Cyumweru mu gitondo wabanje kubonana na Perezida Kagame, yavuze ko iyo nama yagaragaje ko hari inzego nyinshi impande zombi zishobora gufatanyamo.

Yakomeje agira ati “U Rwanda ni umufatanyabikorwa w’igihe kirekire w’u Burusiya, ku buryo mu Ukwakira tuzaba twizihiza imyaka 55 y’umubano w’ibihugu byombi. Twizera ko iyi ari intambwe ikomeye mu mubano wacu.”
Hari inzego ibihugu byombi bisanzwe bifatanyamo

Minisitiri Lavrov yavuze ko uretse ibintu bitandukanye biteganywa gukorwa hagati y’u Rwanda n’u Burusiya, igihugu cye gisanzwe gifatanya n’u Rwanda cyane mu bya gisirikare, binyuze mu bikoresho n’amahugurwa.

Yagize ati “Dusanganywe ubufatanye mu bya tekiniki, twagemuriye ibikoresho bitandukanye serivisi z’umutekano z’u Rwanda, inzego zishinzwe iyubahirizwa ry’amatgeko n’igisirikare za kajugujugu n’imodoka za gisirikare n’inzego z’umutekano. Twanatanze intwaro nto n’ikorabuhanga ry’ubwirinzi.”

Yakomeje agira ati “Ikindi ni uko umwaka ushize mu 2017 hashyizweho komisiyo ihuriweho na guvernoma zombi yiga ku bufatanye mu bya gisirikare na tekiniki, inama ya mbere ibera i Kigali, iya kabiri ikazabera i Moscow muri iki gihembwe.”

Minisitiri Mushikiwabo yavuze ko u Burusiya busanzwe bunafasha u Rwanda mu bucukuzi bw’amabuye y’agaciro n’ikoranabuhanga mu isakazamakuru, aho ibihugu byombi byatangiye gufatanya kandi bishaka kuzamura iyi mikoranire.

Yakomeje agira ati “Nko mu bucukuzi bw’amabuye y’agaciro, guhera mu 2016 badufashije mu bijyanye n’abahanga mu gupima ubutaka dushakisha ahaba hari amabuye y’agaciro mu bice bitandukanye by’igihugu, kandi ako kazi karakomeje.”

Yanavuze ko minisitiri w’ikoranabuhanga mu Burusiya yasuye u Rwanda mu mwaka ushize mu nama ya Transform Africa, ndetse ibihugu byombi biri gufatanya mu bwirinzi mu by’ikoranabuhanga ndetse basabye u Burusiya kugira uruhare muri gahunda ya Smart Africa ifite icyicaro i Kigali.

Lavrov kandi yashimye imbaraga u Rwanda rushyira mu bikorwa byo kubungabunga amahoro hirya no hino ku Isi, ubu rukaba ruri ku mwanya wa gatanu ku Isi mu gutanga abasirikare n’abapolisi benshi, kandi barangwa n’imyitwarire iboneye kurusha abandi.

Minisitiri w’Ububanyi n’Amahanga w’u Burusiya, Sergey Lavrov, aherutse mu Rwanda aho yagiranye ibiganiro na Perezida Kagame
Perezida Kagame na Minisitiri Sergey Lavrov baganiriye ku mubano w’ibihugu byombi no kureba izindi nzego barushaho gufatanyamo
Minisitiri w’Ububanyi n’Amahanga w’u Rwanda, Louise Mushikiwabo, yavuze ko uyu mwaka ari uwa 55 w’umubano ibihugu byombi bifitanye, bityo uru ruzinduko rusobanuye byinshi
Minisitiri Lavrov yaje mu Rwanda aturutse mu ruzinduko muri Korea ya Ruguru, aho ku wa Kane yagiranye ibiganiro na Perezida Kim Jong Un
Mushikiwabo yavuze ko u Rwanda rwiteguye guhuza Afurika y’Iburasirazuba n’u Burusiya haba mu bijyanye n’ubukungu na politiki
Ambasaderi w'u Rwanda mu Burusiya (uwa gatatu uturutse iburyo), Jeanne D'Arc Mujawamariya, yari yitabiriye ibi biganiro

Amafoto: OGS

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Magufuli 2018-06-04 21:15:07

Abarusiya ni abahanga.Kuko baziko nta kintu bakura iwacu hano barabonako kugirango babashe kurinda inyungu zabo muri Congo no mu Burundi bagomba kwiyegereza u Rwanda kugirango babashe kutuneka no kumenya imigambi yacu mu karere.KGB niyo yigishije CIA kuneka.Batakwiyegereje cg ngo bakugurishe intwaro ntago bamenya icyo upanga ndetse n ubushobozi ufite mu bya gisirikare...mwapfa Russia...

2
By Kami 2018-06-03 20:44:40

Ku ruhande rumwe ndishimye kubera ko nari natewe impungenge cyane n’imbaraga nyinshi nabonye DRC N’Uburusiya bashyize mu mubano w’igisirikare noneho hakubitiraho n’Uburundi, aho hose kandi nkaba nkeka ko haba za nterahamwe, zihora zishakisha icyazifasha kongera kutumaraho, nkunvaaaaaaaa, ariko ubu ndunva ntuje. Mana turindire abayobozi, Mana turindire Igihugu cyacu, Amen.

3
By Kami 2018-06-03 20:44:23

Ku ruhande rumwe ndishimye kubera ko nari natewe impungenge cyane n’imbaraga nyinshi nabonye DRC N’Uburusiya bashyize mu mubano w’igisirikare noneho hakubitiraho n’Uburundi, aho hose kandi nkaba nkeka ko haba za nterahamwe, zihora zishakisha icyazifasha kongera kutumaraho, nkunvaaaaaaaa, ariko ubu ndunva ntuje. Mana turindire abayobozi, Mana turindire Igihugu cyacu, Amen.

4
Daily Dose 2018-06-03 17:47:23

RwandaAir Welcome to Chicago this is your land, this my land from California to New York City, this land was made for you and me. Let the green blue and yellow fly across the Atlantic.

5
Rutayisire 2018-06-03 14:07:31

Bazaduhe buruse yagisirikare tujye kwiga gukoresha byabitwaro byabo bikaze

6
Che 2018-06-03 13:49:27

Wow, this is really great!

7
Che 2018-06-03 13:49:27

Wow, this is really great!

8
Apaco 2018-06-03 13:45:37

Nishimiye Ubufatanye Bwuburusiya Ni Gihugu Cyacu.

9
niyonkuru jeanpierre 2018-06-03 13:11:05

icyombona urwanda rugeze kurwegorwiza uwomushitsi turamwishimiye cyone

10
Habineza 2018-06-03 12:15:07

Ministri w’Ingabo na Chef d’etat Major des armees bali bahali

Paji: 1 | 2  

Kwamamaza