Minisiteri y’Ubuhinzi n’Ubworozi itangaza ko u Rwanda rugiye korora inkoko zisaga miliyoni 12 mu gihe cy’imyaka irindwi iri imbere hagamijwe kongera umubare w’amatungo no kuzamura toni z’inyama u Rwanda rubona ku mwaka.

Ikigo cy’Igihugu cy’Ubuhinzi n’Ubworozi (RAB), giherutse gutangaza ko umusaruro w’inyama mu mwaka ushize wazamutse ugera kuri toni ibihumbi 116 uvuye kuri toni ibihumbi 86 wariho mu 2015.

RAB yavuze ko uko kuzamuka kwagizwemo uruhare n’imbaraga zashyizwe mu ishoramari mu bworozi bw’inkoko.

Ubwo yari mu nama nyunguranabitekerezo kuri politiki y’ubuhinzi mu Rwanda n’ingamba z’iterambere ry’ubuhinzi (PSTA4) kuri uyu wa 14 Ugushyingo 2017, Minisitiri w’Ubuhinzi n’Ubworozi, Dr Gerardine Mukeshimana yavuze ko hari gukorwa byinshi kugira ngo ayo matungo yiyongere bityo n’inyama zizarusheho kuba nyinshi.

Yagize ati “Kugeza ubu imishwi y’inkoko yatangiye kuboneka ku buryo hari iyo twamaze kubona iturutse mu Rubirizi, turi no gukorana n’abarera imishwi ku buryo bazadufasha kuyigeza mu baturage.”

Yavuze ko hari gahunda y’uko abantu bazajya bafata imishwi bakayirera amezi atandatu hanyuma abaturage bakayigura bakorora bitabasabye kongera gushyiramo imbaraga nyinshi, ahubwo zikaba zatora mu mezi atatu zigahita zijya ku isoko.

Yavuze ko ikigamijwe ari ugukora ku buryo inyama ziziyongera, bikaba bitari ku nkoko gusa kuko no ku mafi ubu u Rwanda rugeze kuri toni ibihumbi 27, ariko biteganyijwe ko mu myaka irindwi iri imbere aziyongera, kugera kuri toni ibihumbi 112, yiyongereyeho hafi 315%.

Avuga ko kugira ngo ibyo bizagerweho, hagabanyijwe umusoro ku biryo by’amatungo kuko cyari kimwe mu byatumaga abantu badashishikarira ubworozi.

Guverinoma y’u Rwanda iheruka kwegurira abikorera ikigo cyororerwamo inkoko cya Rubilizi gitangira gukora mu izina rya Uzima Chicken Ltd. Cyagombaga kugira ubushobozi bwo gutanga inkoko 200 000 zikurira umunsi umwe ku kwezi, zivuye ku 10 000 zabonekaga mbere y’uko leta icyegurira abikorera.

Ikigo cy’Igihugu gishinzwe ubworozi, RAB kivuga ko kugeza ubu u Rwanda rubasha kubona umusaruro w’amagi ubarirwa muri toni 7 317 ku mwaka.

Ubworozi bw'inkoko mu Rwanda bugiye kurushaho gushyirwamo imbaraga


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved