IGIHE

Rwamagana: Umukobwa ahamya ko yatewe inda afite imyaka 14, ababyeyi be bati “icyo kiranyagisha”

0 14-09-2021 - saa 09:38, Hakizimana Jean Paul

Kuva mu mpera z’icyumweru gishize ku mbuga nkoranyambaga no mu bitangazamakuru bitandukanye, hacicikanye inkuru y’umukobwa wo mu Karere ka Rwamagana wavugaga ko yatewe inda afite imyaka 14 y’amavuko nyamara ababyeyi be bagaragaje ko afite imyaka 25 kuko yavutse mu 1996.

Ni inkuru yateye benshi agahinda basaba ubuyobozi kugira icyo bukora uwo mwana akarenganurwa kuko umurebye ku isura ubona koko ari umukobwa ukiri muto, nyamara umubyeyi we na nyirarume bavuze ko iyo ngano ariyo yo mu muryango wabo kuko na nyina umubyara nawe ngo yagaragaraga nk’umwana.

Uyu mwana w’umukobwa akunze kugaragara mu Mujyi wa Rwamagana agenda asabiriza ari kumwe n’umwana we w’imyaka itatu yabyaye mu 2018, iyo umwegereye avuga ko ubuyobozi bwamutereranye n’uwamuteye inda yafunzwe agafungurwa ndetse akunze gusaba abahisi n’abagenzi kumufasha bakamuha amafaranga.

Kuri uyu wa Mbere tariki ya 13 Nzeri byatumye ubuyobozi bw’Akarere ka Rwamagana, Urwego rw’Igihugu rw’Ubugenzacyaha RIB, se w’uyu mukobwa, nyirarume wamureze, umugabo wamuteye inda akaza gufungurwa n’izindi nzego zitandukanye bahurira hamwe basuzuma ikibazo cy’uyu mukobwa wavugaga ko yabyaye imburagihe.

Se umubyara witwa Nsanzintwari Samson atuye mu Karere ka Kayonza, yavuze ko muri Kamena 1995 aribwo yafunzwe, asiga ateye inda nyina w’uyu mukobwa witwaga Mukamana Violette bari baranashakanye, yaje gufungurwa mu 2005 aje asanga umugore we yarapfuye ariko yarasize umwana w’umukobwa arerwa na nyirarume.
Ndayisaba Celestin wasigaye arera uyu mwana yavuze ko yamwakiriye hagati 1999 na 2000 ngo kuko aribwo nyina yapfuye.

Ngo yamwakiriye akiri muto nibura afite nk’imyaka ine, ngo barabanye kugeza aho se afunguriwe baramumusubiza kugira ngo akomeze inshingano za kibyeyi zo kwita ku mwana we.

Nsanzintwari avuga ko umwana yamwakiriye neza nta kibazo bakabana we n’undi mugore yahise ashaka.

Gusa ngo umwana yakomeje kunanirana akiri muto ku buryo inshuro nyinshi yakundaga kumubura yagiye kuzererea, igihe cyaje kugera uyu mwana ajya kuba mu zindi ngo ava iwabo ari nabwo yajyaga kuba ku mugabo wamuteye inda.

Ngabonziza Theoneste wamuteye inda we yagaragaraje ko umwana yabyaye amwemera kandi ko yagiye anamufasha mu buryo bushoboka bwose burimo kumwishyurira amata, kumutangirira ubwisungane mu kwivuza, kumukodeshereza inzu akayanga akayivamo n’ibindi bitandukanye.

Yavuze ko yamushakiye aho azajya ajya gufata amata y’umwana undi akajya ajyayo akayagurisha amafaranga akayanywera ndetse ko yanikuye mu nzu yari yaramushakiye ngo abemo agahitamo kujya gusabiriza ku muhanda.

Uwatewe inda we yabanje kuvuga ko impamvu yavugaga ko yabyaye afite imyaka 14 yabiterwaga n’uko atazi imyaka ye ndetse akaba atarigeze yiga gusoma no kwandika na rimwe, yavuze ko ubufasha uyu mugabo avuga ko yamuhaye atari byo ahubwo ko yamutereranye ndetse n’imiryango ye yose ikamutererana.

Mu buhamya bwa se umubyara, yavuze ko uyu mukobwa we yamuhaye umunani undi akawugurisha amafaranga akayanywera, ibi ni nako byagenze kuri nyirarume kuko ngo yamuhaye isambu y’umunani wa nyina uyu mukobwa akayigurisha ibihumbi 100 Frw nayo akayarya ahubwo agakomeza kujya ajya mu muhanda gusabiriza.

Ku rundi ruhande, uyu mukobwa yemereye ubuyobozi ko mu 2017 yitabiriye amatora ya Perezida wa Repubulika.

Ubuyobozi bwabajije uyu mukobwa icyo yifuza ku muntu wamuteye inda amusaba ko yamumenyera ibyo kurya akanamushakira aho aba. Umugabo yemereye uyu mukobwa inzu undi ayitera utwatsi avuga ko aho iri atahaba amusaba gukodesha indi.

Yanamusabye kandi kujya amuha amafaranga yo kurya kandi akanakomeza kwishyirurira ubwisungane mu kwivuza umwana wabo, ibi byose uyu mugabo yabyemeye anemerera ubuyobozi ko ibyinshi yajyaga abikora kandi ko ejo zahita yandikisha mu irangamimerere umwana wabo.

Umuyobozi w’Akarere ka Rwamagana wungirije ushinzwe imibereho myiza y’abaturage, Mutoni Jeanne, yavuze ko imwe mu mpamvu bahuje abareze uyu mukobwa ari ukugira ngo bamenye neza imyaka ye aho basanze yarabyaye arengeje imyaka y’ubukure 18, yavuze ko basanze uwamuteye inda yaratangaga ubufasha bw’ibanze ahubwo umukobwa ariwe utarabwemeye.

Ati “ Twumvikanye ko uyu mugabo amushakira ahantu yaba n’ibyo gutunga umwana ndetse n’ubwisungane mu kwivuza azajya atanga buri mwaka, ikindi ni uko uriya mwana azamwandikisha mu bitabo by’irangamimerere.

Ku bijyanye no guhabwa ubutabera basanze yaramuteye inda akuze bityo ko ntacyo ubutabera bwaba bukimubaza.

Ngabonziza Theoneste wateye inda uyu mukobwa yavuze ko yiteguye gutanga ubufasha bushoboka bwose umwana we akabaho neza
Nyirarume wa Iradukunda Cynthia yavuze ko uyu mwana yamuhaye umunani wa nyina akawugurisha
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza