IGIHE

RDC yanze kwitabira inama yagombaga guhurizwamo n’u Rwanda

0 23-01-2023 - saa 11:57, Rabbi Malo Umucunguzi

Repubulika Iharanira Demokarasi ya Congo yongeye kwanga kwitabira inama yagombaga guhuriramo n’u Rwanda, ngo haganirwe ku mwuka mubi umaze iminsi hagati y’ibi bihugu by’ibituranyi.

Ni inama byatangajwe ko yagombaga kubera i Doha muri Qatar, nk’ubushake icyo gihugu cyagize mu guhuza u Rwanda na RDC muri iki gihe bishinjanya kubangamirana mu mutekano.

Ni icyemezo RDC yafashe mu gihe u Rwanda rwakomeje kuyishinja kurugira urwitwazo mu bibazo byayo, ntinatere intambwe yaganisha ku gushaka umuti.

Mu butumwa yanditse kuri Twitter kuri uyu wa Mbere abugeneye "umuturanyi w’ubuziraherezo", Umuvugizi wungirije wa Guverinoma y’u Rwanda, Alain Mukuralinda, yakomoje ku bushake buke bwa RDC mu gukemura ikibazo, nubwo ateruye ngo ayivuge mu izina.

Yagize ati "Nyuma yo gushinja u Rwanda kukugabaho ibitero no gutera inkunga bagenzi bawe urwanya, umuhuza yaragutumiye ngo muhure. Warabyirengagije."

"Nanone, wasabye ubuhuza. Waje gutumirwa ngo uhure n’u Rwanda. Warabyitesheje. Bwa nyuma, niba uhunga ibiganiro no guhura nabo, ni nde muzafatanya gukemura ikibazo? Waba koko ukeneye igisubizo cya burundu kandi kirambye ku kibazo cy’umutekano muke mu Burasirazuba bwa RDC?"

Mu kiganiro kuri RBA kuri iki Cyumweru, Mukuralinda yavuze ko uwa uwakabaye atera intambwe ya mbere iganisha ku kubona umuti ari Guverinoma ya Congo, ariko iseta ibirenge mu gushyira mu bikorwa ibyo umukuru w’igihugu cyabo yashyizeho umukono.

Yatanze urugero no ku bindi biganiro RDC yagiye yanga kwitabira, muri gahunda z’ubuhuza za Luanda na Nairobi zigamije gushakira umuti ibibazo byo mu burasirazuba bwa RDC.

Yagize ati "Noneho fata umuhuza, agize atya ahamagaye M23, biri mu nshingano ze, ahamagaye na Leta ya Congo ngo uwo munsi bahure, Leta ya Congo ntabwo ije. Niba yarayihamagaye ni uko abona hari icyo uwo mutwe wasabwe, wakoze. Kuko iyo aza kubona ko ntacyo bakoze, nibwo yari gukora raporo akanasaba ko babarwanya."

"Igiteye impugenge ni ukubona nyir’ubwite wagombye gufatanya n’abo baje kumufasha, kuko ni cyo abandi baje gukora, ni ukugufasha gushaka amahoro iwawe, aho kugira ngo ubafashe, ni wowe urimo ubashyira imitego mu nzira bagomba gucamo. Ariko aho icyizere kiri ni uko ibyo ngibyo bitabuza umuhuza n’abahuriye muri ririya tangazo bose gukomeza gushyirwa mu bikorwa ibyasabwe na Luanda, nubwo bigoranye."

Yavuze ko Congo nibona ko ibyo ikora bibangamira n’abaje kuyifasha, "wenda izasubiza ubwenge ku gihe igaruke mu nzira yo gufataya n’abandi gushaka amahoro muri kariya gace."

Yakomeje ati "Uyu munsi mu itangazamakuru twabonye ko ejo hashobora kubera inama i Doha n’abandi bakuru ba hano bazajyayo, kugira ngo bongere baganire kuri icyo kibazo. Ese ejo nitubona Congo itagiyeyo? Kuko n’umunsi bahuye na M23, Congo yagombaga kuba ihari, ntiyaza."

"Ubwo rero gukomeza uvuga uti u Rwanda ni rwo rwataka, nirwo rugira gute, ariyo ntero, ariyo nyikirizo, bishobora gusaza vuba."

Nk’uko byagenze na mbere, byarangiye ibi biganiro by’i Doha nabyo RDC itabyitabiriye.

Mukuralinda yavuze ko u Rwanda ruzakomeza kugaragaza ubushake mu gukemura ibibazo no kurinda umutekano warwo, kandi ko umunsi rwashojweho intambara ruzirwanaho.

Perezida Tshisekedi yanze kwitabira inama yagombaga kumuhuza na mugenzi we w'u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza