Rusizi: Abantu 20 bashinjwa amarozi no kwihindura inyamaswa batamarijwe mu ruhame

8 12-02-2018 - saa 09:38, Emma-Marie Umurerwa

Abagabo n’abagore bagera kuri 20 bo mu Karere ka Rusizi batawe muri yombi bafungirwa ku Biro by’Umurenge wa Gikundamvura nyuma yo gushinjwa na bagenzi babo ko bakoresha amarozi mu nteko y’abaturage.

Abaturage bo muri aka gace bashinjanya kuroga abantu barimo n’abana bato bagapfa mu gihe abandi bashinjwa kwihindura inyamaswa zirimo n’imbwa.

Mu nteko y’abaturage yo ku wa 9 Gashyantare 2018, yahuje abatuye mu midugudu itanu yo mu Kagari ka Mpinga muri Gikundamvura hari abavuzweho gukoresha amarozi bituma ubuyobozi bubafata.

Umuyobozi ushinzwe irangamimerere mu Murenge wa Gikundamvura, Ndamyimana Daniel yatangaje ko hari abaturage bashinja abandi amarozi.

Yagize ati “Nibyo koko ku wa Gatanu hari abaturage bagera kuri 20 bari baje ku murenge ariko ntabwo twabafunze, ahubwo twarabaganirije tubagira inama hanyuma turabareka barataha. Undi uri hano ku murenge ni umwe, abaturage bateye iwe mu rugo ku wa Gatandatu bavuga ko bari bumwice kubera ko bacyekaga ko yaroze umwana w’imyaka ibiri agapfa. Kuba tumufite rero si uko twamufunze ahubwo ni ukugira ngo arindirwe umutekano.”

Yakomeje agira ati “Bariya 20 twasanze nta gihamya ariko abaturage barabashinja bati uyu yihindura imbwa, uyu yihindura inyamaswa runaka, uriya ni umurozi yaroze kanaka arapfa mbese usanga ari ikibazo kuko hari nk’umuntu ushinjwa n’abaturage hafi ya bose batuye mu mudugudu. Kubahamagara bakaza hano ku murenge tukabaganiriza bituma niyo yaba aroga koko ashobora guhita abireka kuko aba abona ko yamenyekanye.”

Ndamyimana avuga ko hari abaturage bashaka kwihorera bakajya gushaka amarozi ngo bihimure.

Ati “Hari abatubwira ko bajya gucisha uburozi i Burundi kugira ngo bazihorere ku babarogeye. Ubu rero icyo turimo gukora ni ugukorana inama n’abaturage tukabakangurira kujya bajya kwa muganga igihe barwaye, aho guhita banzura ko barozwe kuko muganga wenyine niwe wemeza ko umuntu yarozwe cyangwa atarozwe.”

Mu myaka itandatu ishize mu Murenge wa Gikundamvura hakomeje kuvugwa ikibazo cy’amarozi, ndetse bamwe barwara ntibajye kwa muganga bakajya mu bavuzi ba gakondo abandi bakayoboka iy’amasengesho bavuga ko barozwe.

Mu bice by’igihugu bihana imbibi n’u Burundi na Repubulika Iharanira Demokarasi ya Congo havugwa abantu bakoresha amarozi ndetse n’abihindura inyamaswa bagamije kurinda imitungo yabo, kwihorera ku bo bafitanye inzigo n’ubundi bwirinzi; bivugwa ko amarozi menshi aturuka mu bihugu by’ibituranyi.

Abaturage bashinjwa gukoresha amarozi no kwihindura inyamaswa bajyanywe ku Biro by'Umurenge wa Gikundamvura
Umwe mu baturage ukekwaho kuroga umwana w'imyaka ibiri yakubiswe agirwa intere

Amafoto: TV1

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Ingabire 2018-02-13 02:22:21

Ni mureke kwihorera namwe ntaho mwaba mutandukaniye.mubareke buri wese akore uko yumva kandi bakora ibyo bazi neza ko ari bibi.igihe ni gito Yesu agiye kuza guhemba no guhana kandi niwe uca imanza zitabera kuko areba mu mitima ya twese.umena amaraso azayabazwa. uwezwa nakomeze yezwe n’uwanduye nakomeze yandure kuko bombi bazahembwa ibikwiranye n’ibyo yakoze kandi naho Yesu yatinda nkuko twabifashe nkakamenyero ngo igihe byavugiwe buri muntu amenya igihe amaze ntamenya icyo asigaje urupfu twese turarugendana.abarozi mubereke Imana niyo izabahorera.

2
musemakweli 2018-02-13 00:07:47

aya ni amarozi w’Allah rwanyonga

3
Hano 2018-02-12 20:43:54

Ariko se ibyo abo banyarwanda badukanye ni ibiki?ko ba sogokuruza bataroze koko muri mu biki?mwagiye koko mwigira ku kuco wacu ko ariwo Imana yaduhaye ngo utuyobore.mwarekeye ibyo mu birozi muri ibyo bihugu koko muraza kwanduza u Rwanda kubera iki?cg mujye guturayo bigire inzira,ntitwigeze turoga na gato,mwihane muyoborwe n Imana y i Rwandanda nukuri,mukurikize umuco wanyu kuko uzira ico.

4
theo 2018-02-12 13:10:57

Wowe wiyise dr herve nawe uri umurozi uhakana uburozi gute harigihe uzahura nabo sha !!!!!! Buretse !

5
Dr herve 2018-02-12 09:45:51

Ariko mwazajya muva murizo superstitions, ibyo bintu byamarozi ntibibaho . Iyo uje kwa muganga tugusangamo za malaria zisanzee, nawe ngo bakurogeye.
Ahubwo leta igomba kuvanaho ibyabavuzi bagakondo kuko aribobbica abantu babavura amarozi kandi atariyo ari indwara zisanzwe zikira.
Abo bo ngo bihindura inyamanswa ntibibaho, ni ama superstitions kugirango birire amafaranga y abaturajye binjiji. Ubwo se umuntu ya kwihindura inyamanswa gute?

6
ddd 2018-02-12 02:49:46

nukuri ikibazo cy’amarozi Government irebe uko ikigaho kuko mu byaro birakabije, hari uherutse kuroga urugo rwose mu mazi, arangije arabyigamba ngo barubaka se ngo bazabirangiza? nge mba numva numiwenuwabasuye agasangira nabo ntiyasigaye pe, kubw’amahirwe barabarukije ubu bari koroherwa

7
Musengiman 2018-02-12 02:11:57

Babice Bose abashenzi babarozi Bose abarozi nibabi baragahamba

8
RUTAGENGWA 2018-02-12 01:57:08

wenda n’uko umuntu atakwemeza ijana kw’ijana ko umuntu runaka ariwe wamurogeye naho ubundi iyaba hakorwaga iperereza uwobacyeka ko yaroze abantu yagaragara nawe agakatirwa igifungo cya burundu nk’uko itegeko ribivuga hano mu rwanda ko aricyo gihano gihabwa uwishe umuntu,wenda abarozi babyumvise batahwa n’ubwoba bakabireka

Kwamamaza