IGIHE

Rubavu: Abayisilamukazi batanze umusanzu ku busabe bwo guhangana n’igwingira ry’abana

0 12-06-2019 - saa 15:58, Mukwaya Olivier

Abayisilamukazi bo mu Karere ka Rubavu batangiye kuzenguruka ibice bitandukanye bigisha abandi bagore uburyo bwo guteka indyo yuzuye hagamijwe kurwanya igwingira ry’abana.

Ni igikorwa cyakurikiye umukoro Abayisilamukazi b’i Rubavu bahawe ku wa 27 Mata 2019 nyuma y’umuganda usoza ukwezi bakoreye mu Murenge wa Nyundo.

Icyo gihe Umuyobozi Mukuru muri Minisiteri y’Ubutegetsi bw’Igihugu ushinzwe Amajyambere rusange n’Imibereho myiza y’Abaturage, Sheikh Hassan Bahame, yabasabye gutanga imbaraga zabo mu kurwanya igwingira.

Yagize ati “Mwagaragaje ko mufite gahunda yo kurwanya igwingira mu Burengerazuba nk’intara iri hejuru mu kugira umubare w’abana bagwingiye. Nimuhaguruka mugafata umwanya mukegera abaturage bizashira.’’

Rubavu ifite imiryango 13 442 iri mu bukene bukabije ari na yo yasabiwe umwihariko. Aka karere kaza mu tw’imbere mu kugira abana bafite ibibazo byo kugwingira n’imirire mibi, bagera kuri 46.3%; inyuma ya Nyabihu (59.0%), Ngororero (55.5%) na Karongi (49.1%).

Umuyobozi w’Umuryango Wisigara uhuza Abayisilamukazi, Kantengwa Henriette, yavuze ko batangiye gutanga umusanzu wabo mu guhangana n’igwingira ry’abana.

Yagize ati “Ubu twatangiye ibikorwa byo kuzenguruka imirenge yose kandi turibanda cyane ku ifite ibiryo kuko Akarere ka Rubavu ntabwo gashonje. Tugiye kwigisha abagore uko bateka indyo yuzuye kandi ifitiye akamaro umwana kuko ibiryo birahari. Tuzabigisha tubigereho kuko ni inshingano twihaye kandi tuzishakamo ubushobozi.’’

Abagore bo mu Murenge wa Gisenyi batangirijweho iyo gahunda ku wa 9 Kamena 2019, bafashe ingamba ku bijyanye n’isuku no gutegura indyo yuzuye.

Uwizeyimana Nathalie yavuze ko mbere batahaga imboga agaciro bakumva ashaka inyama gusa.

Yagize ati “I Rubavu nta kihabuze usibye gutegura indyo yuzuye. Njye nari nsanzwe nzi ko ufashe ibirayi, ibitoki n’ibishyimbo uba wuzuje indyo ariko dusanze nk’indagara, karoti n’imboga ubishyizeho aribwo uba uriye neza. Usanga benshi badaha imboga agaciro ahubwo bakikundira inyama.’’

Mu buhamya bwabo bavuga ko hari imwe mu miryango ijya gushakira ubuzima i Goma muri Repubulika Iharanira Demokarasi ya Congo, bigatuma hari abatabona umwanya wo kwita ku ngo zabo.

Uwayisaba Christine yavuze ko agiye kuganira n’umugabo we ku buryo bwo gutegura indyo yuzuye.

Yakomeje avuga ko “Abana bo muri Gisenyi barerwa na bagenzi babo, umubyeyi azinduka yigendera gushaka ubuzima i Goma umwana akarerwa n’undi, ntarye neza kuko amugaburira ibyo abonye kandi bifite isuku nke. Ngiye kuganiriza umugabo turebe uko umwe yajya asigarana abana kandi bazagira ubuzima bwiza.’’

Umuyobozi ushinzwe Imirire, Isuku n’Isukura mu Kigo Mboneza mikurire y’Abana bato, Mucumbitsi Alexis, yashimye Abayisilamukazi biyemeje guhangana n’igwingira ry’abana.

Yagize ati “Akarere ka Rubavu karakize kandi kagenda kazamuka mu bukungu; uko abagatuye bazamuka niko bagira inyota y’amafaranga bakibagirwa inshingano zo kurera kuko usanga bagenda i Goma ntibabone umwanya wo kwita ku bana bikabakururira kugwingira.’’

Ubushakashatsi mu rwego rw’Ubuzima bw’Abaturage, DHS, bwakozwe hagati ya 2005 na 2015 bwagaragaje ikibazo cyo kugwingira mu bana bari munsi y’imyaka itanu kigenda kigabanuka ku muvuduko wa 6% mu myaka itanu cyangwa 1,3 % buri mwaka, kuko kugwingira byari bigeze kuri 38% bivuye kuri 51% yo mu 2005.

Abayisilamukazi batangiriye gahunda yo kwigisha abagore guteka indyo yuzuye bahereye ku bo mu Murenge wa Gisenyi
Abana bo mu Mujyi wa Gisenyi bahise bahabwa indyo yuzuye
Abayisilamukazi babanje guhugurwa ku guteka indyo yuzuye
Umuyobozi ushinzwe Imirire, Isuku n’Isukura mu Kigo Mboneza mikurire y’Abana bato, Mucumbitsi Alexis, yashimye umusanzu w'Abayisilamukazi mu guhangana n’igwingira ry’abana
Bfashe amasomo bagomba gutanga mu mirenge yose igize Akarere ka Rubavu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza