IGIHE

Perezida w’Urukiko rw’Ikirenga yakiriye mugenzi we wa Guinea

0 12-06-2019 - saa 13:51, IGIHE

Perezida w’Urukiko rw’Ikirenga, Prof. Sam Rugege, yakiriye mugenzi we wa Papua New Guinea, Sir Gibuma Gibbs Salika, baganira ku byo Urwego rw’Ubucamanza rwagezeho cyane cyane mu mikoreshereze y’ikoranabuhanga mu micungire y’imanza n’abakozi b’inkiko.

Sir Gibuma Gibbs Salika yatangaje ko yishimiye kugera mu Rwanda nyuma yo kumara igihe yumva intambwe ikataje u Rwanda rwagezeho mu mikoreshereze y’uburyo bukomatanyije bw’ikoranabuhanga mu micungire y’imanza (IECMS).

Ati “Nishimiye kwibonanira na mugenzi wanjye w’u Rwanda kugira ngo tuganire birambuye uko Urwego rw’Ubucamanza rwashoboye gutera intambwe ndende mu gihe gito mu mikoreshereze y’ikoranabuhanga mu mirimo ya buri munsi y’inkiko”.

Perezida w’Urukiko rw’Ikirenga, Prof. Sam Rugege, yanaganiriye na mugenzi we ku miterere n’imikorere y’inkiko mu Rwanda, uko abacamanza bashyirwaho na manda zabo, imikoranire y’Urwego rw’Ubucamanza n’izindi nzego n’ibindi.

Prof. Sam Rugege, yibukije kandi ko ari byiza guhura kw’abayobozi b’inzego zitandukanye kugira ngo basangire ubunararibonye, bityo bamwe bungukire ku bandi, habeho kuzuzanya.

Yongeyeho ati "Ni ryo terambere rirambye ku bihugu byose".

Uretse Urwego rw’Ubucamanza bw’u Rwanda, ntakindi gihugu cyo muri Afurika gikoresha IECMS, ariko buri gihugu gifite ubundi buryo bw’ikoranabuhanga cyifashisha mu micungire y’imanza. Ni ubwa mbere Perezida w’Urukiko rw’Ikirenga rwa Papua New Guinea aza mu Rwanda.

Sir Gibuma Gibbs Salika kandi mu ruzinduko rwe azitabira inama mpuzamahanga ku mikoreshereze y’ikoranabuhanga mu nzego z’ubutabefra. Iyo nama iteganyijwe i Kigali kuva kuwa 12 – 13 Kamena 2019.

Perezida w’Urukiko rw’Ikirenga, Prof. Sam Rugege, yakiriye mugenzi we wa Papua New Guinea, Sir Gibuma Gibbs Salika
Abayobozi bombi baganiriye ku ntambwe imaze guterwa mu rwego rw'ubutabera
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza