Rutsiro: Ishuri ribanza ryasibije abana 325 muri 800 kubera gutsindwa Ikinyarwanda

5 16-05-2018 - saa 11:50, Prudence Kwizera

Ishuri ribanza rya Gihango ryo mu Karere ka Rutsiro ryafashe icyemezo cyo gusibiza abanyeshuri 325 muri 800 basanzwe bahiga kuko basanze batazi gusoma no kwandika Ikinyarwanda.

Ni icyemezo ubuyobozi bw’iryo shuri riherereye mu Murenge wa Gihango bwafashe mu 2017 bitewe n’uko banze kwimura abanyeshuri mu gihiriri kandi batujuje ibisabwa.

Icyo ni kimwe mu byatunguye itsinda ry’abakozi ba Minisiteri y’Uburezi basuye iryo shuri muri gahunda yo gukora ubukangurambaga bugamije kuzamura ireme ry’uburezi mu mashuri.

Umuyobozi w’iryo shuri, Munyaneza Anicet, avuga ko uwo mwanzuro bafashe wo gusibiza abanyeshuri basanze ari mwiza kuko bari bafite ikibazo gikomeye cy’uko babonaga ari byo bizabagirira akamaro.

Yagize ati “Twasibije cyane muri 2017 kuko twari dufite umubare munini w’abana batazi gusoma no kwandika, dufata umwanzuro njye numva ko ari mwiza wo kureba abana batazi gusoma no kwandika Ikinyarwanda kuko twabonaga ariho hari ikibazo gikomeye, hanyuma turavuga ngo reka uyu mwaka tuwugire umwihariko, tuganira n’abarimu ndetse n’ababyeyi n’abandi bafatanyabikorwa bose dufata umwanzuro wo kubasibiza kugira ngo turebe ko imyumvire yabo yazamuka.”

Munyaneza akomeza avuga ko uko kubasibiza byatangiye gutanga umusaruro kuko n’abarimu bahuguwe bagirwa n’inama yo kuvugurura imyigishirize.

Ati “Twasibije abana 325 mu bana 800, biri gutanga umusaruro uyu munsi wa none kuko nk’urugero nko mu mwaka wa mbere niba mu bana 80 abagera kuri 20 ari bo babaga bazi gusoma no kwandika Ikinyarwanda, uyu munsi wa bakaba bagera kuri 60 biri gutanga icyizere.”

Yakomeje avuga ko zimwe mu mpamvu zatumaga abana batamenye gusoma no kwandika Ikinyarwanda harimo ubucucike bari bafite mu byumba by’amashuri no kuba abarimu bataritaga ku kwigisha Ikinyarwanda neza.

Umwe mu barimu bigisha Ikinyarwanda, Iyaremye Gerturde, yasobanuye ko kuba abana batari bazi gusoma no kwandika Ikinyarwanda byaterwaga n’abarimu batabyitagaho ndetse no kutagira ubufatanye n’ababayeyi mu kurera neza.

Ati “Hari ababyeyi badaha abana ibikoresho ugasanga umwana aza kwiga nta kintu cyo kwandika afite nta n’icyo kwandikisha. Hari n’umubyeyi umwaka ushobora gushira atageze ku ishuri gusura umwana we. Abarimu natwe wasangaga tutigisha neza ikinyarwanda ariko baraduhuguye ku buryo ubu ubona bigenda neza abana bari kukimenya.”

Itsinda ry’abakozi ba Minisiteri y’Uburezi basuye iryo shuri batunguwe no kuba harasibijwe abanyeshuri benshi, basaba ubuyobozi bw’ishuri n’abarimu gusuzuma impamvu nyamukuru ituma abana bigishwa ntibamenye.

Umukozi muri Minisiteri y’Uburezi, Habimana Jacques, yabasabye ko bagira imikoranire n’ababyeyi kugira ngo hatazagira umwana wongera gutsindwa agasibira.
Ati “Twabagiriye inama ko icyo kibazo bacyigaho ku bufatanye n’ababyeyi bakamenya impamvu zose zituma abana batsindwa noneho bagafata n’ingamba kugira ngo ikibazo gikemuke burundu”.

Ishuri ribanza ry Gihango ni ishuri ryigaho abana 805, bakigira mu byumba 12, bitabwaho n’abarimu 13.

Abanyeshuri biga kuri Ecole Primaire Gihango basibijwe ku bwinshi kuko batazi gusoma no kwandika Ikinyarwanda
Umuyobozi w’ Ishuri ribanza rya Gihango, Munyaneza Anicet
bamwe mu bagize itsinda ry'abakozi ba Minisiteri y'Uburezi basuye Ecole Primaire Gihango
Itsinda ry'abakozi ba Mineduce baganiriye n'abarimu bo kuri Ecole Primaire Gihango

[email protected]

Kwamamaza
Kwamamaza

Izindi nkuru wasoma

19 3 20-08-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
b 2018-05-18 01:36:06

uwo muyobozi akwiye kubishimirwa none ko hari abimura abana gusa ntacyo bazi,bigatuma n,abandi batiga kuko baba bizeye kwimuka batabiharaniye bikaba byagira ingaruka nyinshi ku ireme ry,uburezi.

2
jonis 2018-05-17 08:03:59

Nukuri nanjye ndashima uyu muyobozi wiki kigo kuko iri niryo reme ryuburezi dushaka
*umwana yimuke afite icyo azi*naho ministeri yuburezi niyo itwicira abana bo batanga itegeko ryo kwimura burimwana kdi ababo mu mashuri akomeye biga nkuko babyifuza

3
vedaste 2018-05-16 10:47:35

Nyamara ndabona Aniceth yarafashe icyemezo cya kigabo. None c birakwiye koko kwimura umwana utazi gusoma no kwandika? Yaba yimuka ajyahe?!!!!

4
Theo Masabo 2018-05-16 07:30:15

Ireme ni ngombwa. Nubwo hakunze kugaragaramo intege nke Ku nzego zibishinzwe zidandukanye, sinabura gushimira uyu mudiregiteri waciye agahigo ko kwitandukanya nabantu Bose bamize bunguri ihame ryo kwimura Ababa Mu gihiriri! Nakomereze aho kuko biragaragara icyagombaga kuba éducation pour tous cyahindutse aliénation pour tous!

5
Mwidishyi 2018-05-16 07:14:01

Byose bituruka kuri Leta, nubwo irimo kurenganya Abarezi. Ntanicyo bivuze mu gihe abana babo biga Greenhills, Riviera nahandi.
Bayobewe ukuri se ? Nukwikirigita bagaseka kdi munazirikane ko turi mu mpera zumwaka, bari kwicira cash

Kwamamaza