Inama ya Transform Africa 2017 yaberaga i Kigali, yageze ku musozo hasinywe amasezerano y’ubufatanye, ay’ubucuruzi ndetse abandi bahavana impamba y’ibitekerezo, amasezerano yasinywe akaba afite agaciro kagera muri miliyoni 100 z’amadolari ya Amerika.

Umunyamabanga Mukuru wa Smart Africa yateguye iyi nama, Dr. Hamadoun Touré, yavuze ko Transform Africa 2017 isize iciye agahigo mu bwitabirwe ugereranyije n’izabanje guhera mu 2013.

Abayitabiriye bageze ku 4000 bavuye mu bihugu 80 n’ibigo 300 by’abikorera byaje kumurika ibyo bikora, harimo ibihugu byagizemo uruhare runini nka Koreya y’Epfo, u Burusiya, u Buyapani na Estonia.

Transform Africa 2017 yatangiye kuwa 10 Gicurasi. Kuri uyu munsi wa nyuma abakuru b’ibihugu na za guverinoma bari bakoranye, guhera kuri Perezida Kagame wabakiriye; Perezida Mahamadou Issoufou wa Niger; Perezida Ibrahim Boubacar Keïta wa Mali; Minisitiri w’Intebe wa São Tomé na Príncipe, Patrice Emery Trovoada na Visi Perezida wa Zambia, Inonge Wina.

Abandi bakuru b’ibihugu bitabiriye iyi nama ariko batari bahari ku munsi wa nyuma ni Faure Gnassingbé wa Togo na Ismaïl Omar Guelleh wa Djibouti.

Muri iyi nama hamutitswe igitabo cyiswe ‘Smart Cities Blue Print’, gikubiyemo imiterere iboneye y’imijyi irimo ikoranabuhanga kuri buri rwego n’uruhare rigira mu mitangire ya serivisi, haba inama z’abayobozi barenga 300 b’imijyi, inama ireba ku bagore mu ikoranabuhanga, hatorwa n’umukobwa wahize abandi mu mishinga y’ikoranabuhanga, Miss Geek Africa 2017.

Dr Touré yakomeje agira ati “Arenga ibihumbi $40 yashowe mu bigo bitanu bikizamuka, hasinywe amasezerano ya miliyoni zirenga $55 hagati y’abafatanyabikorwa, muri make, kimwe mu bintu byabaye mu ijoro ryakeye kiratangaje. Mu ijoro ryakeye, mu masaha 24 nyuma yo gutangaza igishushanyo cy’uburyo u Rwanda rwifuza ko imijyi igezweho yaba imeze, hari amasezerano ya miliyoni $50 yasinywe mu gutangira kuyishyira mu bikorwa.”

Mu masezerano y’ubufatanye arenga umunani yasinywe, harimo menshi azareba inyungu z’u Rwanda, harimo n’ayabaye hagati y’Ikigo cy’u Rwanda cy’Ikoranabuhanga (RISA) n’ikigo Hancom yo muri Koreya.

Ubwo hasozwaga iyi nama, imbere y’abakuru b’ibihugu, u Rwanda na Niger byasinye amasezerano mu birebana n’amakuru, itumanaho n’ikoranabuhanga.

Perezida Mahamadou Issoufou wa Niger wasoje Transform Africa 2017, yashimye impinduka zigaragara mu Rwanda, anashimira Perezida Kagame ku miyoborere ye myiza ikomeje gukora impinduka mu Rwanda.

Yakomeje agira ati “Impinduka zishingiye ku ikoranabuhanga ni amahirwe kuri Afurika, kuko tuzabasha kuvugurura ubukungu bwacu, kongerera imbaraga uburyo ubukungu bwihuta no kurwanya ubukene, kurwanya ubusumbane cyane cyane hitawe ku bagore.’’

Minisitiri w’Urubyiruko n’Ikoranabuhanga, Jean Philbert Nsengimana, yashimiye abitabiriye iyi nama bose, ku biganiro byakozwe n’abemeye gutera inkunga iki gikorwa.

Yakomeje agira ati “Mbere y’uko dutandukana, nshimishijwe cyane no gutangaza igihe cy’inama itaha. Transform Africa 2018 izaba ibaye ku nshuro ya kane, iyi tariki muyizirikane, izaba kuva kuwa 9-11 Gicurasi 2018.”

Kuri uyu wa Gatanu kandi Minisitiri Nsengimana yatunguye abashyitsi bari bakoraniye muri Kigali Convention Centre, ubwo yabashimiraga akoresheje indimi nyinshi bamwe bavuga mu bihugu byabo.

Yateruye agira ati ‘Thank you, Murakoze Cyane, Asante Sana, Merci Beaucoup, Obrigado, Siyabonga, Shukran, Mwebale…’ nawe yakirizwa amashyi y’urufaya, kuva ku bakuru b’ibihugu na za guverinoma bari bicaye imbere mu myaka y’icyubahiro,kugeza kuri umwe wicaye mu myanya ya nyuma.

Transform Africa 2017 yapfundikiwe hasinywe amasezerano arenga miliyoni 100 z’amadolari
Umunyamabanga Mukuru wa Smart Africa yateguye iyi nama, Dr. Hamadoun Touré, yavuze ko Transform Africa 2017 isize iciye agahigo mu bwitabirwe ugereranyije n’izabanje guhera mu 2013
Abakuru b'ibihugu ubwo bari bageze mu nyubako ya Kigali Convention Center mu isozwa ry'iyi nama
Perezida Mahamadou Issoufou wa Niger wasoje Transform Africa 2017, yashimye impinduka zigaragara mu Rwanda, anashimira Perezida Kagame ku miyoborere ye myiza ikomeje gukora impinduka mu Rwanda
Perezida Kagame n'abandi bayobozi bakuru mu isozwa rya Transform Africa
Minisitiri w'Urubyiruko n'Ikoranabuhanga, Jean Philbert Nsengimana, yakoresheje indimi zitandukanye mu gusoza iyi nama
Perezida Mahamadou Issoufou wa Niger wasoje Transform Africa 2017, ashyikirizwa imbwirwarume ye mu muhango wo gusoza iyi nama

Amafoto: Village Urugwiro


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved