IGIHE

Rotary Club Musanze yabonye abayobozi bashya, yakira abanyamuryango icyenda barimo Guverineri Gatabazi (Amafoto)

0 10-08-2019 - saa 18:50, Akayezu Jean de Dieu

Rwiyemezamirimo Uwineza Patrick yagizwe umuyobozi mushya wa Rotary Club Musanze - Murera, yiyemeza kongera abanyamuryango no gushyira mu bikorwa intego za Rotary International zo guharanira imibereho myiza y’abaturage.

Ku mugoroba wo kuri uyu wa Gatanu tariki 9 Kanama 2019 nibwo habaye ibirori byo kwimika Uwineza n’abo bazafatanya mu gihe cy’umwaka, byabereye mu Mujyi wa Musanze mu Ntara y’Amajyaruguru byitabiriwe na Guverineri Gatabazi Jean Marie Vianney wahise aba n’umunyamuryango wa Rotary Club Musanze- Murera.

Byitabiriwe kandi binayoborwa na Guverineri wa Rotary Club mu Karere ka 9150 gaherereyemo n’u Rwanda, Anna Kemajou Nkodia, wari uherekejwe n’Umuyobozi wa Rotary Club mu Rwanda, Rugera Jeannette.

Rotary Club Musanze-Murera yatangiye mu 2015, itangirana abanyamuryango barindwi ariko kuri ubu nyuma yo kurahiza abandi icyenda yahise igira 16.

Uwineza yavuze ko icyo azibandaho muri manda ye ari ukwagura umuryango ashishikariza abanyarwanda kujya muri Rotary Club ndetse no gukomeza kugendera mu murongo wa Rotary International wo kurwanya ubujiji n’ubukene, kwegereza ubuvuzi kuri bose, kunoza imitangire y’amazi meza, kurwanya ibyorezo nko guhashya indwara y’imbasa no gufasha abababaye.

Yagize ati “Nshimye icyizere nagiriwe ariko kandi ni inshingano nziza zo kuyobora abanyamuryango ba Rotary Club Musanze-Murera muri wa murongo wa Rotary wo gufasha abakene kandi nta nyungu dutegereje.”

“Ikindi kandi njye n’abo dufatanyije twihaye intego yo gukora ubukangurambaga tukongera abanyamuryango nibura tukikuba kabiri, murabona ko n’ubu twungutse abandi bashya icyenda biganjemo abari n’abategarugori kuko mu icyenda twakiriye batatu gusa nibo bagabo.”

Kuva yashingwa na Rotary Club Mont Jali mu 2015, Rotary Club Musanze - Murera imaze kugira uruhare mu bikorwa byinshi birimo gutangira mituweri abatishoboye muri Musanze, imishinga yo guteza imbere impano z’urubyiruko n’umushinga mugari yafatanyije n’indi Club yo muri Leta Zunze Ubumwe za Amerika wo kugeza ubuvuzi ku bitaro bya Shyira hifashishijwe iyakure.

Guverineri w’Intara y’Amajyaruguru, Gatabazi Jean Marie Vianney yashimye ibikorwa bya Rotary Club mu guteza imbere igihugu no guharanira imibereho myiza y’abaturage, by’umwihariko muri iyi Ntara.

Yagize ati "Igihugu cyacu cyarakerewe bihagije, ni yo mpamvu tudashaka kongera gusigara inyuma, kubw’ibyo abishyize hamwe bagamije iterambere ry’igihugu ntawe utafatanya nabo. Natwe nk’inzego za leta tuzakomeza gufatanya na Rotary Club mu bikorwa byayo byo gufasha abakeneye ubufasha.”

Guverineri Anna Kemajou yashimiye ubuyobozi bw’Intara y’Amajyaruguru by’umwihariko guverineri wayo wemeye kuba umunyamuryango wa Rotary, avuga ko ari intambwe ikomeye igaragaza ko imbere ari heza kandi bizongerera imbaraga abanyamuryango.

Yasabye abayobozi bashya n’abanyamuryango icyenda barahiriye kujya muri Rotary Club Musanze - Murera, gukomeza ibikorwa by’ubwitange no guharanira gufasha abababaye badategereje inyungu.

Ati “Ndashishikariza abanyamuryango gukomeza gukora ibikorwa byiza by’urukundo no gufasha abakeneye ubufasha. Mubwire abanyamuryango ko mufashe umwanzuro mugiye kubona uburyo muzishimira gukora ibikorwa by’ubwitange, gufasha abaturage mutiteguye kubona inyungu cyangwa ishimwe.”

Abane Daniella wagizwe umunyamabanga wa Rotary Club Musanze-Murera yavuze ko ibikorwa byo gufasha abikunda kuko azi umusaruro bitanga.

Ati "Nkunda gufasha, gukora ibikorwa by’ubwitange kuko kuba ngeze aha ni uko hari abantu benshi bagiye babimfashamo, iyo nza kuba ndi njyenyine ntacyo nari kwigezaho, iyo ufite icyo utanga ntan’ubwo bisaba ubushobozi buhambaye ahubwo kumva ko hari umuntu ushobora kwishima kubera wowe, bitera ishema.”

Umuyobozi wa Rotary Club mu Rwanda akaba n’uwungirije Guverineri w’Akarere ka 9150, Rugera Jeannette, yasabye abayobozi bashya bahawe kuyobora Rotary Club Musanze - Murera gushyira mu bikorwa intego za Rotary Club no kwibanda ku kuzamura umubare w’abanyamuryango.

Kuri uyu wa Gatanu kandi Rotary club Musanze Murera yatanze inkunga ya 800$ mu kigega cya Rotary International, yo gufasha mu kurandura indwara y’imbasa ku Isi, inishyurira mituweri abatishoboye bagera ku 100 bo mu Karere ka Musanze.

Bafatanye urunana nk'ikimenyetso cy'ubumwe n'urukundo
Bamwe mu bitabiriye ibirori by'irahira rya komite nshya ya Rotary Club Musanze-Murera n'abanyamuryango bashya
Guverineri Anna Kemajou yahaye umukoro Uwineza wo kongera abanyamuryango ba Rotery Club
Guverineri Anna Kemajou, Uwineza Patrick na Rugera Jeannette
Guverineri Gatabazi ashyikiriza impano y'agaseke, Guverineri Anna Kemajou
Guverineri Gatabazi yahawe umwambaro uranga abanyamuryango ba Rotary Club
Guverineri Gatabazi yasobanuye icyo agaseke kavuze mu muco nyarwanda
Guverineri Gatabazi, Guverineri Anna Kemajou n'Uwungirije Guverineri mu Karere ka 9150, Rugera Jeannette
Guverineri wa Rotary Club mu Karere ka 9150 gaherereyemo n’u Rwanda, Anna Kemajou Nkodia, yasabye abanyamuryango bashya kugira umutima w'ubwitange
Abayobozi bafashe ifoto nyuma yo kwakira Guverineri Gatabazi mu Muryango wa Rotary Club
Icyapa giha ikaze Guverineri Anna Kemajou uri mu Rwanda gusura ibikorwa bya Rotary Club
Umuyobozi wa Rotary Club mu Rwanda yambika umudari umwe mu banyamuryango ba Rotary Club Musanze-Murera
Umuyobozi wa Rotary Club mu Rwanda, Rugera Jeannette
Uwineza Patrick ashyikirizwa ibirango byose by'umuyobozi wa Rotary Club Musanze-Murera
Uwineza Patrick n'umugore we n'abana bafashe ifoto y'urwibutso na Guverineri Anna Kemajou na Rugera Jeannette umwungirije
Uwineza Patrick washinze Energy Radio n'inzu itunganya umuzika izwi nka Top5 Sai yagizwe Perezida wa Rotary Club Musanze-Murera
Uwineza Patrick( iburyo) n'abayobozi bazafatanya kuyobora Rotary Club Musanze-Murera mu gihe cy'umwaka
Yavugije inzogera imwemerera ko ari umuyobozi wa Rotary Club Musanze-Murera

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza